डकार यूथ ऑलिम्पिकसाठी भारताचा संघ ठरला, 11 खेळांतून 17 खेळाडू उतरणार

सेनेगलमध्ये होणाऱ्या डकार 2026 समर यूथ ऑलिम्पिक स्पर्धेसाठी भारतीय ऑलिम्पिक संघटनेने (IOA) आपला संघ जाहीर केला आहे. या स्पर्धेत भारताचे 17 खेळाडू 11 वेगवेगळ्या खेळांमध्ये देशाचे प्रतिनिधित्व करणार आहेत. डकारमध्ये चांगली कामगिरी करून या खेळाडूंनी देशाचे नाव उंचवावे, अशी अपेक्षा भारतीय ऑलिम्पिक संघटनेने व्यक्त केली आहे.

ही स्पर्धा 31 ऑक्टोबर ते 13 नोव्हेंबरदरम्यान होणार आहे. आफ्रिका खंडात ऑलिम्पिक स्पर्धेचे आयोजन पहिल्यांदाच होत आहे, त्यामुळे या स्पर्धेला ऐतिहासिक महत्त्व आले आहे. यात 25 खेळांमध्ये सुमारे 2 हजार 700 युवा खेळाडू सहभागी होतील, अशी अपेक्षा आहे. एकूण 207 प्रतिनिधी मंडळे स्पर्धेत उतरणार आहेत.

भारतीय संघातील टेबल टेनिसपटू सार्थक आर्य डकारसाठी तयारी करत आहे. यूथ ऑलिम्पिक हा आपल्या क्रीडा कारकिर्दीतला एक महत्त्वाचा टप्पा ठरेल, असा विश्वास त्याने बोलून दाखवला. पुढे 2030 मध्ये अहमदाबादला होणाऱ्या राष्ट्रकुल क्रीडा स्पर्धेत आणि 2032 मध्ये ब्रिस्बेनला होणाऱ्या ऑलिम्पिकमध्ये भारतासाठी खेळायचे आपले स्वप्न असल्याचे सार्थकने सांगितले.

भारताला 2036 च्या ऑलिम्पिक स्पर्धेचे यजमानपद मिळाले, तर आपल्याच देशात खेळून ऑलिम्पिक पदक जिंकणे ही आपल्यासाठी विशेष अभिमानाची गोष्ट असेल, अशी भावनाही त्याने व्यक्त केली.

भारतीय ऑलिम्पिक संघटनेच्या अध्यक्षा पी. टी. उषा यांनी युवा खेळाडूंना शुभेच्छा दिल्या. डकार 2026 ही युवा खेळाडूंच्या कारकिर्दीतली महत्त्वाची संधी आहे आणि हे खेळाडू भारतीय क्रीडा क्षेत्राचे भविष्य आहेत, असे त्यांनी सांगितले. याच खेळाडूंमधून पुढे ब्रिस्बेन 2032 आणि त्यानंतरच्या ऑलिम्पिक स्पर्धांमध्ये भारताचे प्रतिनिधित्व करणारे पदकविजेते घडू शकतात, असा विश्वासही त्यांनी व्यक्त केला.

आफ्रिका खंडात पहिल्यांदाच ऑलिम्पिक स्पर्धा होत असल्याबद्दल उषा यांनी डकार 2026 आयोजन समिती आणि सेनेगल ऑलिम्पिक समितीचे अभिनंदन केले.

डकारमधील स्पर्धेदरम्यान भारतीय ऑलिम्पिक संघटनेला जगभरातील राष्ट्रीय ऑलिम्पिक समित्यांशी बोलण्याची संधी मिळणार आहे. या चर्चेत युवा खेळाडूंची ओळख, त्यांच्या कौशल्याचा विकास आणि युवा स्तरापासून उच्चस्तरीय स्पर्धांपर्यंतच्या संधी अधिक मजबूत करणे, यावर भर दिला जाणार आहे.

याशिवाय पी. टी. उषा नामिबिया आणि मॉरिशससह काही आफ्रिकी देशांच्या राष्ट्रीय ऑलिम्पिक समित्यांशी क्रीडा सहकार्य आणि देवाणघेवाणीबाबतच्या सामंजस्य करारांवर स्वाक्षऱ्या करण्याची शक्यता आहे. या उपक्रमांमुळे भारताच्या दीर्घकालीन क्रीडा विकासाच्या प्रयत्नांना चालना मिळेल, अशी अपेक्षा आहे.