शेअर मार्केटच्या नावाखाली चंद्रपुरातील WCL फोरमनची ९ लाख ९० हजारांची ऑनलाईन फसवणूक

चंद्रपुरात शेअर मार्केटमधील गुंतवणुकीच्या नावाखाली ऑनलाईन फसवणुकीचा प्रकार उघडकीस आला आहे. जास्त परताव्याचे आमिष दाखवून एका ५३ वर्षीय कर्मचाऱ्याची ९ लाख ९० हजार रुपयांना फसवणूक करण्यात आली. याबाबत चंद्रपूर सायबर पोलीस ठाण्यात अज्ञात आरोपींविरुद्ध गुन्हा दाखल करण्यात आला आहे.

पोलिसांनी दिलेल्या माहितीनुसार, तक्रारदार केशव रामदास पिंपळकर (वय ५३) हे चंद्रपुरातील भिवापूर वार्ड, जुना बियाणी चौक परिसरात (आरसीईआरटी इंजिनिअरिंग कॉलेजजवळ) राहतात. ते वेस्टर्न कोलफील्ड्स लिमिटेड (WCL) च्या लालपेठ येथे फोरमन म्हणून काम करतात. त्यांना शेअर मार्केटची थोडी माहिती आहे आणि यापूर्वी त्यांनी ग्रो (Groww) अ‍ॅपवरून काही गुंतवणूक केली होती.

२० ऑगस्ट २०२६ रोजी फेसबुक पाहत असताना त्यांना शेअर मार्केटमध्ये गुंतवणुकीची एक जाहिरात दिसली. त्या जाहिरातीतील लिंकवरून त्यांना 'sig Susquehanna' नावाच्या व्हॉट्सअ‍ॅप ग्रुपमध्ये घेण्यात आले. त्या ग्रुपमध्ये आधीपासून ११८ सदस्य होते. शिखा शर्मा, प्रोफेसर जिग्नेश वोरा आणि अ‍ॅडमिन असे नाव असलेल्या अज्ञात व्यक्तींनी व्हॉट्सअ‍ॅप मेसेज आणि ऑनलाईन क्लासेसमधून भारतातील अर्थव्यवस्थेची माहिती देत पिंपळकर यांना गुंतवणूक करायला प्रवृत्त केले. ग्रुपमधील इतर सदस्यांना मोठा फायदा होत असल्याचे दिसल्याने पिंपळकर यांनीही पैसे गुंतवायचे ठरवले.

त्यांच्या सांगण्यावरून पिंपळकर यांनी 'Niftypwm' नावाचे अ‍ॅप डाऊनलोड केले. ३० ऑगस्ट रोजी सुरुवातीला त्यांनी १०,००० रुपये भरले, तेव्हा अ‍ॅपवर त्यांना १,१०० रुपयांचा फायदा दाखवण्यात आला. त्यानंतर ३० ऑगस्ट ते २२ सप्टेंबर २०२६ या काळात त्यांनी स्टेट बँक ऑफ इंडिया आणि आयसीआयसीआय बँकेतील आपल्या खात्यांमधून एकूण ११ व्यवहारांत ९ लाख ९० हजार रुपये आरोपींनी दिलेल्या बँक खात्यांमध्ये पाठवले.

गुंतवलेल्या या रकमेवर अ‍ॅपमध्ये ७९ लाख ५९ हजार ४७० रुपयांचा नफा दाखवण्यात आला होता. पिंपळकर यांनी ही रक्कम आणि मूळ मुद्दल काढण्याचा प्रयत्न केला, तेव्हा अ‍ॅपवरून पैसे काढता येत नसल्याचे त्यांच्या लक्षात आले. उलट अ‍ॅपवर २३ लाख ५२९ रुपयांचे थकीत कर्ज (Outstanding Debt Amount) दाखवण्यात आले. ते कर्ज फेडल्याशिवाय शेअर्स विकता येणार नाहीत आणि पैसे काढता येणार नाहीत, असा मेसेजही त्यांना आला. शिखा शर्मा हिच्याशी व्हॉट्सअ‍ॅपवर संपर्क केला असता, तिने थकीत कर्जाची रक्कम भरण्यासाठी तगादा लावला आणि मुदत वाढवून कर्ज काढण्याचा सल्ला दिला.

आपली ऑनलाईन फसवणूक झाल्याचे लक्षात येताच पिंपळकर यांनी सायबर क्राईम पोर्टलवर ऑनलाईन तक्रार नोंदवली. त्यानंतर १ ऑक्टोबर २०२६ रोजी त्यांनी चंद्रपूर सायबर पोलीस ठाण्यात प्रत्यक्ष जाऊन तक्रार दिली. त्या तक्रारीवरून पोलिसांनी अज्ञात आरोपींविरुद्ध माहिती तंत्रज्ञान कायदा (IT Act) कलम ६६(सी), ६६(डी) आणि भारतीय न्याय संहिता (BNS) २०२३ मधील कलम ३(५), ३०८, ३१८(४) व ३१९(२) अन्वये गुन्हा नोंदवला आहे. सहाय्यक पोलीस निरीक्षक राजेंद्र सोनवणे आणि पोलीस निरीक्षक सुनील विठ्ठलराव गाडे यांच्या मार्गदर्शनाखाली या प्रकरणाचा सखोल तपास सुरू आहे.