'तुम मेरे हो'च्या प्रमोशनसाठी ईशा मालवीय आणि गुरमीत चौधरी पुण्यात; दगडूशेठ गणपतीचे घेतले दर्शन

पुणे : बहुप्रतीक्षित 'तुम मेरे हो' या चित्रपटाच्या प्रमोशनसाठी अभिनेत्री ईशा मालवीय आणि अभिनेता गुरमीत चौधरी यांनी पुण्यात हजेरी लावली. हे दोघे कलाकार शहरात आल्यामुळे पुण्यातील चित्रपटप्रेमी आणि चाहत्यांमध्ये मोठा उत्साह पाहायला मिळाला.

या भेटीत दोन्ही कलाकारांनी चाहत्यांशी संवाद साधला आणि चित्रपटाविषयी माहिती दिली. तसेच त्यांनी पुण्यातील प्रसिद्ध श्रीमंत दगडूशेठ हलवाई गणपती मंदिरात जाऊन बाप्पाचे दर्शन घेतले आणि आशीर्वाद घेतले. पुणे दौऱ्यादरम्यान त्यांनी मंदिराला भेट दिली. दर्शनानंतर त्यांनी चाहत्यांशी गप्पा मारल्या आणि त्यांच्यासोबत फोटोही काढले. आपल्या आवडत्या कलाकारांना प्रत्यक्ष भेटण्याची संधी मिळाल्याने चाहत्यांनी आनंद व्यक्त केला.

'तुम मेरे हो' हा चित्रपट आकाश आणि तमन्ना यांच्या प्रेमकथेवर आधारित आहे. या चित्रपटात गुरमीत चौधरी हे आकाशची भूमिका साकारत आहेत, तर ईशा मालवीय तमन्नाच्या भूमिकेत दिसणार आहेत. या दोघांच्या नात्यातील प्रेम, संघर्ष आणि भावनिक गुंतागुंत चित्रपटाच्या कथानकातून उलगडणार आहे.

चित्रपटात आकाश आणि तमन्ना यांच्या नात्याची सुरुवातच अनेक आव्हानांनी भरलेली आहे. त्यांच्या प्रेमाच्या प्रवासात अनपेक्षित अडचणी, भावनिक चढ-उतार आणि कठीण निर्णयांचा सामना त्यांना करावा लागतो. या सर्व परिस्थितींवर मात करून त्यांचे प्रेम टिकून राहणार का आणि त्यांच्या नात्याला सुखद शेवट मिळणार का, याची उत्सुकता प्रेक्षकांना लागली आहे.

या चित्रपटाचे दिग्दर्शन आशिष पांडा यांनी केले आहे. प्रेमकथेच्या माध्यमातून नात्यांमधील भावना, संघर्ष आणि एकमेकांवरील विश्वास यांचे चित्रण करण्याचा प्रयत्न या चित्रपटात करण्यात आला आहे.

चित्रपटाच्या प्रमोशनची संपूर्ण जबाबदारी फ्रीकआऊट एंटरटेनमेंटचे व्यवस्थापकीय संचालक आकर्षण कटियार यांनी सांभाळली आहे. पुण्यातील या प्रमोशनल भेटीमुळे 'तुम मेरे हो' या चित्रपटाबद्दल प्रेक्षकांमधील उत्सुकता आणखी वाढली आहे.