अंबानींच्या घरी गणेशोत्सवात सलमान, सचिन, करीना-सैफसह सेलिब्रिटींची गर्दी

मुंबईतील उद्योगपती अंबानी कुटुंबाच्या 'एंटीलिया' या घरी दरवर्षीप्रमाणे यंदाही गणेशोत्सव मोठ्या थाटात साजरा होत आहे. गणेश चतुर्थीनिमित्त 'एंटीलिया चा राजा' विराजमान झाला असून, त्याच्या दर्शनासाठी बॉलिवूड आणि क्रीडा क्षेत्रातील अनेक मोठी नावं एंटीलियामध्ये पोहोचली. सलमान खान, विक्की कौशल, कतरिना कैफ, सैफ अली खान, करीना कपूर, रणवीर सिंह, सिद्धार्थ मल्होत्रा आणि कियारा आडवाणी यांच्यासह अनेक सेलिब्रिटी या सोहळ्याला हजर होते.

अभिनेता सलमान खान गणपती बाप्पाच्या दर्शनासाठी एंटीलियामध्ये पोहोचला. यापूर्वी त्याने भाऊ सोहेल खानच्या घरीही बाप्पाचं दर्शन घेतलं होतं. यावेळी सलमान क्लीन-शेव लूकमध्ये दिसला. हलक्या निळ्या रंगाचा चेक्स शर्ट, व्हाइट-वॉश डेनिम जीन्स आणि डोक्यावर बंदाना अशा कॅज्युअल स्टाइलमध्ये त्याने फोटोग्राफर्ससाठी पोझ दिल्या. विक्की कौशल आणि कतरिना कैफ या जोडीनेही एंटीलियामध्ये जाऊन बाप्पाचं दर्शन घेतलं.

सैफ अली खान आणि करीना कपूर आपली मुलं तैमूर आणि जहांगीर यांच्यासोबत या उत्सवाला हजर राहिले. या चौघांचाही पारंपरिक पेहराव लक्ष वेधून घेत होता. करीना मस्टर्ड यलो रंगाच्या सलवार सूटमध्ये दिसली, तर सैफने लाल कुर्ता-धोती परिधान केली होती. तैमूर आणि जेह यांनीही पारंपरिक कुर्ता घातला होता. यावेळी करिश्मा कपूरही करीना आणि तिच्या कुटुंबासोबत उपस्थित होती.

ज्येष्ठ अभिनेते जितेंद्र आपली मुलगी एकता कपूरसोबत अंबानींच्या गणपती पूजेत सामील झाले. एकता गुलाबी रंगाच्या पारंपरिक पोशाखात, तर जितेंद्र पांढरा कुर्ता-पायजम्यात दिसले. अभिनेता रितेश देशमुख पत्नी जेनेलिया डिसूझासोबत एंटीलियामध्ये पोहोचला. 'धुरंधर' या सिनेमामुळे चर्चेत असलेला अभिनेता रणवीर सिंहही या गणपती उत्सवाला हजर होता.

क्रिकेटचा महानायक सचिन तेंडुलकर आपल्या संपूर्ण कुटुंबासह अंबानींच्या गणपती पूजेत सहभागी झाला. सचिनने नारंगी रंगाचा कुर्ता आणि पांढरा पायजमा परिधान केला होता. पत्नी अंजली तेंडुलकर निळ्या साडीत, तर मुलगी सारा तेंडुलकर हिरव्या साडीत दिसत होती. मुलगा अर्जुन तेंडुलकर आणि सानिया चंडोक यांनीही या सोहळ्याला हजेरी लावली.

अभिनेता सिद्धार्थ मल्होत्रा आणि कियारा आडवाणी यांनीही अंबानी कुटुंबाच्या गणपती पूजेत सहभाग घेतला. कियारा गुलाबी साडीत, तर सिद्धार्थ प्रिंटेड शॉर्ट कुर्त्यात दिसला. दोघांनीही फोटोग्राफर्ससमोर पोझ दिल्या. एकंदरीत, एंटीलियामधील गणपती उत्सवात बॉलिवूड आणि क्रीडा क्षेत्रातील अनेक मोठ्या नावांनी हजेरी लावल्यामुळे यंदाच्या गणेशोत्सवाला वेगळीच रंगत आली आहे.