एशियन गेम्स: भारतीय महिला हॉकी संघाचा इंडोनेशियावर 17-1 असा दणदणीत विजय
भारतीय महिला हॉकी संघाने साखळी फेरीतील दुसऱ्या सामन्यात इंडोनेशियाला 17-1 असे लोळवले, त्याआधी उज्बेकिस्तानला 19-0 ने हरवले होते.
एशियन गेम्स 2026 मध्ये भारतीय महिला हॉकी संघाची घोडदौड सुरूच आहे. पहिल्या सामन्यात उज्बेकिस्तानला 19-0 अशा फरकाने चीत केल्यानंतर संघाने दुसऱ्या सामन्यातही आपली जबरदस्त फॉर्म कायम राखली आणि इंडोनेशियाला 17-1 असे धूळ चारली.
या सामन्यात भारतीय फॉरवर्ड लाइनने इंडोनेशियाच्या डिफेन्सची पार वाट लावली. सुरुवातीपासूनच भारतीय खेळाडूंनी मैदानावर वर्चस्व गाजवले आणि प्रतिस्पर्ध्याच्या गोलपोस्टवर सतत हल्ले चढवत एकामागोमाग एक गोल केले. दीपिका, ऋतुजा पिसाळ आणि नवनीत कौर या तिघींनी प्रत्येकी हॅटट्रिक करत आपापली कामगिरी उंचावली. यासोबतच सुनिता टोप्पो, लालरेमसियामी आणि साक्षी राणा यांनीही प्रत्येकी दोन-दोन गोल झळकावत विजयात मोलाचा वाटा उचलला. संघाची कर्णधार सलीमा टेटे आणि इशिका यांनीही प्रत्येकी एक-एक गोल नोंदवला.
सामन्याच्या पहिल्या दोन क्वार्टरमध्ये भारताचे पूर्ण वर्चस्व दिसून आले. पहिल्या हाफ अखेरच भारताने 9-0 अशी मोठी आघाडी घेतली होती. पहिल्या क्वार्टरमध्ये संघाने 4 गोल केले, तर दुसऱ्या क्वार्टरमध्ये आणखी 5 गोल करत आघाडी भक्कम केली. इंडोनेशियाकडून संपूर्ण सामन्यात एकच गोल झाला, तो तिसऱ्या क्वार्टरमध्ये इन्नेस आदित्य हिने केला. त्या एका गोलव्यतिरिक्त इंडोनेशियाला भारताच्या डिफेन्समध्ये एकदाही घुसता आले नाही.
तिसऱ्या क्वार्टरमध्ये इंडोनेशियाच्या गोलला प्रत्युत्तर देत भारताने तब्बल 5 गोल ठोकले. चौथ्या आणि शेवटच्या क्वार्टरमध्ये संघाने आणखी 3 गोल करत सामना 17-1 असा आपल्या नावावर केला. या सामन्यात 3 गोल करणाऱ्या दीपिकाने उज्बेकिस्तानविरुद्धच्या सामन्याप्रमाणेच दमदार फॉर्म कायम ठेवला. पहिल्या सामन्यात तिने एकट्याने चक्क 8 गोल केले होते, त्यामुळे दोन्ही सामन्यांत मिळून तिच्या नावावर एकूण 11 गोल जमा झाले आहेत.
या दणदणीत विजयासह भारतीय महिला हॉकी संघाने ब गटात अव्वल स्थान पटकावले आहे. पुढील सामन्यांतही हीच लय कायम राखण्याचा संघाचा प्रयत्न असणार आहे.
