IND vs NZ: भारताविरुद्धच्या मालिकेसाठी न्यूझीलंडने जाहीर केला १६ जणांचा संघ
रचिन रवींद्र दुखापतीमुळे मालिकेतून बाहेर, तर ॲडम मिल्नेचे जवळपास एका वर्षानंतर संघात पुनरागमन.
भारत आणि न्यूझीलंड यांच्यातील पाच सामन्यांची टी-२० मालिका २२ ऑक्टोबरपासून सुरू होणार आहे. या मालिकेसाठी भारतीय संघ न्यूझीलंडचा दौरा करणार असून, यजमान न्यूझीलंड क्रिकेट संघाने आपल्या १६ सदस्यीय संघाची घोषणा केली आहे. या मालिकेसाठी मिचेल सँटनरकडे कर्णधारपद सोपवण्यात आले आहे.
न्यूझीलंडचा स्टार खेळाडू रचिन रवींद्र दुखापतीमुळे संपूर्ण मालिकेतून बाहेर पडला आहे. त्याच्याचबरोबर वेगवान गोलंदाज बेन सियर्स देखील घोट्याच्या दुखापतीमुळे या मालिकेला मुकणार आहे. दुसरीकडे, वेगवान गोलंदाज ॲडम मिल्नेचे जवळपास एका वर्षानंतर संघात पुनरागमन झाले आहे. मिल्नेने याआधी जुलै २०२५ मध्ये दक्षिण आफ्रिकेविरुद्ध आपला शेवटचा टी-२० आंतरराष्ट्रीय सामना खेळला होता, त्यानंतर आता तो पुन्हा एकदा टी-२० आंतरराष्ट्रीय सामना खेळणार आहे.
न्यूझीलंडच्या १६ सदस्यीय टी-२० संघात टी-२० विश्वचषकात खेळलेल्या १३ माजी खेळाडूंचा समावेश करण्यात आला आहे. फिरकी अष्टपैलू मायकल ब्रेसवेल हा देखील दुखापतीतून सावरल्यानंतर संघात परतला आहे. मधल्या फळीत फलंदाजीचा पर्याय म्हणून बेवॉन जेकब्सला संघात स्थान देण्यात आले आहे. जेकब्सने आतापर्यंत ११ टी-२० आंतरराष्ट्रीय सामने खेळले असून, त्याच्या शेवटच्या सामन्यात बांगलादेशविरुद्ध नाबाद ६२ धावांची खेळी केली होती.
मिल्नेला या पाच सामन्यांच्या टी-२० मालिकेसाठी एका मजबूत वेगवान गोलंदाजी फळीत स्थान देण्यात आले आहे. या फळीत लॉकी फर्ग्युसन, मॅट हेन्री, काईल जेमिसन, जेकब डफी, जॅक फॉल्क्स आणि नॅथन स्मिथ यांचाही समावेश आहे. म्हणजेच वेगवान गोलंदाजीत न्यूझीलंडकडे अनेक पर्याय उपलब्ध असणार आहेत.
भारत विरुद्ध न्यूझीलंड टी-२० आंतरराष्ट्रीय मालिकेतील पहिला सामना २२ ऑक्टोबर रोजी क्राइस्टचर्च येथे होणार आहे, तर दुसरा सामना २४ ऑक्टोबर रोजी त्याच ठिकाणी खेळला जाईल. तिसरा सामना २७ ऑक्टोबर रोजी वेलिंग्टनमध्ये, चौथा सामना ३० ऑक्टोबर रोजी ऑकलंडमध्ये आणि पाचवा व अंतिम सामना १ नोव्हेंबर रोजी हॅमिल्टनमध्ये होणार आहे. ही टी-२० मालिका संपल्यानंतर दोन्ही संघांदरम्यान ४ नोव्हेंबरपासून पाच एकदिवसीय सामन्यांची मालिका सुरू होईल.
भारताविरुद्धच्या या टी-२० मालिकेसाठी न्यूझीलंडचा संघ पुढीलप्रमाणे आहे: मिचेल सँटनर (कर्णधार), फिन ऍलन, मायकल ब्रेसवेल, मार्क चॅपमन, डेव्हन कॉनवे, जेकब डफी, लॉकी फर्ग्युसन, जॅक फोक्स, मॅट हेन्री, काईल जेमिसन, ऍडम मिल्ने, डॅरिल मिचेल, ग्लेन फिलिप्स, टिम सेफर्ट आणि नॅथन स्मिथ.
