मुंबई इंडियन्सच्या प्रशिक्षकपदी ल्यूक विलियम्स, लिसा केटली यांची जागा घेणार

दोन वेळा जेतेपद पटकावलेल्या मुंबई इंडियन्स संघाने 2027 च्या व्युमन्स प्रीमियर लीगच्या (डब्ल्यूपीएल) आगामी हंगामापूर्वी मोठा निर्णय घेतला आहे. संघाने ल्यूक विलियम्स यांची मुख्य प्रशिक्षकपदी नियुक्ती केली असून ते आतापर्यंत या पदावर असलेल्या लिसा केटली यांची जागा घेतील. विलियम्स यांच्याकडे डब्ल्यूपीएलमध्ये प्रशिक्षणाचा मोठा अनुभव आहे. 2024 मध्ये त्यांनीच रॉयल चॅलेंजर्स बंगळुरू या संघाला डब्ल्यूपीएलचे पहिले जेतेपद मिळवून दिले होते. त्यामुळे मुंबई इंडियन्सला त्यांच्याकडून मोठ्या अपेक्षा आहेत.

गुरुवारी ही नियुक्ती जाहीर झाल्यानंतर विलियम्स यांनी स्वतः यावर प्रतिक्रिया दिली. ते म्हणाले की, मुंबई इंडियन्स ही एक प्रतिष्ठित आणि यशस्वी फ्रँचायझी आहे आणि तिच्याशी जोडले जाताना खेळाडू व सपोर्ट स्टाफच्या या प्रतिभावान गटासोबत काम करण्यास ते उत्सुक आहेत. आपल्याकडे एकत्रितपणे रोमहर्षक क्रिकेट खेळण्याची आणि यश मिळवण्याची चांगली संधी असल्याचंही ते म्हणाले. या आव्हानाची आपण वाट पाहत असून चाहत्यांना अभिमान वाटावा असे क्षण देण्याची आपली इच्छा असल्याचं विलियम्स यांनी सांगितलं.

मुंबई इंडियन्सच्या मालक नीता अंबानी यांनीही या नियुक्तीचे स्वागत केले. त्या म्हणाल्या की, मुंबई इंडियन्सच्या कुटुंबात आम्ही ल्यूक विलियम्स यांचे स्वागत करत आहोत. ल्यूक हे विजेते प्रशिक्षक असून त्यांच्याकडे मोठा अनुभव आहे. महिलांच्या खेळाबद्दल सखोल विचार आणि खेळाडूंना घडवण्याची ठाम बांधिलकी घेऊन ते संघात दाखल झाले आहेत, असंही त्या म्हणाल्या. ल्यूक आणि संपूर्ण संघाला या नव्या रोमहर्षक अध्यायासाठी शुभेच्छा देत असल्याचं नीता अंबानी यांनी सांगितलं. त्या पुढे म्हणाल्या की, आमच्या मुलींनी डब्ल्यूपीएलमध्ये एक शानदार वारसा उभा केला आहे आणि ल्यूक यांच्या मार्गदर्शनाखाली व हरमनच्या नेतृत्त्वाखाली आपण पुढे जाऊन यश मिळवू असा विश्वास त्यांनी व्यक्त केला.

मात्र विलियम्स यांच्यासमोर हे काम वाटतं तितकं सोपं नाही. येणाऱ्या हंगामापूर्वी त्यांना सर्वप्रथम मुंबई इंडियन्समधील खेळाडूंच्या रिटेंशनबाबत आणि लिलावाबाबत रणनीती आखावी लागणार आहे. डब्ल्यूपीएलच्या पाचव्या हंगामासाठी खेळाडू रिटेंशनची अंतिम तारीख 28 सप्टेंबर आहे, तर लिलाव 28 ऑक्टोबरला कोची येथे होणार आहे. बीसीसीआयने दिलेल्या माहितीनुसार, ही स्पर्धा 14 जानेवारी ते फेब्रुवारी 2027 या कालावधीत खेळवली जाईल. मात्र या पाच संघांच्या स्पर्धेसाठी कोणकोणती शहरे यजमानपद भूषवणार आहेत, याचा खुलासा अद्याप झालेला नाही.