मेस्सीचा उशिराचा गोल, इंटर मियामीने न्यू इंग्लंडला 2-1 ने हरवले

लियोनल मेस्सी (Lionel Messi) याने एक उत्तम असिस्ट दिला आणि सामना संपायला आला असताना स्वतः गोलही केला. त्याच्या जोरावर इंटर मियामीने न्यू इंग्लंड रिव्हॅल्यूशनला 2-1 ने हरवले. या विजयामुळे मियामीने पुढच्या वर्षी होणाऱ्या कॉन्काकॅफ चॅम्पियन्स फुटबॉल चषकातील आपली जागा निश्चित केली आहे.

एमएलएस चषक प्लेऑफ सुरू होण्याआधी इंटर मियामी ईस्टर्न कॉन्फ्रेंसमध्ये नंबर 2 सीडवर पोहोचला आहे. या हंगामात मेस्सीच्या नावावर आतापर्यंत 26 गोल आणि 16 असिस्ट नोंदले गेले आहेत. असिस्ट म्हणजे सहकाऱ्याला गोल करायला मदत करणे. सलग तिसऱ्यांदा एमएलएस एमव्हीपी पुरस्कार आणि सलग दुसऱ्यांदा 'गोल्डन बूट' जिंकण्याच्या शर्यतीत तो आघाडीवर आहे.

सामन्याचे पहिले 45 मिनिटे दोन्ही संघांनी कडवी झुंज दिली. हाफ टाईमपर्यंत एकाही संघाला गोल करता आला नाही. त्या काळात इंटर मियामीला 28 व्या मिनिटाला चांगली संधी मिळाली होती. मेक्सिकन खेळाडू बर्टेरामेने बॉक्सच्या डाव्या बाजूने डाव्या पायाने शॉट मारला, पण न्यू इंग्लंडचा गोलकीपर मॅट टर्नर याने तो अडवला आणि गोल होऊ दिला नाही.

दुसऱ्या हाफमध्ये यजमान न्यू इंग्लंडने आधी खाते उघडले. 53 व्या मिनिटाला डॅनियल गाजदागने गोल करून त्यांना आघाडी मिळवून दिली. मात्र इंटर मियामीने लगेच हार मानली नाही. 69 व्या मिनिटाला सांघिक खेळाच्या जोरावर त्यांनी स्कोर 1-1 असा बरोबरीत आणला.

या बरोबरीच्या गोलची सुरुवात सेगोवियाने केली. त्याने बॉक्सच्या आत 'लॉब' पास दिला. त्यावर मेस्सीने हेडरने चेंडू बर्टेरामेच्या दिशेने टोलावला. बर्टेरामेने बॉक्सच्या दिशेने हेडरनेच जोरदार प्रहार केला आणि चेंडू गोल पोस्टमध्ये पोहोचवला. यंदाच्या हंगामातील हा बर्टेरामेचा 10 वा गोल ठरला. मेस्सीच्या नावावर या लीगमधला त्याचा 16 वा असिस्ट जमा झाला.

सामन्याचे पारडे 83 व्या मिनिटाला इंटर मियामीच्या बाजूने झुकले. उत्तम पासिंगच्या साखळीनंतर मेस्सीने निर्णायक गोल केला. सुआरेजने बॉक्सच्या बाहेर मेस्सीकडे चेंडू पास केला. तिथे अर्जेंटिनाच्या या स्टार खेळाडूने तीन डिफेंडर्सना चकवले. त्यानंतर सेगोवियाच्या मदतीने त्याने चेंडू बॉक्सच्या आत पोहोचवला.

या गोलमुळे मेस्सीच्या गोलची एकूण संख्या 26 झाली. त्यामुळे तो एमएलएस 2026 च्या गोल्डन बूटच्या शर्यतीत खूप पुढे निघून गेला आहे. यंदाच्या हंगामात सेगोवियाच्या असिस्टची संख्या 12 झाली आहे. त्यानंतर अखेरची शिट्टी वाजेपर्यंत स्कोरलाइन तशीच राहिली आणि इंटर मियामीने बाहेरच्या मैदानात खेळताना तीन गुण मिळवले.