डेटिंगच्या नात्याला गंभीर वळण येण्याआधी हे संकेत नक्की तपासा
डेट करत असताना फक्त प्रेमाकडे न बघता काही विशिष्ट संकेतांकडेही लक्ष द्यायला हवं, कारण सुरुवातीच्या धोक्याच्या सूचनांकडे दुर्लक्ष केल्यास पुढे मन दुखावू शकतं.
प्रत्येकजण आयुष्यात कधी ना कधी प्रेमात पडतो. काही नाती आयुष्यभर टिकतात, तर काही दोन-चार वर्षांत किंवा त्याहूनही लवकर तुटतात. कुठल्याही नात्याची सुरुवात डेटिंगपासूनच होते आणि पुढे जायचं की नाही, हे डेटिंगचा काळच ठरवतो. त्यामुळे कोणासोबत डेट करत असाल, तर फक्त प्रेमाकडे न बघता काही विशिष्ट संकेतांकडेही लक्ष द्यायला हवं.
नात्याच्या सुरुवातीच्या काळात धोक्याच्या सूचनांकडे अनेकदा दुर्लक्ष केलं जातं. पण त्यामुळे पुढे जाऊन मन दुखावू शकतं आणि मानसिक ताणही येऊ शकतो. डेट करताना नेमके कोणते संकेत ओळखायला हवेत, असा प्रश्न पडू शकतो. जोडीदाराच्या वागण्यात वारंवार काही नकारात्मक संकेत दिसत असतील, तर हे नातं आपल्यासाठी योग्य नाही हे समजून घेण्याची वेळ आली आहे.
पहिला संकेत म्हणजे समोरची व्यक्ती कोणाचाही आदर करत नसेल. ती तुमच्याशी चांगली वागते, पण इतरांशी नीट बोलतही नाही, तर या संकेताकडे दुर्लक्ष करू नये. अशा नात्यात राहण्यापेक्षा त्यातून बाहेर पडणं चांगलं, कारण अशा व्यक्ती मुळातच उद्धट असतात.
दुसरं म्हणजे, समोरच्याला तुमच्यासोबत शारीरिक जवळीक साधण्यातच जास्त रस दिसत असेल, तर त्यांच्या शारीरिक आणि मानसिक इच्छांबद्दल कोणताही संकोच न बाळगता मोकळेपणाने बोललं पाहिजे. तसं नसेल, तर ते फक्त स्वतःच्या गरजांसाठी तुम्हाला डेट करत आहेत. अशा वेळी मागे हटायला हवं.
काही दिवसांनंतरही डेट करत असलेल्या व्यक्तीबद्दल कोणतंही आकर्षण वाटत नसेल, तर त्या नात्यातून मागे हटणंच उत्तम. स्वतःवर जबरदस्ती करू नका.
ती व्यक्ती तुम्हाला प्रत्यक्ष भेटण्याची योजना आखत नसेल किंवा भेट सतत पुढे ढकलत असेल, तरही मागे हटायला हवं. ते कदाचित तुमच्यासोबत फक्त टाइमपास करत असतील, हे लक्षात घ्या.
दोघांचे हेतू जुळत नसतील, तर पुढे जाऊ नका. उदाहरणार्थ, तुम्ही लग्नाच्या हेतूने डेटिंग करत असाल आणि समोरच्याला स्वतःला काय हवं आहे हेच माहीत नसेल, तर या नात्यात पुढे जाण्यात अर्थ नाही.
नात्यात फक्त तुम्हीच सतत त्यांच्यासाठी प्रयत्न करत असाल, तर सुरुवातीलाच तिथून निघून जाणं उत्तम. तसंच तुमच्या संवादात सातत्य नसेल, तर पुढे जाण्याआधी विचार करायला हवा, कारण संवादातला दुरावा नात्यातही दुरावा निर्माण करतो. अशा वेळी एक पाऊल मागे घेणंच योग्य.
डेट करताना तुम्हालाही हे संकेत दिसत असतील, तर आताच विचार करा आणि त्या नात्यातून लवकर बाहेर पडा.
