मिरा-भाईंदर मेट्रो ब्रिज दुर्घटना: काशिमीरात सिमेंटचा ब्लॉक कोसळला, तरुण गंभीर जखमी
मीरा-भायंदर शहरातील काशिमीरा भागात मेट्रो ब्रिजच्या बांधकामादरम्यान एक मोठी दुर्घटना घडली असून, त्यात एक तरुण गंभीर जखमी झाला आहे. पुलावरून खाली आलेल्या सिमेंटच्या मोठ्या ब्लॉकमुळे शादाब नावाच्या 23 वर्षीय तरुणाच्या डोक्याला जबर मार लागला. सध्या मीरा रोड येथील वॉकहार्ट रुग्णालयात त्याच्यावर उपचार चालू आहेत आणि त्याची शस्त्रक्रिया सुरू असल्याचे सांगण्यात येत आहे. या दुर्घटनेनंतर मेट्रो आणि एलिव्हेटेड ब्रिजच्या बांधकामादरम्यान नागरिकांच्या सुरक्षेचा मुद्दा पुन्हा एकदा समोर आला आहे.
ही घटना काशिमीरा भागातील अक्षित रेस्टॉरंटसमोर घडली. शादाब रस्ता ओलांडत होता, त्याचवेळी त्याला फोन आला आणि तो फोनवर बोलण्यासाठी रस्त्याच्या मधोमध थांबला. नेमक्या याच क्षणी मेट्रो ब्रिजवरून सिमेंटचा मोठा ब्लॉक अचानक खाली कोसळला आणि थेट त्याच्या डोक्यावर आदळला. या जबरदस्त धक्क्याने शादाब जागेवरच रस्त्यावर कोसळला आणि त्याच्या डोक्याला गंभीर दुखापत झाली.
दुर्घटनेनंतर शादाब बराच वेळ जखमी अवस्थेत रस्त्यावरच पडून राहिला. रस्त्याच्या कडेला मोठी वाहने उभी असल्यामुळे त्याच्याकडे बराच वेळ कोणाचेही लक्ष गेले नाही. जवळपास एक तासानंतर एका व्यक्तीचे त्याच्याकडे लक्ष गेले, त्यानंतर रिक्षाच्या मदतीने त्याला तातडीने मीरा रोडवरील वॉकहार्ट रुग्णालयात दाखल करण्यात आले. या प्रकरणी शादाबच्या कुटुंबीयांनी पोलिसांकडे तक्रार दिली आहे.
ज्या ठिकाणी ही घटना घडली, तिथे मेट्रो ब्रिजसोबतच एलिव्हेटेड ब्रिजचेही बांधकाम सुरू आहे. स्थानिक नागरिकांच्या सांगण्यानुसार, याआधीही या बांधकामातून लोखंडी सळ्या, धातूच्या वस्तू आणि इतर बांधकाम साहित्य खाली पडल्याच्या घटना घडल्या आहेत. साधारण महिनाभरापूर्वी एका स्कूल व्हॅनजवळ लोखंडी वस्तू कोसळल्याचीही घटना घडली होती, त्यावेळी स्कूल व्हॅनमधील विद्यार्थ्यांना कोणतीही दुखापत झाली नव्हती. आता मात्र थेट एका तरुणाच्या डोक्यावर बांधकामातील सिमेंटचा ब्लॉक कोसळल्यामुळे बांधकामस्थळी सुरक्षेच्या उपाययोजनांवर प्रश्नचिन्ह उभे राहिले आहे. बांधकामस्थळी सुरक्षा जाळ्या, अडथळे आणि देखरेखीची व्यवस्था पुरेशी आहे का, याची तपासणी करण्याची मागणी नागरिकांकडून होत आहे.
या घटनेवरून मनसेचे शहराध्यक्ष संदीप राणे यांनी MMRDAवर निशाणा साधला आहे. बांधकामादरम्यान अशा घटना वारंवार घडत असल्याचा आरोप त्यांनी केला आहे. MMRDAने या प्रकरणाची स्वतःहून दखल घेऊन कारवाई करावी, अशी मागणी राणे यांनी केली असून, कारवाई न झाल्यास अधिकाऱ्यांच्या कार्यालयात जाऊन आंदोलन करण्याचा इशाराही दिला आहे. या दुर्घटनेनंतर संबंधित यंत्रणा बांधकामस्थळी सुरक्षेच्या उपाययोजना कशा राबवते आणि पुढे काय कायदेशीर कारवाई होते, याकडे नागरिकांचे लक्ष लागले आहे.
