अक्षया नाईकचे क्लाऊनिंग प्रयोग; मालवणीतील रेड-लाईट एरियातील मुलांसाठी गणेशोत्सवात कलासेवा

मालिका, ओटीटी आणि थिएटर अशा वेगवेगळ्या माध्यमांतून प्रेक्षकांचं मनोरंजन करणारी अभिनेत्री अक्षया नाईक सध्या एका वेगळ्याच कारणामुळे चर्चेत आली आहे. अभिनयाव्यतिरिक्त तिच्या क्लाऊनिंगच्या कामामुळे तिच्याकडे लक्ष वेधलं गेलं आहे. यंदाचा गणेशोत्सव अक्षयासाठी खास ठरला, कारण तिने आपल्या कलेतून बाप्पाची सेवा करण्याचा एक वेगळा मार्ग शोधला आणि मालवणी, मालाड येथील रेड-लाईट एरियातील मुलांसाठी क्लाऊनिंगचे प्रयोग सादर केले.

अक्षया नाईक 'Clowns Without Borders India' या संस्थेशी जोडलेली आहे. या संस्थेच्या माध्यमातून सेक्स वर्कर्सची मुलं, रेड-लाईट एरियात राहणारी मुलं आणि वेगवेगळ्या वंचित समुदायांतील मुलांपर्यंत नाटक आणि क्लाऊनिंग पोहोचवण्याचं काम केलं जातं. या उपक्रमामागचा उद्देश हा आहे की या मुलांना काही काळासाठी त्यांच्या रोजच्या परिस्थितीपासून दूर नेऊन, त्यांच्याशी संवाद साधून, कलेच्या माध्यमातून त्यांना आनंदाचे काही क्षण द्यावेत.

यंदाच्या गणेशोत्सवात या संस्थेने मालवणी, मालाड येथील रेड-लाईट एरियामध्ये काम करणाऱ्या 'आस्था परिवार' या एनजीओसोबत टायअप केलं. त्यानंतर परिसरातील तीन गणपती मंडळांमध्ये जाऊन मुलांसाठी क्लाऊनिंगचे प्रयोग सादर करण्यात आले.

गणेशोत्सवाच्या काळात अनेक कलाकार आपली कला गणपती मंडळांमध्ये सेवा म्हणून सादर करत असतात, हे पाहून अक्षयाच्या मनात अनेकदा प्रश्न यायचा की क्लासिकल डान्स किंवा संगीत न शिकलेल्या आपल्यासारख्या कलाकाराने आपली कला बाप्पाच्या सेवेत कशी आणायची. यंदा तिला या प्रश्नाचं उत्तर सापडलं. लोकांना हसवणं हीसुद्धा एक मोठी सेवा आहे, असं ती मानते. बाप्पाच्या मंडपात उभं राहून क्लाऊनिंगचा प्रयोग सादर करता आला, यापेक्षा मोठा आनंद दुसरा नसल्याचं तिने सांगितलं. या संपूर्ण अनुभवाचं श्रेय तिने आपले दिग्दर्शक रूपेश टिल्लू आणि सहक्लाऊन अंकिता निकरड यांना दिलं.

या अनुभवातली आणखी एक खास गोष्ट अक्षयाने सांगितली. जिथे हे प्रयोग झाले, तो परिसर प्रामुख्याने मुस्लिम समुदायाचा आहे, आणि जिथे प्रयोग सादर झाला तिथे मशिदीच्या अगदी समोरच गणपतीचा मंडप उभारलेला होता. 'आस्था परिवार'सोबत काम करणाऱ्या बुरखा परिधान केलेल्या काही महिला स्वयंसेवक आणि शिक्षिकाही मुलांना घेऊन गणपतीच्या मंडपात आल्या होत्या. या मुलांमध्ये वेगवेगळ्या धर्मांची आणि पार्श्वभूमीची मुलं होती, मात्र त्या क्षणी सगळे एकत्र येऊन या आनंदाचा भाग झाले. धर्म आणि ओळख बाजूला ठेवून लोक एकमेकांच्या आनंदात सामील होतात, असे छोटे क्षण आजूबाजूला घडत असतात आणि लोकांना एकत्र आणण्याची हीच कला आणि परफॉर्मन्सची खरी ताकद असल्याचं अक्षयाला वाटतं.

प्रयोगादरम्यान अक्षया आणि तिच्या सहकाऱ्यांसमोर आणखी एक आव्हान उभं राहिलं. अचानक मुसळधार पाऊस सुरू झाला. पावसाचा आवाज इतका मोठा होता की एकमेकींचे आवाजही ऐकू येत नव्हते, आणि माइकचीही सोय नव्हती. तरीही या परिस्थितीत त्यांनी प्रयोग थांबवला नाही आणि मुलांसाठी सलग तीन प्रयोग सादर केले.

प्रयोग संपवून घरी परतताना शरीर थकलं होतं, मात्र मनात वेगळीच ऊर्जा होती, असं अक्षया सांगते. या अनुभवातून तिला पुन्हा एकदा जाणवलं की कला केवळ रंगमंचावर सादर करण्यासाठीच नसते, तर एखाद्याच्या चेहऱ्यावर हसू आणण्यासाठी, समुदायांना जवळ आणण्यासाठी आणि कोणाच्या आयुष्यात काही क्षणांचा आनंद निर्माण करण्यासाठीही तिचा वापर होऊ शकतो. यंदाच्या गणेशोत्सवात आपल्या कलेच्या माध्यमातून बाप्पाच्या चरणी सेवा करता आली, हीच आपल्यासाठी सर्वात सुंदर गोष्ट असल्याचं अक्षया नाईकने सांगितलं.