कोमल राणीसोबत लालबागच्या राजाच्या दर्शनाला गेला गोविंदा, नेटकऱ्यांनी उठवले सवाल

बॉलिवूड अभिनेता गोविंदा गेल्या काही दिवसांपासून त्याच्या वैयक्तिक आयुष्यामुळे चर्चेत आहे. काही दिवसांपूर्वी गोविंदा आणि अभिनेत्री कोमल राणी स्वर्णकर यांच्या कथित अफेअरच्या बातम्यांनी जोर धरला होता, आणि आता हे दोघे पुन्हा एकत्र दिसल्यामुळे या चर्चांना पुन्हा उधाण आलं आहे. मंगळवारी संध्याकाळी गोविंदा मुंबईतल्या लालबागच्या राजाच्या दर्शनासाठी पोहोचला, तेव्हा त्याच्यासोबत कोमल राणीही होती.

लालबागच्या राजाच्या मंडपात गोविंदा आणि कोमल राणी यांनी बाप्पाचं दर्शन घेतलं. दोघांनी प्रसाद अर्पण केला आणि पूजेतही सहभाग घेतला, तेव्हा पुजाऱ्यांनी त्यांच्या कपाळावर टिळा लावला. दर्शन घेऊन बाहेर आल्यावर गोविंदाने तिथे जमलेल्या चाहत्यांना हात दाखवत त्यांच्याशी संवाद साधला. यावेळी तो आनंदी आणि हसतमुख दिसत होता. गोविंदा आणि कोमल राणी एकत्र दर्शन घेत असल्याचा हा व्हिडीओ सध्या सोशल मीडियावर व्हायरल होत असून, त्यामुळे त्यांच्या कथित जवळिकीबाबत पुन्हा चर्चा सुरू झाली आहे.

ऑगस्ट महिन्यात गोविंदा आणि कोमल राणी विमानतळावर एकत्र दिसले होते, आणि तेव्हापासूनच दोघांच्या नात्याबाबतच्या चर्चांना जोर आला होता. त्याच काळात गोविंदाची पत्नी सुनीता आहुजा यांनी पापाराझींशी बोलताना गोविंदा आणि कोमल राणी यांच्या कथित अफेअरबाबत वक्तव्य केल्याचं समोर आलं होतं. सुनीता यांनी गोविंदासोबत कोमल राणीच्या जवळिकीवर नाराजी व्यक्त केली होती, आणि आपल्या मुलीच्या वयाच्या मुलीसोबत फिरण्यावरून गोविंदाला टोमणाही मारला होता. या सगळ्या चर्चांनंतर दोघांच्या वैवाहिक नात्याबाबतही प्रश्न उपस्थित झाले होते. मात्र, नंतर सुनीता आहुजा यांनी घटस्फोटाची याचिका मागे घेतल्याचं सांगण्यात आलं.

गोविंदा आणि कोमल राणीचा व्हिडीओ व्हायरल झाल्यानंतर सोशल मीडियावर नेटकऱ्यांनी वेगवेगळ्या प्रतिक्रिया दिल्या आहेत. काही युजर्सनी गोविंदावर टीका केली, तर काहींनी सुनीता आहुजांना पाठिंबा दिला. एका युजरने कमेंट करत लिहिलं, "जे आपल्या पत्नीला त्रास देतात, त्यांची प्रार्थना देवसुद्धा ऐकत नाही." तर दुसऱ्या एका युजरने सुनीता आहुजांना उद्देशून, "सुनीताजी, आम्ही तुमच्यासोबत आहोत," अशी कमेंट केली.

एका युजरने थेट सवाल केला, "त्याने या बाईशी लग्न केलं आहे का?" तर आणखी एका कमेंटमध्ये लिहिलं होतं, "सुनीता मॅडम कुठे आहेत? तुम्ही त्याच्यासोबत दर्शनासाठी यायला हवं होतं; तुम्ही अजूनही त्याच्याशी विवाहित आहात." गोविंदा आणि कोमल राणी यांच्यात नेमकं काय नातं आहे, याबाबत अजून दोघांकडूनही कुठलंही अधिकृत स्पष्टीकरण आलेलं नाही. मात्र लालबागच्या राजाच्या दर्शनाचा हा व्हिडीओ समोर आल्यानंतर या चर्चांना पुन्हा एकदा हवा मिळाली आहे.