चंद्रपुरात एसटी स्मार्ट कार्डचा गोंधळ; नोंदणी केली, पण कार्ड सक्रिय नाही, प्रवाशांना पूर्ण भाड्याचा फटका

एसटी महामंडळाचा प्रवास डिजिटल करण्यासाठी एनसीएमसी स्मार्ट कार्ड योजना सुरू करण्यात आली. मात्र चंद्रपूर जिल्ह्यातच या योजनेला प्रशासकीय अडथळ्यांचा सामना करावा लागत आहे. जिल्ह्यात २ लाख ७ हजार ८०७ प्रवाशांनी कार्डसाठी नोंदणी केली आहे. तरीही त्यापैकी ३८ हजार ३५२ कार्ड अजून सक्रिय झालेले नाहीत. त्यामुळे नोंदणी करूनही अनेक प्रवाशांना अपेक्षित सवलत मिळत नाही आणि ते सवलतीपासून वंचित राहत आहेत.

१ ऑक्टोबरपासून स्मार्ट कार्ड वापरणे सक्तीचे करण्यात आले आहे. त्यामुळे ज्यांचे कार्ड सक्रिय नाही, त्यांची अडचण आणखी वाढली आहे. मशीनमध्ये कार्ड स्वीकारले गेले नाही, तर वाहकांकडून पूर्ण भाडे घेतले जाते. यातून प्रवासी आणि वाहक यांच्यात वाद होण्याचे प्रसंग घडत आहेत. विशेषतः ग्रामीण भागातील ज्येष्ठ नागरिक, महिला आणि इतर सवलतधारकांना याचा मोठा फटका बसत आहे.

नोंदणी झालेल्या २ लाख ७ हजार ८०७ प्रवाशांमध्ये १ लाख ६२ हजार ७६५ महिला, २२ हजार ९८७ ज्येष्ठ नागरिक, २० हजार ८५२ अमृत योजनेचे लाभार्थी आणि २ हजार २०४ इतर सवलतधारक आहेत. यापैकी १ लाख ६९ हजार ४५५ कार्ड सक्रिय झाले आहेत.

सक्रिय कार्डधारकांमध्ये १ लाख ३० हजार ४७० महिला, १९ हजार ९३८ ज्येष्ठ नागरिक, १७ हजार ३४८ अमृत योजनेचे लाभार्थी आणि १ हजार ६९९ इतर सवलतधारक यांचा समावेश आहे.

म्हणजेच नोंदणी झालेल्या २ लाख ७ हजार ८०७ प्रवाशांपैकी ३८ हजार ३५२ प्रवाशांची कार्ड सक्रिय होणे अजून बाकी आहे. कार्ड सक्रिय होईपर्यंत या प्रवाशांना प्रवासात सवलत मिळवताना अडचणी येत आहेत.

नोंदणी आणि प्रत्यक्ष सक्रिय झालेली कार्ड यांच्यात मोठी तफावत आहे. त्यामुळे योजनेच्या अंमलबजावणीवर प्रश्नचिन्ह उभे राहिले आहे. कार्डची प्रक्रिया पूर्ण करूनही सवलत मिळत नसल्याने प्रवाशांना पूर्ण भाडे द्यावे लागत आहे. निष्क्रिय कार्डचा प्रश्न तातडीने सोडवावा आणि सर्व पात्र प्रवाशांना सवलतीचा लाभ मिळवून द्यावा, अशी मागणी होत आहे.