झी मराठी अवॉर्ड्स २०२६मध्ये इला भाटे यांचा जीवनगौरव पुरस्काराने गौरव

झी मराठी अवॉर्ड्स २०२६ या सोहळ्यात मराठी मनोरंजनविश्वातील ज्येष्ठ अभिनेत्री इला भाटे यांना प्रतिष्ठेचा जीवनगौरव पुरस्कार देण्यात आला. अनेक दशकांचा अभिनयप्रवास, सहजसुंदर अभिनय, प्रभावी आवाज आणि अजरामर व्यक्तिरेखा यांच्या जोरावर त्यांनी प्रेक्षकांच्या मनात खास जागा मिळवली आहे. पुरस्कार स्वीकारताना आजवरच्या वाटचालीच्या आठवणी जागवत त्या भावुक झाल्या. हा आनंदाचा क्षण पाहण्यासाठी आई हवी होती, अशी भावना त्यांनी बोलून दाखवली.

इला भाटे यांनी अनेक पिढ्यांशी आपल्या अभिनयातून नातं जोडलं. 'असंभव'मधील वसुधा शास्त्री, 'का रे दुरावा'मधील आऊ आणि 'राधा ही बावरी'मधील डॉ. सई प्रधान अशा वेगवेगळ्या भूमिकांमधून त्यांनी प्रेक्षकांची मनं जिंकली. 'एका लग्नाची दुसरी गोष्ट'मध्ये 'घना'साठी मारलेली हाकही प्रेक्षकांच्या लक्षात राहिली. त्यांच्या व्यक्तिरेखांमध्ये अनेकांना आई, आजी किंवा घरातली एखादी हक्काची व्यक्ती दिसली. त्यामुळेच त्यांच्या अभिनयाचा आणि माणुसकीचा ठसा प्रेक्षकांच्या मनावर उमटला आहे.

अभिनयात येण्याआधी शैक्षणिक क्षेत्रात करिअर करण्याचा त्यांचा विचार होता. पण रंगभूमीने त्यांना आपल्याकडे ओढून घेतलं. सुरुवातीच्या काळात त्यांच्या आवाजावर टीकाही झाली. तरीही डॉ. अशोक रानडे यांचं 'शब्दांशी खेळा, त्यावर प्रेम करा. शब्द हे अभिनयाचं गर्भारूप आहे' हे मार्गदर्शन त्यांनी लक्षात ठेवलं. याच आवाजाला त्यांनी स्वतःची ओळख बनवलं.

पुरस्कार स्वीकारतानाच्या भावना सांगताना इला भाटे म्हणाल्या, "जेव्हा मी स्टेजवर हा जीवनगौरव पुरस्कार स्वीकारला आणि माझ्या आजवरच्या प्रवासाचा व्हिडिओ पाहत होते, तेव्हा मन आनंद, समाधान आणि कृतज्ञतेने भरून गेलं होतं. एवढी वर्षं आपण काम केलं, याचं मलाच आश्चर्य वाटत होतं. माझ्या गुरूंनी नेहमी सांगितलं होतं की, सातत्याने काम करत राहा. त्या क्षणी त्यांच्या शब्दांची आठवण झाली. माझ्या या प्रवासात ज्यांनी ज्यांनी मला साथ दिली, त्या सगळ्यांची आठवण झाली आणि मी मनोमन त्यांना नमस्कार केला."

त्या पुढे म्हणाल्या, "या सगळ्या भावनांमध्ये सगळ्यात जास्त आठवण आली ती माझ्या आईची. हा क्षण पाहण्यासाठी आज माझी आई हवी होती, असं मनापासून वाटलं. जीवनगौरव पुरस्कार म्हणजे आजवर केलेल्या कामाची पोचपावती, प्रेक्षकांची पसंती आणि त्यांच्याकडून मिळालेली शाबासकी आहे. पण त्याचबरोबर यापुढेही असंच चांगलं काम करत राहण्याची अपेक्षा आणि त्यासाठी मिळणारी नवी ऊर्जा आहे."

सध्या इला भाटे झी मराठीवरील 'कमळी' मालिकेत आजीची महत्त्वाची भूमिका करत आहेत. या भूमिकेला प्रेक्षकांचा जो प्रतिसाद मिळतोय, त्याबद्दल त्यांनी समाधान व्यक्त केलं. भूतकाळातील कामाइतकंच आपण आज काय करतोय आणि पुढे काय करू शकतो, हेही महत्त्वाचं आहे, असं त्यांनी सांगितलं.

