जे. जे. रुग्णालयात देशातील पहिले 'हाना' टेबल दाखल होणार; दसऱ्याला उद्घाटन

भायखळा येथील ग्रँट शासकीय वैद्यकीय महाविद्यालय आणि सर जे. जे. समूह रुग्णालयाच्या अस्थिरोग विभागात मंगळवारपासून एक अत्याधुनिक हाना टेबल दाखल होणार आहे. हाडांच्या आजारांवरील आधुनिक उपचारांना चालना मिळावी, यासाठी हे टेबल आणण्यात आले आहे. हिप रिप्लेसमेंटसाठी उपयोगी पडणारे कोट्यवधी रुपयांचे हे टेबल देशातील पहिले ठरले असून, हा मान सर जे. जे. रुग्णालयाला मिळाला आहे.

हे टेबल रुग्णालयाला दान स्वरूपात मिळाले आहे. सर जे. जे. रुग्णालयाचे सर्वात जुने माजी विद्यार्थी डॉ. खुसरू पटेल आणि अमेरिकेत कार्यरत असलेले त्यांचे सुपुत्र डॉ. शिराझ पटेल यांनी 'ग्राम सेवा ट्रस्ट'मार्फत ते रुग्णालयाला दिले आहे. रुग्णालयाचे अधिष्ठाता डॉ. अजय भंडारवार, वैद्यकीय अधीक्षक डॉ. संजय सुरासे आणि अस्थिरोग विभागाचे प्रमुख डॉ. नादिर शाह यांच्या मार्गदर्शनाखाली हे टेबल जे. जे. रुग्णालयात आणण्यात आले आहे.

मंगळवारी दसऱ्याच्या दिवशी या टेबलचे उद्घाटन होणार आहे. या कार्यक्रमाला नगरसेवक मकरंद नार्वेकर प्रमुख पाहुणे म्हणून उपस्थित राहणार आहेत. हे टेबल रुग्णसेवेत दाखल व्हावे म्हणून नगरसेवक नार्वेकर यांनी रुग्णालय प्रशासनाला मोलाची मदत केली आहे, असे सांगण्यात आले.

या टेबलच्या मदतीने डायरेक्ट अँटेरिअर अॅप्रोच या आधुनिक पद्धतीने टोटल हिप रिप्लेसमेंट शस्त्रक्रिया करणे सोपे होणार आहे. या पद्धतीत स्नायूंना कमीत कमी इजा होते, त्यामुळे रुग्णांना लवकर हालचाल सुरू करायला मदत होऊ शकते, असे सांगण्यात आले.

दुसरीकडे, लोकांचे आयुर्मान वाढत आहे, सांध्यांची झीज होते आहे आणि हिप फ्रॅक्चरचे प्रमाणही वाढत आहे. या सगळ्यामुळे हिप रिप्लेसमेंट शस्त्रक्रियांची गरज वाढत चालली आहे. अशा वेळी शासकीय रुग्णालयात हे अत्याधुनिक उपकरण उपलब्ध झाल्याने आधुनिक उपचारपद्धतींचा प्रसार होईल. निवासी डॉक्टरांना प्रशिक्षण देण्यासाठी आणि सर्वसामान्य रुग्णांना प्रगत उपचार उपलब्ध करून देण्यासाठी याची मोलाची मदत होणार आहे, असे सांगण्यात आले.

डॉ. खुसरू पटेल आणि डॉ. शिराझ पटेल यांच्या या दातृत्वामुळे जे. जे. रुग्णालयाच्या अस्थिरोग विभागातील आधुनिक उपचार सुविधांमध्ये महत्त्वाची भर पडली आहे. जे. जे. रुग्णालयाचे सर्वात जुने माजी विद्यार्थी आणि त्यांच्या सुपुत्राने दिलेले हे टेबल आता मंगळवारपासून अस्थिरोग विभागात दाखल होणार आहे.