हिरो डेस्टिनी 110 चा क्लासिक एडिशन बाजारात, किंमत 76400 रुपये

सणासुदीच्या दिवसांत देशातील आघाडीची दुचाकी उत्पादक कंपनी हिरो मोटोकॉर्पने आपल्या लोकप्रिय फॅमिली स्कूटरच्या गटात एक नवे मॉडेल आणले आहे. कंपनीने डेस्टिनी 110 स्कूटरचा नवा क्लासिक एडिशन (Classique Edition) भारतीय बाजारात लॉन्च केला आहे. दिल्लीतील एक्स-शोरूमनुसार या एडिशनची किंमत 76400 रुपये ठेवली आहे.

या विशेष मॉडेलला नियो-रेट्रो स्टायलिंग दिले आहे. आकर्षक ड्युअल-टोन रंगसंगती आणि आधुनिक फीचर्स यांचा चांगला मेळ यात दिसतो. रस्त्यावर वेगळी ओळख मिळावी म्हणून डिझाईनमध्ये खास बदल केले आहेत.

स्कूटर दोन नव्या ड्युअल-टोन रंगांत मिळते. पहिला पर्याय 'मॅट गोल्डफिश सिल्व्हर / लाईट इंडस्ट्रियल ग्रे' असून त्यात ब्राऊन इनर पॅनल्स आहेत. दुसरा पर्याय 'मॅट एरिज ब्राऊन' असून त्यात ब्लॅक इनर पॅनल्स आहेत.

स्टायलिंग पॅकेजमध्ये फ्रंट हँडल कव्हर आणि साईड पॅनल्सवर स्ट्राईप्स, बॉडी-कलर मिरर्स, इनर पॅनल्सशी जुळणारी सीट आणि ब्रँडेड रिम टेप आहे. स्कूटरवर 3डी 'क्लासिक एडिशन' एम्बलम किंवा बॅज आहे, त्यामुळे ती रेग्युलर मॉडेलपेक्षा अधिक प्रीमियम आणि स्टायलिश दिसते.

इंजिनच्या बाबतीत डेस्टिनी 110 मधलेच 110.9 सीसी, एअर-कूल्ड, सिंगल-सिलेंडर इंजिन यात आहे. हे इंजिन 7250 आरपीएमवर 8.15 पीएस पॉवर आणि 5750 आरपीएमवर 8.7 एनएम टॉर्क देते. सोबत ऑटोमॅटिक सीव्हीटी ट्रान्समिशन जोडले आहे.

हिरोच्या पेटंटेड i3S (आइडल स्टॉप-स्टार्ट) टेक्नॉलजीशीही हे इंजिन जोडले आहे. ट्रॅफिकमध्ये किंवा थांबलेले असताना इंजिन बंद करून पुन्हा सुरू करण्यास ही यंत्रणा मदत करते. रोजच्या प्रवासात स्कूटरची फ्यूल-एफिशिएंसी (मायलेज) वाढवण्यासाठी ती उपयुक्त ठरते.

कुटुंबाच्या प्रवासाचा विचार करून हिरोने या स्कूटरमध्ये अनेक प्रॅक्टिकल आणि आधुनिक फीचर्स दिली आहेत. यात 785 एमएम लांबीची सीट आहे. ही या सेगमेंटमधली सर्वात लांब सीट असल्याचा कंपनीचा दावा आहे, त्यामुळे लांबचा प्रवासही आरामदायक होतो.

सुरळीत प्रवासासाठी दोन्ही बाजूंना 12 इंचाचे अलॉय व्हील्स आणि मागे रुंद 100/80-12 आकाराचे टायर आहेत. सीटखाली 19 लिटरची मोठी अंडर-सीट स्पेस आहे. पुढच्या भागात मोबाईल चार्जिंग सॉकेटसह स्टोरेज बॉक्स आहे. अंधारात सामान काढता यावे म्हणून बूट लॅम्प दिला आहे.

सेफ्टी आणि चांगल्या व्हिजिबिलिटीसाठी एलईडी प्रोजेक्टेड हेडलाईट, एलईडी टेल लॅम्प आणि पोझिशन लॅम्प आहेत. स्कूटरमध्ये क्रोम फिनिशिंगसह डिजिटल-अॅनालॉग इन्स्ट्रुमेंट कन्सोलही मिळतो.