मेरठ निळा ड्रम प्रकरणात मुस्कान रस्तोगी आणि साहिल शुक्ला दोषी, 14 ऑक्टोबरला शिक्षा
सौरभ राजपूत हत्याकांडात मेरठच्या न्यायालयाने पत्नी मुस्कान रस्तोगी आणि तिचा प्रियकर साहिल शुक्ला यांना दोषी ठरवले आहे.
मेरठमधील बहुचर्चित निळा ड्रम (Blue Drum) प्रकरणात स्थानिक न्यायालयाने मोठा निकाल दिला आहे. सौरभ राजपूत यांच्या हत्येप्रकरणी त्यांची पत्नी मुस्कान रस्तोगी आणि तिचा प्रियकर साहिल शुक्ला यांना न्यायालयाने दोषी ठरवले आहे. न्यायाधीश अरविंदकुमार मिश्रा यांनी हा निकाल दिला.
शिक्षा काय होणार, हे आता 14 ऑक्टोबरला जाहीर होणार आहे. त्या दिवशी शिक्षेची सुनावणी होईल, अशी तारीख कोर्टाने ठरवली आहे. या सुनावणीच्या वेळी मुस्कान आणि साहिल हे दोघेही व्हिडीओ कॉन्फरन्सिंगच्या माध्यमातून हजर होते.
हे हत्याकांड देशभरात चर्चेचा विषय ठरले होते. पत्नीने प्रियकराच्या मदतीने पतीची हत्या केली आणि त्याचा मृतदेह एका मोठ्या निळ्या ड्रममध्ये सिमेंट टाकून पुरला, असे हे प्रकरण आहे. सौरभ यांचा मृतदेह त्यांच्या घरातील निळ्या ड्रममध्येच सापडला होता. मुस्कान आणि साहिल यांनी सौरभ यांची निर्घृण हत्या केल्यानंतर मृतदेह ड्रममध्ये टाकला आणि वास येऊ नये म्हणून त्यात सिमेंट ओतले. त्यामुळे हे प्रकरण देशभर गाजले.
या खटल्याची सुनावणी जुलै 2025 मध्ये सुरू झाली होती. जवळपास 13 महिने न्यायालयात त्यावर युक्तिवाद झाले. या काळात 126 तारखा पडल्या आणि 22 पेक्षा जास्त साक्षीदारांची साक्ष नोंदवण्यात आली. सौरभ यांच्या कुटुंबाने दोन्ही आरोपींना फाशीची शिक्षा द्यावी, अशी मागणी न्यायालयाकडे केली आहे.
सौरभ यांचा भाऊ राहुल राजपूत यांनी वृत्तसंस्थेशी बोलताना सांगितले की, सुरुवातीपासूनच आम्हाला न्याय मिळेल अशी अपेक्षा होती. त्यांच्या म्हणण्यानुसार, कुटुंबाने सुरुवातीपासून एकच मागणी केली आहे, ती म्हणजे त्यांनी आमच्या भावासोबत जे केले, तेच त्यांच्यासोबत व्हायला हवे. निदान त्यांना फाशी तरी व्हायला हवी, असे ते म्हणाले.
राहुल पुढे म्हणाले की, आम्ही जवळपास दीड वर्षांपासून न्यायासाठी लढत आहोत. भावाच्या हत्येनंतर आमचे रोजचे आयुष्य थांबले आहे. सकाळी 11 वाजता न्यायालयात पोहोचायचे आणि संध्याकाळी 5 वाजता घरी जायचे, हेच आमचे काम झाले आहे. मला आणि माझ्या आईलाही साक्ष द्यायला न्यायालयात बोलावण्यात आले होते.
या प्रकरणात कमीत कमी 22 जणांची साक्ष झाली आहे, असेही राहुल यांनी सांगितले. आपल्या मागणीचा पुनरुच्चार करताना ते म्हणाले की, दोघांना फाशीची शिक्षा होईल अशी आम्हाला सुरुवातीपासून अपेक्षा आहे. जर सत्र न्यायालयाने कमी शिक्षा दिली, तर आम्ही उच्च न्यायालयापासून सर्वोच्च न्यायालयापर्यंत जाऊ, असेही त्यांनी सांगितले.
