कोकणासह राज्यातील काही भागांत विजांच्या कडकडाटासह पावसाची शक्यता; हवामान विभागाचा अलर्ट

गेल्या काही दिवसांपासून राज्यातील वातावरणात कमालीचा बदल जाणवत आहे. अनेक भागांत 'ऑक्टोबर हीट'चा तडाखा बसत असून, उकाड्यामुळे नागरिक हैराण झाले आहेत. मान्सून आता परतीच्या प्रवासाला लागला आहे. अशा वेळी कोकणासह राज्यातील काही जिल्ह्यांमध्ये आज विजांच्या कडकडाटासह पाऊस पडण्याची शक्यता आहे. यासाठी हवामान विभागाने 'यलो अलर्ट' दिला आहे.

कोकणात पावसाचा अंदाज आहे. विदर्भातील गडचिरोली जिल्ह्यातही हवामान काहीसे अस्थिर राहण्याची शक्यता आहे. तिथे विजांच्या कडकडाटासह वादळी पाऊस होईल, असा अंदाज वर्तवण्यात आला आहे. त्यामुळे गडचिरोली जिल्ह्याला येलो अलर्ट देण्यात आला आहे. विशेषतः दुपारनंतर किंवा संध्याकाळच्या सुमारास वातावरण अचानक बदलू शकते.

राज्यातील अनेक भागांत पावसाने काहीशी विश्रांती घेतली आहे. दुसरीकडे उन्हाचा चटका आणि उकाडा वाढू लागला आहे. सध्या राज्यात ऑक्टोबर हीटचा प्रभाव जाणवू लागला आहे. अशा वेळी काही जिल्ह्यांत आज विजांच्या कडकडाटासह पाऊस पडण्याची शक्यता असल्याने थोडा दिलासा मिळू शकतो.

कोल्हापुरातही विजांसह पावसाची शक्यता

कोकणातील सिंधुदुर्ग आणि पश्चिम महाराष्ट्रातील कोल्हापूर या जिल्ह्यांमध्येही विजांसह पावसाची शक्यता आहे. काही ठिकाणी ढगाळ वातावरण तयार होऊन हलक्या ते मध्यम स्वरूपाच्या सरी कोसळू शकतात. राज्यातील उरलेल्या भागात मात्र आकाश निरभ्र राहण्याची शक्यता आहे.

तापमानात वाढ

सध्या पावसाचे प्रमाण कमी झाल्यामुळे दिवसाच्या तापमानात वाढ होत असल्याचे दिसत आहे. आता उन्हाचा चटका अधिक जाणवू शकतो, तसेच वातावरणातला उकाडाही वाढण्याची शक्यता आहे. एकीकडे कडक ऊन आणि दुसरीकडे पावसाची शक्यता असल्याने पुढचे काही दिवस हवामानात चढ-उतार कायम राहण्याची शक्यता आहे. नागरिकांनी स्थानिक हवामानाचा अंदाज लक्षात घेऊन आवश्यक ती खबरदारी घ्यावी, असे आवाहन हवामान विभागाने केले आहे.

पुण्यात ऑक्टोबर हीटचा तडाखा

ऑक्टोबर महिन्याच्या सुरुवातीलाच पुणे शहरात उष्णतेचा चटका तीव्रतेने जाणवू लागला आहे. गेल्या काही दिवसांपासून शहरातील कमाल आणि किमान तापमानात सातत्याने वाढ होत आहे. पुणेकरांना आता ऑक्टोबर हीटचा थेट सामना करावा लागत आहे. सोमवारी (५ ऑक्टोबर) शहरात कमाल तापमान ३५ अंश सेल्सिअस, तर किमान तापमान १९.७ अंश सेल्सिअस नोंदवले गेले.

एकूणच, एकीकडे पुण्यासारख्या शहरांत उन्हाचा चटका आणि उकाडा वाढत आहे, तर दुसरीकडे कोकण, गडचिरोली, सिंधुदुर्ग आणि कोल्हापूर या भागांत विजांसह पावसाची शक्यता असल्याने हवामानाचे हे दोन्ही रंग पुढचे काही दिवस दिसू शकतात, असे सध्याच्या अंदाजावरून दिसते.