दिल्ली पोलीस AI, डीपफेकच्या मदतीने अडकवत असल्याचा सौरभ दास यांचा आरोप

कॉकरोच जनता पार्टीची स्कूल ठिक करो मोहिम राज्यासह देशभर सुरू असतानाच पक्षाचे सह-संयोजक आणि प्रवक्ते सौरभ दास यांनी दिल्ली पोलिसांवर गंभीर आरोप केले आहेत. दिल्ली पोलीस अजूनही आपली आणि आपल्या सहकाऱ्यांची चौकशी करत असून एका कथित राष्ट्रविरोधी कथानकात अडकवण्याचा प्रयत्न होत असल्याचा दावा दास यांनी केला.

'एक्स' या सोशल मीडिया प्लॅटफॉर्मवर पोस्ट करताना दास यांनी म्हटले की, आपल्या सूत्रांकडून आणि पोलीस यंत्रणेतील काही संपर्कांकडून याबाबत माहिती मिळाली आहे. कथित राष्ट्रविरोधी कथानक तयार करण्यासाठी डीपफेक, आर्टिफिशियल इंटेलिजन्स (AI), एडिट केलेल्या चॅट्स आणि इतर तंत्रांचा वापर केला जात असल्याचे आपल्याला सांगण्यात आल्याचा दावा त्यांनी केला.

दिल्ली पोलीस आपल्याला आणि सहकाऱ्यांना कथित राष्ट्रविरोधी कटाशी जोडण्यासाठी विविध डिजिटल साधनांचा वापर करत असल्याचे दास म्हणाले. यासाठी डीपफेक आणि AI तंत्रज्ञानासोबतच एडिट केलेल्या चॅट्सचा वापर होत असून हे सर्व करदात्यांच्या पैशातून केले जात असल्याचे त्यांनी नमूद केले.

दिल्ली पोलिसांनी आपली आणि सहकाऱ्यांची चौकशी करण्याऐवजी शहरातील कथित पीजी माफिया, हॉस्पिटल माफिया आणि एज्युकेशन माफिया यांची चौकशी करावी, असा सल्ला सौरभ दास यांनी दिला. दास यांच्या या आरोपांवर दिल्ली पोलिसांची अधिकृत प्रतिक्रिया अद्याप समोर आलेली नाही.

आंदोलकांना आंदोलनांशी संबंधित बाबींमध्ये कायमस्वरूपी अभय देण्यात आले असल्याची आठवणही दास यांनी करून दिली. अशा प्रयत्नांसाठी दिल्ली पोलिसांना बुकर पारितोषिक किंवा साहित्यासाठीचा नोबेल पुरस्कार मिळणार नाही, अशी टीका करत त्यांनी पोलिसांनी लोकांचा वेळ आणि सार्वजनिक पैसा वाया घालवू नये, असे आवाहन केले.

आपल्या पोस्टमध्ये सौरभ दास यांनी एका जुन्या घटनेचाही उल्लेख केला. संसद मोर्चाच्या सुमारे तीन-चार दिवस आधी तत्कालीन पोलीस आयुक्तांना पदावरून हटवण्यात आले होते, असा दावा त्यांनी केला. अमित शाह यांनी गृहसचिव आणि तत्कालीन पोलीस आयुक्तांना दिलेल्या काही कथित कठोर सूचनांची अंमलबजावणी करण्यास दोन्ही अधिकाऱ्यांनी नकार दिल्यामुळे हे घडले, असेही दास यांनी नमूद केले. दिल्ली पोलिसांनी ही घटना आठवून पाहावी, असा सल्लाही त्यांनी दिला.

दिल्ली पोलिसांना आपल्याशी, आंदोलनांशी किंवा सर्वोच्च न्यायालयाच्या निर्णयाशी संबंधित काही प्रश्न असतील, तर त्यांना कोणत्याही प्रकारच्या जुगाडचा आधार घेण्याची गरज नाही, असे दास म्हणाले. पोलीस आपल्याला, अभिजीत दीपके आणि आशुतोष रांका यांना कधीही बोलावू शकतात असे सांगत, आम्ही तिघेही नवीन पोलीस आयुक्तांच्या कार्यालयात एकत्र हजर राहण्यास आणि कोणत्याही प्रश्नांना सामोरे जाण्यास व दीर्घ चौकशीला सामोरे जाण्यास तयार आहोत, असे त्यांनी स्पष्ट केले. तिघांना थेट बोलावून चौकशी केली, तर डीपफेकची गरजच भासणार नाही, कारण त्यावेळी खऱ्या माणसे पोलिसांसमोर हजर असतील, असेही दास यांनी म्हटले आहे.