चंद्रपुरात अमली पदार्थांना आळा घालण्यासाठी जिल्हाधिकाऱ्यांचे पोलिसांना कडक कारवाईचे आदेश

चंद्रपूर जिल्ह्यात अमली पदार्थांना आळा घालण्यासाठी काय उपाययोजना सुरू आहेत, याचा आढावा जिल्हाधिकारी वसुमना पंत यांनी घेतला. या बैठकीत त्यांनी पोलीस विभागाला कठोर कारवाई करण्याचे निर्देश दिले. अमली पदार्थांची वाहतूक, विक्री आणि साठवणूक रोखण्यासाठी सर्व यंत्रणांनी एकमेकांशी समन्वय ठेवून काम करावे, असेही त्यांनी सांगितले.

बैठकीला जिल्हा पोलीस अधीक्षक आयुष नोपानी उपस्थित होते. शाळा आणि महाविद्यालयांत जनजागृती करणे, मेडिकल स्टोअर्सची तपासणी करणे आणि कुरिअर पार्सलवर लक्ष ठेवणे, असे निर्देश यावेळी देण्यात आले.

जिल्ह्यातील शाळा, महाविद्यालये आणि इतर शैक्षणिक संस्थांमध्ये अमली पदार्थांच्या दुष्परिणामांबद्दल व्यापक जनजागृती करावी, असे पंत म्हणाल्या. शैक्षणिक संस्थांच्या परिसरात अमली पदार्थ किंवा तंबाखूजन्य पदार्थांची विक्री होत असल्याचे अथवा कोणी त्यांचे सेवन करत असल्याचे दिसले, तर संबंधित संस्थांनी लगेच पोलीस विभागाशी संपर्क साधावा. विद्यार्थ्यांमध्ये व्यसनमुक्तीबद्दल जागृती निर्माण करण्यासाठी शिक्षण विभागाने विशेष लक्ष द्यावे, असेही त्यांनी सांगितले.

जिल्ह्यात चालणाऱ्या रासायनिक कारखान्यांमध्ये कोणत्याही प्रकारच्या अमली पदार्थांचे अनधिकृत उत्पादन होणार नाही, याची संबंधित यंत्रणांनी काळजी घ्यावी. बंद असलेल्या कारखान्यांचीही नियमित तपासणी करावी, असे त्यांनी सांगितले. अन्न व औषध प्रशासन विभागाने जिल्ह्यातील मेडिकल स्टोअर्सना अचानक भेटी देऊन तपासणी करावी आणि प्रतिबंधित औषधे किंवा ड्रग्जची बेकायदेशीर विक्री होत नाही ना, याची खात्री करावी, असेही त्यांनी सांगितले.

जिल्ह्याच्या आंतरराज्य सीमेजवळच्या भागात शेतीत खसखस किंवा गांजासारख्या प्रतिबंधित पिकांची लागवड होऊ नये, यासाठी कृषी विभागाने दक्ष राहावे, असे निर्देश देण्यात आले. अशी संशयास्पद लागवड आढळली, तर संबंधित विभागांना लगेच माहिती देऊन आवश्यक ती कारवाई करावी.

टपाल, खासगी कुरिअर सेवा आणि इतर मार्गांनी येणाऱ्या संशयास्पद पार्सलवरही विशेष लक्ष ठेवावे, असे जिल्हाधिकारी वसुमना पंत यांनी सांगितले. पार्सलमध्ये अमली पदार्थ असल्याचा संशय आला किंवा साठा सापडला, तर त्याची माहिती तातडीने पोलीस विभागाला द्यावी. खासगी वाहनांतून होणाऱ्या कुरिअर आणि पार्सल वाहतुकीचीही गरजेनुसार तपासणी करावी, असेही त्यांनी सांगितले.

बैठकीला पोलीस निरीक्षक अमोल काचोरे, सहाय्यक पोलीस निरीक्षक योगेश हिवसे, केंद्रीय सेवा व कर विभागाचे अधीक्षक शशांक मंडल, राज्य उत्पादन शुल्क विभागाचे अधीक्षक नितीन धार्मिक, अन्न व औषध प्रशासन विभागाचे सहाय्यक आयुक्त सुहास सावंत आणि जिल्हा कार्यक्रम अधिकारी सुमन पानगंटीवार उपस्थित होते. याशिवाय एमआयडीसी आणि संबंधित विभागांचे अधिकारीही बैठकीला हजर होते.