रस्त्यावर चहा विकणाऱ्या तरुणाची कमाई ऐकून क्रिएटरही चक्रावला, महिन्याला ३०-३५ हजारांची बचत

रस्त्यावर फक्त १० रुपयाला चहा विकणारा माणूस महिन्याला किती कमावत असेल, याचा अंदाज बांधणं तसं अवघडच. रस्त्यावर उभं राहून, फिरून चहा विकणाऱ्या माणसांचं काम पाहता अनेकांना वाटतं की असं काम करणाऱ्यांची कमाई फार तर जेमतेम असेल, त्यांच्या हाती फारसे पैसे उरत नसतील असाच अनेकांचा समज असतो. पण नुकताच सोशल मीडियावर आलेला एक व्हिडिओ हा गैरसमज पार मोडून काढतोय. या व्हिडिओत रस्त्यावर चहा विकणाऱ्या एका तरुणाला त्याची महिन्याची कमाई विचारली असता त्याने सांगितलेले आकडे ऐकून सूट-बूट घालून ऑफिसमध्ये नोकरी करणारेही चक्रावले. हा व्हिडिओ ऐकल्यावर रस्त्यावर चहा विकणाऱ्यांकडे दयेने नाही तर मानाने पाहावं लागेल, इतकी ही कमाई मोठी आहे.

हा व्हिडिओ एका सोशल मीडिया क्रिएटरने @Two_generations_one_vlog या आपल्या इन्स्टाग्राम अकाउंटवरून शेअर केला असून त्याला सध्या प्रचंड व्ह्यूज मिळत आहेत. व्हिडिओत चहाचा थर्मॉस घेतलेल्या तरुणाला क्रिएटर विचारतो, तू दिवसाला किती कप चहा विकतोस? यावर तो तरुण सांगतो की, दिवसाला त्याची कमाई २५०० ते ३००० रुपयांपर्यंत होते. क्रिएटर पुढे विचारतो की यातून किती बचत होते, तेव्हा तो सांगतो की दिवसाला साधारण १५०० रुपयांपर्यंत बचत होते. म्हणजे रोजच्या विक्रीतून खर्च वजा जाता तो दररोज बऱ्यापैकी रक्कम बाजूला काढू शकतो.

त्यानंतर क्रिएटरने त्याला राहतो कुठे असं विचारलं, तेव्हा त्या तरुणाने सांगितलं की तो बिकानेरमध्ये भाड्याच्या घरात राहतो. त्याचं स्वतःचं एक चहाचं दुकानही आहे, जे भाड्याच्या जागेत असून त्यासाठी त्याला दरमहा ५,००० रुपये भाडं द्यावं लागतं. दुकानाचं भाडं, रोजचा माल आणि इतर खर्च असे सगळे खर्च वजा करूनही तो महिन्याला ३०,००० ते ३५,००० रुपयांपर्यंत कमावतो, जी रक्कम अनेक कंपन्यांमध्ये काम करणाऱ्या कर्मचाऱ्यांच्या पगारापेक्षाही जास्त आहे.

विशेष म्हणजे या तरुणाच्या दुकानात आता काम इतकं वाढलंय की त्याने स्वतःच एक नोकरभरतीही काढली आहे. जो कोणी लगेच काम सुरू करायला तयार असेल त्याला तत्काळ कामावर घेतलं जाईल, असं तो सांगतो. व्हिडिओत तो क्रिएटरला म्हणतो की, "कुणी मुलगा ओळखीत असेल तर मला सांग." आपल्या दुकानाला अजून एका माणसाची गरज असल्याचं तो थेट व्हिडिओतूनच सांगून टाकतो.

या तरुणाची कमाई ऐकून सोशल मीडियावर अनेकांनी आश्चर्य व्यक्त केलं असून कमेंट सेक्शनमध्ये विविध प्रतिक्रिया उमटल्या आहेत. एका युजरने लिहिलं की, "१५,००० रुपये पगाराची ऑफिसची नोकरी करणारी व्यक्ती अशा थाटात वावरते, जणू काही तिच्याकडे ५-७ कोटी रुपये आहेत." दुसऱ्या युजरने लिहिलं, "ऐकायला सोपं वाटतं पण फिरून चहा विकण्यात फार मेहनत आहे." तर आणखी एका युजरने कमेंट केली, "मला घ्या कामावर, मी बेरोजगार आहे." अशा प्रतिक्रियांमधून या तरुणाच्या मेहनतीचं आणि कमाईचं कौतुक तसंच नवल दोन्हीही व्यक्त होत आहे.