हजारेवाडीत डीजेवरील गाण्यावरून राडा, दोन्ही बाजूंचे लोक जखमी; परस्पर गुन्हे दाखल

नागपूर : उधारीच्या अवघ्या 20 हजार रुपयांवरून सुरू असलेला तणाव आणि डीजेवर वाजलेले 'बाप तो बाप रहेगा' हे गाणे, यातून हजारेवाडी वस्तीत रक्तरंजित हाणामारी झाली. इमामवाडा पोलीस स्टेशनच्या हद्दीत घडलेल्या या प्रकारात चाकू आणि काठ्या निघाल्या. पोलिसांनी दोन्ही बाजूंच्या तक्रारींवरून एकमेकांविरुद्ध गुन्हे दाखल केले आहेत.

पोलिसांच्या माहितीनुसार, हजारेवाडीत राहणारे 37 वर्षांचे निकलेस कटारे डीजेचा व्यवसाय करतात. त्यांच्याच वस्तीतील नेहाल उके हा त्यांच्याकडे कामाला होता. सुमारे सहा महिन्यांपूर्वी निकलेस यांनी नेहालला 20 हजार रुपये उधार दिले होते. निकलेस यांनी पैसे परत मागितले, तेव्हा नेहाल टाळाटाळ करू लागला. एवढेच नाही, तर त्याने कामावर येणेही बंद केले. पैशांवरून दोघांमध्ये आधीपासूनच कटुता होती.

28 ऑक्टोबरच्या रात्री निकलेस कटारे आपल्या मित्रांसोबत घराच्या गच्चीवर जेवण करत होते. त्याच वेळी नेहालही आपल्या मित्रांसोबत गच्चीवर पार्टी करत होता. नेहालच्या पार्टीत डीजेवर 'बाप तो बाप रहेगा, जलने वालों को जलने दे' हे गाणे जोरात वाजत होते. नेहाल निकलेस यांच्याकडे पाहून शिट्टीही वाजवू लागला, असे सांगितले जाते. उधारीवरून आधीच ताणले गेलेले संबंध असताना ही कृती निकलेस यांना आवडली नाही. त्यांनी फोन करून नेहालला जाब विचारला आणि इथूनच वाद चिघळला.

फोनवरील शाब्दिक बाचाबाचीनंतर प्रकरण शांत होण्याऐवजी आणखी पेटले. काही वेळातच नेहाल, सुजाता उके आणि भाग्यश्री उके यांच्यासह निकलेस यांच्या घरी पोहोचला. त्यांनी शिवीगाळ करून निकलेस यांच्या पत्नीला काठीने मारहाण केली, असा आरोप आहे. पत्नीला मार बसत असल्याचे पाहून निकलेस आणि त्यांचे मित्र मध्ये पडण्यासाठी धावले. त्याच दरम्यान नेहालने चाकू काढून निकलेस यांच्यावर वार केले, असा आरोप आहे. गळा, गाल आणि शरीराच्या इतर भागांवर वार झाल्याने निकलेस गंभीर जखमी झाले. अचानक झालेल्या या हल्ल्यामुळे घटनास्थळी एकच धावपळ उडाली. निकलेस यांची पत्नीही मारहाणीत जखमी झाली.

दुसऱ्या बाजूनेही प्रतिहल्ला झाला. निकलेस आणि त्यांच्या एका मित्राने नेहालवर हल्ला केला आणि काठीने केलेल्या मारहाणीत नेहालही जखमी झाला. घटनेनंतर परिसरात तणाव पसरला. जखमींना रुग्णालयात नेण्यात आले.

इमामवाडा पोलिसांनी निकलेस कटारे यांच्या तक्रारीवरून नेहाल, सुजाता आणि भाग्यश्री यांच्याविरुद्ध खुनाच्या प्रयत्नासह संबंधित कलमांखाली गुन्हा दाखल केला आहे. तसेच भाग्यश्री यांच्या तक्रारीवरून निकलेस आणि त्यांच्या एका मित्राविरुद्ध मारहाणीचा गुन्हा नोंदवण्यात आला आहे.