घोषणेनंतर आठवडाभरातच करंजीत मंदिराच्या कामाला सुरुवात

गोंडपिपरी तालुक्यातील करंजी गावात नवीन मंदिराच्या बांधकामाला २८ सप्टेंबरपासून प्रत्यक्ष सुरुवात झाली. भूमिपूजन करून कामाची सुरुवात करण्यात आली. या कामाची घोषणा आठवडाभरापूर्वी, म्हणजे २१ सप्टेंबर रोजी गावसभेत करण्यात आली होती. घोषणा झाल्यानंतर आठवडाभरातच प्रत्यक्ष काम सुरू झाले आहे.

ही घोषणा सामाजिक कार्यकर्ते प्रदीप खोब्रागडे यांच्या पुढाकाराने झाली होती. करंजी गावाच्या सर्वांगीण विकासासाठी त्यांनी आठवड्यापूर्वी शब्द दिला होता. तो शब्द पूर्ण करत त्यांनी मंदिराच्या कामाला सुरुवात करून दिली.

तालुक्यातील करंजी हे धार्मिक, सामाजिक आणि सांस्कृतिकदृष्ट्या महत्त्वाचे गाव आहे. गावात नवीन मंदिर बांधले जावे, अशी ग्रामस्थांची अनेक वर्षांपासूनची मागणी होती. गावकऱ्यांची ही धार्मिक मागणी लक्षात घेऊन खोब्रागडे यांनी गावसभेत मंदिराच्या बांधकामासाठी लागणारी सर्व मदत करण्याचे आश्वासन दिले होते.

२१ सप्टेंबरला केलेल्या घोषणेप्रमाणे २८ सप्टेंबरला भूमिपूजनानंतर मंदिराच्या कामाला सुरुवात झाली. त्या वेळी करंजीतील ग्रामस्थांनी मोठ्या उत्साहाने त्यात सहभाग घेतला. या उपक्रमामुळे गावात नवीन मंदिर उभे राहील आणि गावाच्या धार्मिक, सामाजिक व सांस्कृतिक वातावरणात आणखी भर पडेल, असे ग्रामस्थांचे मत आहे.

यावेळी सामाजिक कार्यकर्ते प्रदीप खोब्रागडे म्हणाले, "गावाचा विकास हे माझे वैयक्तिक नाही तर सामूहिक ध्येय आहे. मंदिर हे केवळ धार्मिक स्थळ नसून गावाच्या एकतेचे, श्रद्धेचे आणि संस्कृतीचे केंद्र आहे. ग्रामस्थांच्या आशीर्वादाने हे काम यशस्वीरीत्या पूर्ण करू."

मंदिराच्या भूमिपूजनाच्या कार्यक्रमाला सुमन जेंगठे, कमल रामगीरवार, रेखा राठोड, सिंधू मोहुर्ले, तारा पचारे, माया आत्राम, झाराबाई चांदेकर, वंदना खोब्रागडे, मनिषा भोयर, वासुदेव मांदाळे, आबाजी मोहूर्ले, सुशील मांदाळे, विशाल कोडापे, अजय चावटकर, अंकुश गोहणे, गणपत जुवारे, बंडू का यांच्यासह गावातील महिला आणि पुरुष उपस्थित होते.

खोब्रागडे यांनी आपल्या भावना पुढे मांडल्या. करंजी गावातील मंदिर हे केवळ धार्मिक पूजास्थळ नाही, तर आपल्या संस्कृतीचे, एकतेचे आणि ग्रामविकासाचे प्रतीक आहे, असे ते म्हणाले. ग्रामस्थांच्या सहकार्याने हे मंदिर निश्चितच सर्वांच्या आध्यात्मिक उन्नतीचे केंद्र ठरेल, असा विश्वास त्यांनी व्यक्त केला.

"दिलेला शब्द, केला पूर्ण" या भावनेने कामाचे भूमिपूजन झाले असून आता मंदिराचे काम गतीने पूर्ण करण्यासाठी सर्वांनी एकजुटीने पुढे यावे, असे आवाहन करंजी येथील सामाजिक कार्यकर्ते प्रदीप खोब्रागडे यांनी केले.