मर्सिडीज-बेंझची GLC 400 इलेक्ट्रिक SUV भारतात लाँच, किंमत 78.50 लाख रुपये, चाकणमध्ये प्रोडक्शन

लक्झरी इलेक्ट्रिक कारच्या मार्केटमध्ये मर्सिडीज-बेंझने मोठी एन्ट्री केली आहे. कंपनीने नवीन मर्सिडीज-बेंझ GLC 400 4Matic ही इलेक्ट्रिक SUV भारतात लाँच केली असून, तिची किंमत 78.50 लाख रुपये (एक्स-शोरूम) ठेवण्यात आली आहे. या गाडीचे प्रोडक्शन पुण्यातील चाकण प्लांटमध्ये सुरू झाले आहे. डिलिव्हरी नोव्हेंबर 2026 च्या मध्यापासून सुरू होणार आहे.

विशेष म्हणजे, ही गाडी MB.EA-M प्लॅटफॉर्मवर आधारित आहे आणि भारतात तयार होणारी कंपनीची या प्लॅटफॉर्मवरची पहिली इलेक्ट्रिक कार आहे. चाकण प्लांटमध्ये तयार होणारी GLC 400 इलेक्ट्रिक ही कंपनीच्या जागतिक प्रोडक्शन नेटवर्कमधील महत्त्वाची गाडी आहे. जर्मनीतील ब्रेमेन प्लांटनंतर पुणे हे या नव्या इलेक्ट्रिक SUV चे प्रोडक्शन करणारे जगातील दुसरे ठिकाण ठरले आहे. गाडीत मर्सिडीज-बेंझ ऑपरेटिंग सिस्टम (MB.OS) दिली आहे. भारतात तयार होणाऱ्या मर्सिडीज-बेंझ गाडीत हे तंत्रज्ञान पहिल्यांदाच मिळत आहे.

महाराष्ट्राचे मुख्यमंत्री देवेंद्र फडणवीस, सुनेत्रा पवार आणि मर्सिडीज-बेंझ ग्रुपचे चेअरमन ओला कॅलेनियस यांच्यासह वरिष्ठ अधिकाऱ्यांच्या उपस्थितीत या प्रोडक्शनची सुरुवात झाली. कंपनीच्या फ्लेक्सिबल प्रोडक्शन लाइनवर पेट्रोल-डिझेल आणि इलेक्ट्रिक अशा दोन्ही प्रकारच्या गाड्या एकाच लाइनवर तयार करता येतात.

GLC 400 इलेक्ट्रिकमध्ये 94 kWh चा बॅटरी पॅक आणि ड्युअल मोटर ऑल-व्हील ड्राइव्ह सेटअप आहे. ही SUV 489 hp पॉवर आणि 800 Nm टॉर्क निर्माण करते. 0 ते 100 kmph वेग गाठायला तिला फक्त 4.3 सेकंद लागतात, तर तिचा टॉप स्पीड 210 kmph आहे.

WLTP प्रमाणानुसार ही इलेक्ट्रिक SUV एका चार्जमध्ये 711 किमीपर्यंत रेंज देते. तिच्यात 800V इलेक्ट्रिकल आर्किटेक्चर असल्यामुळे 330 kW DC फास्ट चार्जिंगला सपोर्ट मिळतो. त्यामुळे बॅटरी 10 ते 80 टक्के चार्ज व्हायला फक्त 22 मिनिटे लागतात. याशिवाय 39.1 इंचांची MBUX स्क्रीन, एअर सस्पेंशन आणि रिअर-व्हील स्टीयरिंगसारखी फीचर्स गाडीत दिली आहेत.

मर्सिडीज-बेंझ GLC 400 इलेक्ट्रिकसाठी 1,000 पेक्षा जास्त बुकिंग मिळाली आहेत. ही SUV मार्च 2027 पर्यंत विकली गेली आहे, असे कंपनीने सांगितले. 2026 मध्ये कंपनीने भारतातील प्रोडक्शन, नवीन गाड्या आणि डिजिटायझेशन यासाठी 200 कोटी रुपयांची अतिरिक्त गुंतवणूक केली आहे. त्यामुळे भारतातील कंपनीची एकूण गुंतवणूक 3,200 कोटी रुपयांवर पोहोचली आहे.

इलेक्ट्रिक कार घेणाऱ्या ग्राहकांना कंपनी आता मोफत AC वॉल बॉक्सऐवजी MB.Charge सार्वजनिक चार्जिंग क्रेडिट देणार आहे. त्यामुळे ही नवीन लक्झरी SUV भारतीय इलेक्ट्रिक कार मार्केटमध्ये कोणते स्थान मिळवते, हे पाहणे महत्त्वाचे ठरेल.