गणपती दर्शनाला मित्र-मैत्रिणींसोबत गेल्याच्या संशयातून पतीचा पत्नीवर चाकूने हल्ला

डोंबिवलीतील विष्णूनगर भागात एक धक्कादायक प्रकार समोर आला आहे. कोर्टात घटस्फोटाची प्रक्रिया सुरू असतानाच एका पतीने आपल्या पत्नीवर चाकूने जीवघेणा हल्ला केला. पत्नी मित्र-मैत्रिणींसोबत गणपती बाप्पाच्या दर्शनाला गेली होती, हाच राग मनात धरून पतीने हा हल्ला केल्याची माहिती पोलिसांनी दिली आहे. या हल्ल्यात पत्नी गंभीर जखमी झाली असून पोलिसांनी आरोपी पतीला अटक केली आहे.

ज्योती यांचं संतोष पेटेकर यांच्यासोबत २००९ साली प्रेमविवाह झालं होतं. मात्र लग्नानंतर संतोष पत्नीवर संशय घेऊ लागल्याचा आरोप आहे. या संशयातून दोघांमध्ये सतत भांडणं होत असत. पतीच्या या त्रासाला कंटाळून ज्योती २०२० मध्ये आपल्या चार मुलांना घेऊन वेगळ्या राहू लागल्या. म्हणजे संसार मोडल्यानंतरही ज्योती यांनी स्वतःच्या हिमतीवर चारही मुलांना सांभाळण्याचा निर्णय घेतला होता.

वेगळं राहिल्यानंतर ज्योती स्वतः मेहनत करून चारही मुलांचा सांभाळ करत होत्या. दरम्यान, पती-पत्नीमधील वादामुळे दोघांचं अधिकृत विभक्त होणं ठरलं होतं आणि त्यासाठी कोर्टात घटस्फोटाची केस देखील सुरू होती. म्हणजे नात्याचा शेवटचा कायदेशीर टप्पा सुरू असतानाच ही घटना घडली. मात्र या काळातही आरोपी पतीकडून पत्नीला त्रास दिला जात असल्याचं समोर आलं आहे.

याच दरम्यान ज्योती मित्र-मैत्रिणींसोबत गणपती बाप्पाच्या दर्शनासाठी गेल्या होत्या. हे संतोषच्या मनाला लागलं आणि तो राहत्या घरी पोहोचला. 'मित्रांसोबत फिरायला का गेलीस' असं विचारत त्याने पत्नीला मारहाण करायला सुरुवात केली. मारहाणीनंतर त्याने चाकूने तिच्या छातीवर वार केल्याची माहिती पोलीस निरीक्षक अभिजीत मोरे यांनी दिली.

हल्ल्यात ज्योती गंभीर जखमी झाल्या आणि रक्ताच्या थारोळ्यात पडल्या. आईवर हल्ला होताना बघून चारही मुलं घाबरून आरडाओरड करू लागली. त्यांचा आवाज ऐकून आजी, मावशी, नातेवाईक आणि आजूबाजूचे शेजारी घटनास्थळी धावून आले. यावेळी आरोपीने ज्योती यांच्या बहिणीलाही मारहाण केल्याची माहिती मिळाली आहे.

गंभीर जखमी ज्योती यांच्यावर ठाणे सिव्हिल रुग्णालयात उपचार सुरू असून त्यांची प्रकृती चिंताजनक असल्याचं सांगण्यात येतं आहे. विष्णूनगर पोलिसांनी या प्रकरणी गुन्हा दाखल करून संतोष पेटेकर याला अटक केली. त्याला कल्याण कोर्टात हजर केल्यानंतर कोर्टाने त्याला दोन दिवसांची पोलीस कोठडी सुनावली आहे.