गणेश विसर्जनासाठी नागपूर मनपाची सज्जता, २२५ ठिकाणी ४४७ कृत्रिम कुंड

मागील दहा ते बारा दिवसांपासून घराघरात विराजमान झालेल्या गणरायाला अनंत चतुर्दशीला निरोप दिला जाणार आहे. या पार्श्वभूमीवर नागपूर महानगरपालिकेने पर्यावरणपूरक विसर्जनासाठी जय्यत तयारी केली आहे. महापौर निता ठाकरे यांच्या मार्गदर्शनाखाली उपमहापौर लिला हाथीबेड, स्थायी समिती सभापती शिवानी दाणी वखरे, सत्तापक्ष नेते नरेंद्र (बाल्या) बोरकर, विरोधी पक्ष नेते संजय महाकाळकर, मनपा आयुक्त डॉ. विपीन, वैद्यकीय आरोग्य विशेष समिती सभापती मनीषा अतकरे यांच्यासह सर्व झोन सभापती, अधिकारी आणि कर्मचारी या तयारीत सहभागी आहेत.

बुधवारी (ता. २३) महापौर निता ठाकरे यांनी सक्करदरा तलाव, गांधीसागर तलाव, पोलीस लाईन टाकळी, कोराडी तलाव, सरदार वल्लभभाई पटेल मैदान कच्छीविसा आणि नाईक तलाव परिसरातील कृत्रिम विसर्जन कुंडांची प्रत्यक्ष पाहणी केली. यावेळी उपमहापौर लिला हाथीबेड, सत्तापक्ष नेते नरेंद्र बोरकर, विरोधी पक्ष नेते संजय महाकाळकर, आयुक्त डॉ. विपीन, अतिरिक्त आयुक्त अंकित, मनीषा अतकरे, नेहरूनगर झोन सभापती सीमा ढोमणे, धंतोली झोन सभापती भारती बुंदे, एआयएमआयएमचे गटनेता शकील पटेल, नगरसेवक शैलेश पांडे, प्रमोदसिंह ठाकूर, नगरसेविका वर्षा डोंगरे, रेखा निमजे, नगरसेवक शेषराव गोतमारे यांच्यासह उपायुक्त राजेश भगत, मुख्य कार्यकारी अभियंता लिना उपाध्ये, मुख्य स्वच्छता अधिकारी गजेंद्र महल्ले, मुख्य अग्निशमन अधिकारी राजेंद्र उचके, अधीक्षक अभियंता विजय गुरुबक्षाणी आणि इतर अधिकारी उपस्थित होते.

पाहणीदरम्यान महापौर निता ठाकरे यांनी विसर्जनासाठी येणाऱ्या भक्तांना कोणताही त्रास होऊ नये यासाठी काळजी घेण्याचे निर्देश दिले. विसर्जन स्थळी बॅरिगेटिंग करावी, ठिकठिकाणी सुरक्षा रक्षक नेमावेत, वीज व्यवस्था चोख ठेवावी, विहिरींच्या पाण्याची सोय करावी आणि जलतरणपटूंची नेमणूक करावी, असेही त्यांनी सांगितले. आयुक्त डॉ. विपीन यांनी विसर्जन स्थळांवर उपद्रव शोध पथकाचे जवान आणि पोलीस अधिकारी नेमण्याच्या सूचना दिल्या.

यंदाचा गणेशोत्सव उत्साहात आणि पूर्णपणे पर्यावरणपूरक पद्धतीने साजरा व्हावा यासाठी मनपाने व्यापक तयारी केली आहे. शहरातील जलस्रोतांचे प्रदूषण रोखण्यासाठी आणि पर्यावरण संवर्धनासाठी मनपाने शहरात २२५ ठिकाणी एकूण ४४७ कृत्रिम विसर्जन कुंड उभारले आहेत. नवव्या दिवशी गणेशमूर्तींच्या विसर्जनासाठी मनपाने ४९ ठिकाणी उभारलेल्या १३७ कृत्रिम तलावांमध्ये २ हजार २८६ मूर्तींचे विसर्जन झाले, ज्यात २ हजार १२४ मातीच्या आणि १६२ पीओपीच्या मूर्तींचा समावेश आहे.

मोठ्या आकाराच्या गणेशमूर्तींच्या विसर्जनासाठी गोरेवाडा, पोलीस लाईन टाकळी, कच्छीविसा आणि कोराडी येथील मोठे तलाव सज्ज ठेवण्यात आले आहेत. नागरिकांच्या सोयीसाठी शहरात २२ फिरती मोबाईल कुंड (Mobile Tanks) देखील उपलब्ध करून देण्यात आली आहेत.

आपल्या घराजवळचा कृत्रिम तलाव किंवा विसर्जन स्थळ शोधण्यासाठी नागरिकांना भटकावे लागू नये, यासाठी मनपाने https://ganpati-zone-map.emergent.host हे संकेतस्थळ आणि क्यूआर कोड तयार केला आहे. हा क्यूआर कोड मोबाईलवर स्कॅन केल्यास झोननिहाय कृत्रिम तलावांची सविस्तर माहिती आणि गूगल मॅपचे दिशादर्शक नेव्हिगेशनही मिळेल. हा क्यूआर कोड मनपाच्या अधिकृत संकेतस्थळावरही उपलब्ध आहे.

पर्यावरणपूरक गणेशोत्सवाचा भाग म्हणून विसर्जनानंतर जमा होणाऱ्या निर्माल्याची शास्त्रोक्त विल्हेवाट लावून त्यापासून सेंद्रिय खत तयार केले जाणार आहे. मनपाच्या दहाही झोनमध्ये एकूण १८ निर्माल्य रथ सेवा देत असून, सार्वजनिक गणेश मंडळांकडून निर्माल्य श्रद्धापूर्वक संकलित केले जात आहे. हे संपूर्ण निर्माल्य भांडेवाडी येथील प्रकल्पात नेऊन त्यावर प्रक्रिया करून खत बनवले जाईल. निर्माल्य रथासंदर्भात माहितीसाठी मनपाने 1800 2677 966 हा टोल फ्री क्रमांक उपलब्ध करून दिला आहे.

शहरात स्वच्छता राखण्यासाठी दहाही झोनमध्ये एक हजार स्वच्छता कर्मचारी युद्धपातळीवर तैनात करण्यात आले आहेत. नागपूरकरांनी या पर्यावरणपूरक मोहिमेत सक्रिय सहभाग नोंदवून शहर स्वच्छ व सुंदर ठेवण्यासाठी सहकार्य करावे, असे आवाहन मनपाने केले आहे.