'सनई चौघडे' मालिकेत शर्वरीची भूमिका करणाऱ्या चिन्मयी साळवी यांनी झी मराठी अवॉर्ड्स २०२६मध्ये पहिल्यांदाच सर्वोत्कृष्ट अभिनेत्रीचा पुरस्कार पटकावला. आनंद व्यक्त करताना त्या म्हणाल्या, "एका मोठ्या मंचावर आपल्या कामाची दखल घेतली जातेय, याचा आनंद होता. त्याचबरोबर मनात उत्सुकता आणि थोडी धाकधूकही होती. 'सनई चौघडे' या मालिकेला आणि माझ्या भूमिकेला प्रेक्षकांचं जे प्रेम मिळत आहे, त्यामुळे हा अनुभव आणखी खास झाला."

लहानपणी पुरस्कार सोहळे पाहताना एक दिवस आपणही अशा मंचावर नृत्य सादर करावं, असं त्यांना वाटायचं. यंदा झी मराठीमुळे ते स्वप्न पूर्ण झालं. ट्रॉफी हातात घेतल्यावर आजवरचा प्रवास डोळ्यांसमोर आल्याचंही त्यांनी सांगितलं. घरी गेल्यावरच्या स्वागताबद्दल चिन्मयी म्हणाल्या, "मी ट्रॉफी घेऊन घरी गेले, तेव्हा माझे काका, बाबा, काकी, आई, भाची, दादा आणि वहिनी या सगळ्यांनी माझं खूप छान स्वागत केलं. सगळे नाचत होते. अगदी ट्रॉफी डोक्यावर घेऊनही नाचत होते! ते पाहून मला खूप आनंद झाला. खरं सांगायचं तर, पुरस्कार मिळाल्याचा आनंद होताच; पण माझ्या घरच्यांचा आनंद पाहून मला त्याहून जास्त आनंद झाला." हा पुरस्कार त्यांनी कुटुंबीयांसह 'सनई चौघडे'च्या संपूर्ण टीमला आणि आपल्यावर प्रेम करणाऱ्या प्रेक्षकांना समर्पित केला.

याच मालिकेत जयची भूमिका करणाऱ्या राज हंचनाळे यांनीही सोहळ्यातला अनुभव सांगितला. मालिकेला सर्वोत्कृष्ट मालिकेचा पुरस्कार मिळाल्याबद्दल ते म्हणाले, "झी मराठी अवॉर्ड्सचा अनुभव माझ्यासाठी खूपच सुंदर होता. या सोहळ्यामुळे अनेक जुन्या आठवणी पुन्हा ताज्या झाल्या. झी मराठीसोबतचं माझं नातं खूप जुनं आहे. २०१६ पासूनच्या आठवणी आणि आजवरचा संपूर्ण प्रवास माझ्या डोळ्यांसमोर आला. अशा मोठ्या सोहळ्याचा भाग होता येणं ही माझ्यासाठी अभिमानाची आणि आनंदाची गोष्ट आहे."

ते पुढे म्हणाले, "मुंबईतील एका १० बाय १० च्या खोलीत राहून पाहिलेलं स्वप्न आज पूर्ण झाल्यासारखं वाटलं. मराठी मनोरंजनविश्वातील इतक्या दिग्गज कलाकारांसमोर सादरीकरण करणं हा खूपच उत्साहाचा अनुभव होता. माझ्यासाठी सगळ्यात खास क्षण म्हणजे 'सनई चौघडे' मालिकेला मिळालेला सर्वोत्कृष्ट मालिकेचा पुरस्कार. इतक्या दिवसांपासून संपूर्ण टीम घेत असलेल्या मेहनतीचं चीज झालं, असं वाटलं."

इला भाटे यांचा प्रदीर्घ अभिनयप्रवास, चिन्मयी साळवी यांचा पहिला सर्वोत्कृष्ट अभिनेत्री पुरस्कार आणि 'सनई चौघडे'च्या टीमचा सर्वोत्कृष्ट मालिकेचा सन्मान, अशा अनेक खास क्षणांमुळे झी मराठी अवॉर्ड्स २०२६चा सोहळा कलाकारांसाठी आणि प्रेक्षकांसाठीही संस्मरणीय ठरला.