हिमाचलमध्ये खून करून मुंबईकडे निघालेल्या चौघांना जळगावात शनिपेठ पोलिसांनी घेतले ताब्यात

हिमाचल प्रदेशात एकाचा खून करून मुंबईच्या दिशेने निघालेल्या चार आरोपींचा प्रवास जळगावातच थांबला. शनिपेठ पोलिसांनी त्यांना ताब्यात घेतले आहे. प्रवासात पैसे संपल्यामुळे मोबाईल विकण्यासाठी हे आरोपी जळगावात उतरले होते. हिमाचल प्रदेश पोलिसांनी त्यांचे लोकेशन जळगाव पोलिसांना कळवले होते आणि ही माहिती मिळताच शनिपेठ पोलिसांनी शोधमोहीम राबवली.

या प्रकरणात हिमाचल प्रदेशातील मुकेश कुमार यांच्या खुनाबद्दल एफआयआर क्रमांक ८२/२०२६ अन्वये, ३० सप्टेंबर २०२६ रोजी गुन्हा दाखल आहे. प्राथमिक माहितीनुसार, मुकेश कुमार आणि आरोपी एकत्र दारू पीत होते. त्या वेळी बहिणीवरून शिवीगाळ केल्याच्या कारणावरून त्यांच्यात वाद झाला. त्यानंतर आरोपींनी हल्ला करून मुकेश कुमार यांचा खून केला, अशी माहिती हिमाचल पोलिसांनी दिली.

घटनेनंतर आरोपी सकाळी सुमारे ११ वाजता किसंपूर येथून निघाले. ते अंबाला येथे पोहोचले आणि तिथून दुपारी ४.३० वाजता मुंबई एक्स्प्रेस पकडून त्यांनी मुंबईच्या दिशेने प्रवास सुरू केला. मात्र प्रवासात खाण्यासाठीही पैसे उरले नाहीत, म्हणून मोबाईल विकून पैसे उभे करण्यासाठी ते जळगावात उतरले.

याच दरम्यान पोलिसांना त्यांचे लोकेशन मिळाले. हिमाचल प्रदेश पोलिसांनी शनिपेठ पोलीस स्टेशनचे प्रभारी पोलीस निरीक्षक डॉ. विशाल जयस्वाल यांना आरोपी शनिपेठ हद्दीत असल्याची माहिती दिली. जयस्वाल यांनी गुन्हे शोध पथकाला तातडीने सूचना दिल्या आणि शोधमोहीम सुरू झाली. आरोपींच्या हालचालींचा माग काढत पथकाने चौघांना ताब्यात घेतले.

ताब्यात घेतलेल्यांमध्ये चंदन कुमार आणि रोशन गोगल मुखिया (रा. कुतुबपूर, पोलीस ठाणे सकरा, जि. मुझफ्फरपूर), संतोष कुमार (रा. बरियारपूर, जि. मुझफ्फरपूर) आणि अजित कुमार जोगा मेहतो (रा. पंडरक, जि. पाटणा, बिहार) यांचा समावेश आहे. हे चौघेही आरोपी बिहारचे आहेत.

या चौघांना ताब्यात घेण्यासाठी हिमाचल प्रदेशातील तपासी अधिकारी जळगावकडे रवाना झाले आहेत. आरोपींना हिमाचल पोलिसांच्या ताब्यात दिल्यानंतरच पुढील कायदेशीर प्रक्रिया होणार आहे.