बाल सुधार गृहातून पळालेला अल्पवयीन दीड महिन्यानंतर सदर पोलिसांच्या हाती

नागपूर : बाल सुधार गृहातून फरार झालेला आणि हत्येच्या प्रकरणात सहभागी असलेला एक अल्पवयीन मुलगा तब्बल दीड महिन्यानंतर सदर पोलिसांच्या हाती लागला आहे. त्याला मध्य प्रदेशातील बालाघाट जिल्ह्यातील कटंगी येथून पकडण्यात आले आहे.

हा अल्पवयीन मुलगा सदर पोलीस स्टेशनच्या हद्दीत घडलेल्या एका हत्येच्या घटनेत सहभागी होता. त्या प्रकरणानंतर त्याला नागपुरातील कपिल नगर येथील बाल सुधार गृहात ठेवण्यात आले होते.

तो 20 ऑगस्टच्या रात्री आणखी तीन अल्पवयीन मुलांसोबत लघुशंकेला जायचे आहे असे कारण सांगून बाहेर पडला. त्यानंतर खिडकी तोडून हे चौघेही बाल सुधार गृहातून फरार झाले होते. त्यापैकी तिघांना पोलिसांनी याआधीच पकडले होते, मात्र चौथा मुलगा काही केल्या हाती लागत नव्हता.

अखेर तो कटंगी येथे एका नातेवाईकाच्या घरी लपून बसला असल्याची माहिती पोलिसांना मिळाली. त्या माहितीच्या आधारावर सदर पोलिसांनी त्याला पकडले आणि कपिल नगर पोलिसांच्या ताब्यात दिले.