पॅराग्लायडर हाय व्होल्टेज तारेला धडकून हवेतच आगीचा गोळा, थरारक व्हिडिओ व्हायरल

सोशल मीडियावर रोज वेगवेगळे व्हिडिओ व्हायरल होत असतात. कधी अपघाताचे, कधी थरारक स्टंटचे, तर कधी हसवणारे आणि चकित करणारे दृश्य शेअर केले जातात. अशातच आता हवेतल्या एका भीषण अपघाताचे दृश्य कॅमेऱ्यात टिपले गेले असून हा व्हिडिओ सध्या इंटरनेटवर मोठ्या प्रमाणात शेअर होत आहे.

व्हिडिओमध्ये एक पॅराशूट हवेत विजेच्या तारांना जाऊन धडकताना दिसतो आणि त्यानंतर पॅराग्लायडर जमिनीच्या दिशेने कोसळतो. ही धडक इतकी जोरदार होती की हवेतच आगीचा मोठा गोळा तयार झाल्याचे दिसून येते. या अपघाताची दृश्ये पाहून अंगावर काटा येईल इतकी भीषण आहेत.

या घटनेची नेमकी जागा कोणती याची कोणतीही अधिकृत माहिती समोर आलेली नाही. व्हिडिओच्या सुरुवातीला एक व्यक्ती विजेच्या तारांच्या वर पॅराग्लायडिंग करताना दिसते. ती व्यक्ती जमिनीवर उतरण्याच्या तयारीत असते, मात्र खालच्या बाजूला विजेच्या तारांचा पसारा पसरलेला असतो. विजेचा खांब पाहून ती व्यक्ती लगेच लँडिंगची तयारी सुरू करते, पण नेमक्या त्याचवेळी तिचा स्पर्श विजेच्या तारेला होतो आणि एका मोठ्या स्फोटासह ती व्यक्ती जमिनीच्या दिशेने कोसळू लागते.

विशेष म्हणजे ती व्यक्ती एकदाच नव्हे, तर वारंवार विजेच्या तारांवर आदळताना दिसते, त्यामुळे ती वाचण्याची शक्यता फार कमी असल्याचे मानले जात आहे. या अपघातानंतर त्या व्यक्तीची सध्याची परिस्थिती काय आहे, ती वाचली की नाही, याबाबत कोणतीही अधिकृत पुष्टी अद्याप झालेली नाही.

हा व्हिडिओ "ER. Team Leader" नावाच्या @alfuratyalatiqe या एक्स अकाऊंटवरून शेअर करण्यात आला आहे. २० सप्टेंबर २०२६ रोजी पोस्ट केलेल्या या व्हिडिओच्या कॅप्शनमध्ये, एक व्यक्ती पॅराशूटसह जमिनीवर उतरणार असताना दुर्दैवाने तिचा स्पर्श हाय व्होल्टेज विजेच्या तारेला झाल्याचे नमूद करण्यात आले आहे. या व्हिडिओला आतापर्यंत ३५.४ हजार व्ह्यूज मिळाले आहेत.

या व्हिडिओवर अनेकांनी आपापल्या प्रतिक्रिया दिल्या असून कमेंट सेक्शनमध्ये कमेंट्सचा वर्षाव होत आहे. एका यूजरने लिहिले की, "हा व्हिडिओ एआय निर्मिती आहे की वास्तव, हे ओळखणे कठीण आहे." दुसऱ्या यूजरने लिहिले, "विजेच्या तारांजवळ पॅराग्लायडिंग कधीच केली जात नाही." आणखी एका यूजरने लिहिले, "मला असं वाटतं की हे खरं नसून एआय निर्मित आहे."

या घटनेशी संबंधित माहिती सोशल मीडियावर शेअर झालेल्या पोस्ट आणि व्हिडिओवर आधारित असून, त्यातील दाव्यांची स्वतंत्र पडताळणी अद्याप झालेली नाही.