'द पॅराडाईज'च्या प्री-रिलीज सोहळ्यासाठी स्टारकास्ट मुंबईत दाखल; नानी, राघव जुयालसह 'हे' कलाकार लावणार हजेरी
'नॅचरल स्टार' नानी यांच्या बहुप्रतीक्षित 'द पॅराडाईज' या चित्रपटाच्या प्री-रिलीज सोहळ्यासाठी संपूर्ण स्टारकास्ट मुंबईत दाखल झाली आहे.
'नॅचरल स्टार' नानी यांच्या 'द पॅराडाईज' या चित्रपटाबद्दल रिलीजआधीच प्रेक्षकांमध्ये उत्सुकता निर्माण झाली आहे. चित्रपटाचा टीझर आणि 'आया शेर', 'येशानागुला' या गाण्यांना मिळालेल्या दमदार प्रतिसादामुळे ही चर्चा आणखी वाढली आहे. आता चित्रपटाच्या प्री-रिलीज प्रमोशनल इव्हेंटसाठी संपूर्ण स्टारकास्ट मुंबईत दाखल झाली आहे.
मुंबईत होणाऱ्या या भव्य प्री-रिलीज सोहळ्यात नानी यांच्यासोबत राघव जुयाल, सोनाली कुलकर्णी आणि कायडू लोहार सहभागी होणार आहेत. चित्रपटाच्या स्टारकास्टमधील या चार प्रमुख कलाकारांची एकत्रित हजेरी चित्रपटाच्या रिलीजपूर्वीचा उत्साह आणखी वाढवेल असं म्हटलं जातंय.
या चित्रपटाचं दिग्दर्शन श्रीकांत ओडेला यांनी केलं आहे. नानी आणि श्रीकांत ओडेला यांची जोडी याआधी 'दसरा' या गाजलेल्या चित्रपटातून एकत्र आली होती, त्यामुळे या दोघांच्या या नव्या चित्रपटाकडेही प्रेक्षकांचं लक्ष लागलं आहे.
टीझरमध्ये नानी यांचा एक वेगळाच आणि दमदार अंदाज पाहायला मिळतो. झोपडपट्टीच्या पार्श्वभूमीवर आधारित या कथेत नानी यांनी जदल ही व्यक्तिरेखा साकारली असून, ही व्यक्तिरेखा एका वेश्येचा मुलगा असल्याचं कथेत दाखवण्यात आलं आहे. टीझरवरून चित्रपटात रॉ इंटेन्सिटी, मास एनर्जी आणि हाय-ऑक्टेन अॅक्शन पाहायला मिळणार असल्याचं स्पष्ट होतं. दुसरीकडे राघव जुयाल खलनायकाच्या भूमिकेत असून त्यांची व्यक्तिरेखाही या टीझरमध्ये लक्ष वेधून घेत आहे.
चित्रपटातील गाण्यांनाही सोशल मीडियावर उत्तम प्रतिसाद मिळतो आहे. 'आया शेर' या गाण्याने यूट्यूबवर २०० मिलियनहून अधिक व्ह्यूज आणि १.८ मिलियनहून अधिक लाइक्स मिळवले असून, या गाण्यावर सोशल मीडियावर मोठ्या संख्येने रील्सही तयार झाल्या आहेत. 'येशानागुला' या गाण्यानेही यूट्यूबवर ११९ मिलियनहून अधिक व्ह्यूज आणि ७००K लाइक्सचा टप्पा पार केला आहे. या दोन्ही गाण्यांच्या यशामुळे चित्रपटाच्या संगीताचीही सध्या मोठ्या प्रमाणात चर्चा सुरू आहे.
SLV सिनेमाजच्या निर्मितीतून तयार झालेला 'द पॅराडाईज' हा चित्रपट २४ सप्टेंबर २०२६ रोजी प्रदर्शित होणार आहे. हिंदी, तेलुगू, तमिळ, इंग्रजी, स्पॅनिश, बंगाली, कन्नड आणि मल्याळम अशा आठ भाषांमध्ये हा चित्रपट एकाच वेळी प्रेक्षकांसमोर येणार आहे.
चित्रपटाच्या जागतिक स्तरावरील प्रदर्शनासाठी निर्मात्यांनी हॉलिवूड स्टार रायन रेनॉल्ड्स यांच्याशी संपर्क साधल्याचीही माहिती समोर आली आहे. दमदार स्टारकास्ट, श्रीकांत ओडेला यांचं दिग्दर्शन आणि नानी यांचा वेगळा अवतार यामुळे 'द पॅराडाईज'च्या रिलीजकडे आता प्रेक्षकांचं लक्ष लागलं आहे.
