उन्हामुळे टॅन झालेल्या त्वचेसाठी चिंचेचा कोळ, कोरफड जेल आणि दह्याचा घरगुती लेप

गणपती बाप्पाचे आगमन झाल्यानंतर आता लवकरच नवरात्री सुरू होणार आहे. नऊ दिवस देवीची स्थापना केली जाते आणि संध्याकाळी दांडियाचे कार्यक्रम होतात. सणांच्या या दिवसांत खरेदीसाठी महिला मोठ्या संख्येने बाहेर पडतात.

तासनतास उन्हात फिरल्यामुळे त्वचा काळवंडते. चेहऱ्यावर डेड स्किन वाढते, त्यामुळे त्वचेची गुणवत्ता थोडी खालावते आणि काळे डाग दिसू लागतात. सध्या ऑक्टोबर हिटमुळे गरमी वाढली आहे. अशा वेळी त्वचेचे रक्षण करणे खूप गरजेचे आहे. नाहीतर त्वचेच्या तक्रारी वाढतात आणि काळे डाग, पिंपल्स व टॅन वाढत जातो.

त्वचा काळी पडली की अनेकदा क्लीनअप आणि फेशियल केले जाते, कधी कधी महागडे स्किन ट्रीटमेंटही करून घेतले जाते. ग्लो वाढवण्यासाठी वेगवेगळे प्रॉडक्ट आणि सिरम वापरले जातात. पण असे महागडे स्किन केअर वारंवार आणि चुकीच्या पद्धतीने वापरले, तर त्वचा सुंदर दिसण्याऐवजी आणखीच बिघडते. म्हणूनच टॅन कमी करण्यासाठी चिंचेचा कोळ कसा वापरायचा, ते नीट पाहू या.

चिंच जेवणातले अनेक पदार्थ बनवण्यासाठी वापरली जाते. आंबट चवीची ही चिंच फक्त जेवणाची चव वाढवत नाही, तर त्वचेची हरवलेली चमक परत मिळवायलाही मदत करते. चिंचेतील नैसर्गिक घटक त्वचेवरचा टॅन कमी करतात आणि चेहऱ्यावरचा ग्लो वाढवतात.

लेप बनवण्यासाठी आधी चिंचेचा एक छोटा तुकडा पाण्यात भिजत ठेवा. मग त्यातला गर काढून घ्या. त्या गरात कोरफड जेल आणि एक चमचा दही घालून सगळे नीट एकत्र करा. मिश्रण तयार झाले की चेहरा पाण्याने स्वच्छ धुवा आणि कोरडा करा. मग हे मिश्रण चेहऱ्यावर लावा आणि दहा मिनिटे तसेच राहू द्या.

लेप सुकल्यावर हात ओले करून चेहऱ्यावर हलक्या हाताने मसाज करा. यामुळे त्वचेवर साचलेल्या मृत पेशी निघून जायला मदत होईल. त्यानंतर चेहरा पाण्याने स्वच्छ धुवा.

टॅनिंग आणि काळे डाग कमी करण्यासाठी चिंचेचा हा फेसपॅक आठवड्यातून दोनदा किंवा तीनदा लावला, तर त्वचेच्या तक्रारी कमी होतील आणि चेहरा उजळ दिसेल. हवे असेल तर चिंचेच्या मिश्रणात मध किंवा बेसन घालूनही फेसपॅक करता येतो. त्यामुळे त्वचेवर साचणारे जास्तीचे तेल कमी व्हायला मदत होते.

हा लेख फक्त सामान्य माहितीसाठी आहे आणि यात कोणत्याही उपचाराचा दावा केलेला नाही. कोणताही उपाय करण्यापूर्वी आपल्या डॉक्टरांचा सल्ला घ्या.