जामीन फेटाळला गेलेल्या सौरव दास, आशुतोष रांका यांच्यासाठी अभिजीत दिपके भावूक

कॉकरोच जनता पार्टीचे प्रवक्ते सौरव दास आणि आशुतोष रांका हे गेल्या सहा ते आठ दिवसांपासून तुरुंगात आहेत. जंतरमंतरवर आंदोलन केल्याप्रकरणी त्यांना ही कोठडी झाली आहे. केंद्रीय निवडणूक आयुक्तांच्या कथित मनमानी कारभार आणि गैरव्यवहारांविरोधात, तसेच त्यांच्या राजीनाम्याच्या मागणीसाठी त्यांनी जंतरमंतरवर गनिमी काव्याने आंदोलन केले होते. दिल्ली पोलिसांनी त्यांना अटक केली आणि तुरुंगात टाकले.

काल झालेल्या सुनावणीतही सौरव आणि आशुतोष यांची जामीन याचिका फेटाळण्यात आली. त्यामुळे या दोघांच्या अडचणी वाढणार असल्याची चर्चा आहे.

या घडामोडींनंतर पार्टीचे प्रमुख अभिजीत दिपके आपल्या दोन सहकाऱ्यांसाठी भावूक झाल्याचे दिसले. त्यांनी सोशल मीडियावर एक व्हिडिओ पोस्ट केला आहे. मुख्य निवडणूक आयुक्तांविरोधात सुरू असलेल्या आंदोलनाला दिपके यांनी सध्या ब्रेक लावला आहे. आंदोलकांना घरी जाण्याचे आवाहनही त्यांनी केले आहे.

व्हिडिओमध्ये दिपके यांनी सौरव आणि आशुतोष यांच्याशी झालेल्या संवादाची आठवण सांगितली. ते म्हणाले, "तुरुंगात जाण्याच्या शक्यतेबद्दल आणि कोण जास्त काळ तुरुंगात राहू शकेल यावर आमची अनेकदा चर्चा झाली आहे. सौरव म्हणत होता की मी तुरुंगात एक दिवसही टिकू शकणार नाही. पण तो गेल्या सहा दिवसांपासून तुरुंगात आहे."

दिपके यांनी पुढे म्हटले, "जूनमध्ये जंतर-मंतरवर सुरू झालेल्या आंदोलनादरम्यान त्याला सुरुवातीला खूप मृदू स्वभाव आणि कोल्ड कॉफी प्यायल्यामुळे ट्रोल करण्यात आले होते, पण आता त्याच्याकडे बघा, तो तिरंगा फडकावत हसत तुरुंगात गेला. मी फक्त त्यांच्या सुचनांचे पालन केले. पण प्रत्यक्षात मात्र या दोघांनीही ही चळवळ पुढे नेली आणि त्यांनी ज्या धैर्याने आणि आत्मविश्वासाने नेतृत्व केले त्यामुळे मलाही मोठे बळ मिळाले."

फ्रान्समध्ये सुरू असलेली अशांतता आणि सीजेपी आंदोलन यांची तुलना करणाऱ्यांवर दिपके यांनी निशाणा साधला. दोन्ही परिस्थिती पूर्णपणे वेगळ्या असल्याचे त्यांनी स्पष्ट केले. ते म्हणाले, "भारतात आशुतोष आणि सौरव हसत हसत तुरुंगात गेले. पण फ्रान्समध्ये जे घडत आहे, आम्ही तसे काहीही केले नाही. पण त्यांना चुकीच्या पद्धतीने तुरुंगात टाकण्यात आले आहे हे कळल्यावर त्यांनी शांततेचा मार्ग निवडला. आशु आणि सौरव सत्याग्रह करत आहेत, हे दोघेही लवकरच तुरुंगातून बाहेर येतील तेव्हा संपूर्ण देश त्यांना सलाम करेल."

आपल्या भावुक होण्याबद्दलही दिपके यांनी सांगितले. ते म्हणाले, "आता काही लोकांना ते बघून वाटेल, मी भावूक झालो आहे, बघा याने लोकांना कसे रडवले. पण आमच्या भावना ही आमची कमजोरी नाही. मी यावेळी भावूक होतो कारण सौरव आणि आशुतोष हे माझे भाऊ आहेत. मी त्यांची काळजी काळजी. हे माझे त्यांच्यावरचे प्रेम आहे. मी तुम्हा लोकांना घाबरत नाही, दोन दिवस तुरुंगात ठेवले, तरीही मला तुमची भीती वाटत नाही."