बिली रूटची क्रिकेटमधून निवृत्ती; जो रूटच्या धाकट्या भावाचा मोठा निर्णय

इंग्लंडचा माजी कर्णधार आणि स्टार फलंदाज जो रूट याचा धाकटा भाऊ बिली रूट याने व्यावसायिक क्रिकेटच्या सगळ्या प्रकारांतून निवृत्ती घेण्याचा निर्णय जाहीर केला आहे. वयाच्या ३४ व्या वर्षी त्याने ही घोषणा सोशल मीडियावर पोस्ट टाकून केली. तब्बल १४ वर्षांच्या यशस्वी कारकिर्दीनंतर आता आयुष्याच्या पुढच्या टप्प्याकडे जाण्याची योग्य वेळ आल्याचं बिलीने स्पष्ट केलं. क्रिकेटच्या मैदानाला अलविदा करण्याचा हा निर्णय त्याने स्वतः जाहीर केला असून याबाबतची माहिती त्याने चाहत्यांसोबत सोशल मीडियावरून शेअर केली.

बिली रूट हा डाव्या हाताचा उत्तम फलंदाज आणि उपयुक्त फिरकी गोलंदाज म्हणून ओळखला जातो. कौंटी क्रिकेटमधल्या १४ वर्षांच्या प्रवासात त्याने ग्लॅमॉर्गन, नॉटिंगहॅमशायर आणि लेस्टरशायर या संघांचं प्रतिनिधित्व केलं. या काळात अनेक वेळा महत्त्वाच्या खेळी करत त्याने संघाला विजय मिळवून देण्यात मोठा वाटा उचलला. विशेषतः ग्लॅमॉर्गन संघाकडून खेळताना सोफिया गार्डन्स या मैदानावर त्याने सलग सात वर्षे खेळ केला, ज्यात जवळपास पाच हजार धावा आणि दोन वन-डे कप विजेतेपदं याचा समावेश आहे. ग्लॅमॉर्गन क्रिकेट संघाने त्याच्या या दीर्घ आणि यशस्वी कारकिर्दीचा गौरवपूर्ण उल्लेख करत त्याला निरोप दिला आहे.

निवृत्तीची घोषणा करताना बिली रूट भावूक झाला होता. तो म्हणाला, "गेली १४ वर्षे व्यावसायिक क्रिकेट खेळणे हा माझ्यासाठी अतिशय सुंदर आणि अभिमानाचा प्रवास राहिला आहे. मैदानावर घालवलेला प्रत्येक क्षण माझ्यासाठी खास होता. मात्र आता बॅट खाली ठेवून आयुष्याच्या नव्या अध्यायाकडे, नव्या आव्हानांकडे आणि नव्या ध्येयांकडे पाऊल टाकण्याची हीच योग्य वेळ आहे." आपल्या भावना व्यक्त करताना त्याने आपल्या क्रिकेट प्रवासाबद्दल कृतज्ञताही व्यक्त केली.

रूट बंधूंच्या क्रिकेट प्रवासाची सुरुवात इंग्लंडमधल्या 'शेफील्ड कॉलेजिएट क्रिकेट क्लब'पासून झाली होती. लहानपणी जो आणि बिली या दोघांनी याच क्लबच्या मैदानावर तासनतास एकत्र सराव केला आणि क्रिकेटचे धडे गिरवले. दोघांच्याही आयुष्यात २०१३ मधला लॉर्ड्सवरचा कसोटी सामना खास आणि ऐतिहासिक ठरला होता. त्यावेळी जो रूट इंग्लंडच्या मुख्य संघातून आंतरराष्ट्रीय सामना खेळत होता, तर बिली रूट 'MCC यंग क्रिकेटर्स'चा भाग होता. बिली रूट आता २०२६ च्या हंगामाअखेरीस अधिकृतपणे क्रिकेटमधून निवृत्त होणार असून त्याच्या या निर्णयामुळे क्रिकेटविश्वात चर्चेला उधाण आलं आहे.