अमेझॉनवर दुचाकींची धूम, विक्री सहा पट; छोट्या शहरांचा मोठा वाटा

सणासुदीच्या दिवसांत ऑनलाइन खरेदीचा उत्साह वाढत असतानाच आता दुचाकी घेण्यासाठीही अनेक ग्राहक ऑनलाइन प्लॅटफॉर्मलाच पसंती देत आहेत. अमेझॉन इंडियावर ग्रेट इंडियन फेस्टिव्हल २०२६ दरम्यान दुचाकींच्या विक्रीने नवा विक्रम नोंदवला आहे. सरासरी दिवसाच्या तुलनेत विक्रीत सहा पट वाढ झाली असून, अवघ्या काही दिवसांतच दुचाकींच्या विक्रीने मोठी झेप घेतली आहे.

विशेष म्हणजे, ही खरेदी करण्यात महानगरांपेक्षा निमशहरी आणि छोट्या शहरांतील ग्राहक पुढे आहेत. एकूण दुचाकी विक्रीतला ६० टक्क्यांहून अधिक वाटा याच शहरांतील ग्राहकांचा असल्याचे अमेझॉनने जाहीर केले आहे. इलेक्ट्रिक स्कूटरपासून प्रीमियम बाइकपर्यंत सर्व प्रकारच्या गाड्यांना ग्राहकांकडून चांगला प्रतिसाद मिळत आहे.

हिरो मोटोकॉर्प, बजाज ऑटो, चेतक, अँपिअर, ट्रायम्फ आणि केटीएम या कंपन्यांच्या गाड्यांना ग्राहकांची पसंती आहे. सुरत, कोटा, विशाखापट्टणम, भुवनेश्वर, प्रयागराज, वारंगल, अमृतसर, लुधियाना, बेळगावी आणि कानपूर यांसारख्या शहरांमधूनही मोठ्या प्रमाणात खरेदी होत आहे.

या खरेदी महोत्सवात इलेक्ट्रिक गाड्यांच्या विक्रीनेही विशेष लक्ष वेधले आहे. चेतक आणि अँपिअर यांसारख्या ब्रँड्सच्या इलेक्ट्रिक दुचाकींची विक्री सरासरी दिवसाच्या तुलनेत आठ पट झाली आहे. दुसरीकडे, रोजच्या वापरासाठीच्या दुचाकींच्या विक्रीचा वेग १३.५ पट झाला आहे, तर प्रीमियम मोटारसायकलींच्या विक्रीत अडीच पट वाढ नोंदवली गेली आहे.

ग्राहकांना घरबसल्या २०० हून अधिक मॉडेल्सची माहिती घेता येते, तसेच वेगवेगळ्या गाड्यांची तुलना करून खरेदीचा निर्णय घेता येतो. त्यामुळे ऑनलाइन प्लॅटफॉर्मवरून दुचाकी घेण्याचा पर्याय अधिकाधिक लोकप्रिय होत असल्याचे दिसत आहे.

धनत्रयोदशी आणि दिवाळीच्या पार्श्वभूमीवर अमेझॉनने विविध आर्थिक सवलती जाहीर केल्या आहेत. अमेझॉन पे शॉपिंग लोनद्वारे ग्राहकांना दरमहा २,३५० रुपयांपासून ईएमआयवर दुचाकी घेता येणार आहे. परतफेडीसाठी २४ महिन्यांपर्यंतचा कालावधी उपलब्ध आहे, आणि पात्र ग्राहकांना कर्ज सुविधेचाही फायदा घेता येईल.

एचडीएफसी बँकेच्या क्रेडिट कार्डवर आणि ईझीईएमआयवर १० टक्क्यांपर्यंत त्वरित सवलत मिळणार आहे. याशिवाय इतर बँकांच्या कार्डवर ९ हजार रुपयांपर्यंत, कूपनद्वारे ३ हजार रुपयांपर्यंत आणि अमेझॉन पे यूपीआयद्वारे ७ हजार रुपयांपर्यंत बचत करता येणार आहे.

दुचाकीसोबत लागणाऱ्या वस्तूंच्या विक्रीतही वाढ झाली आहे. वाहनांच्या देखभालीसाठी आवश्यक असलेल्या हेल्मेट, डॅशकॅम, जीपीएस ट्रॅकर आणि रायडिंग गिअर यांना मागणी असून, अमेझॉनच्या ऑटोमोटिव्ह स्टोअरची विक्री सरासरी दिवसाच्या तुलनेत २.२ पट झाली आहे.