शरद पवार रुबी रुग्णालयातून घरी निघाले, मोदींनी फोनवरून तब्येतीची विचारपूस केली

राष्ट्रवादी काँग्रेस शरदचंद्र पवार पक्षाचे अध्यक्ष शरद पवार यांना आज पुण्याच्या रुबी रुग्णालयातून डिस्चार्ज देण्यात आला. दोन दिवस तिथे उपचार घेतल्यानंतर ते रुग्णालयातून बाहेर पडले आणि थेट मुंबईतील सिल्व्हर ओक या निवासस्थानाकडे निघाले. त्यांच्यासोबत खासदार सुप्रिया सुळे आणि प्रतिभा पवार आहेत. डॉक्टरांनी पवार यांना आराम करण्याचा सल्ला दिला आहे, तसेच त्यांची प्रकृती ठीक असल्याची माहिती समोर आली आहे.

दोन दिवसांपूर्वी पवार यांची तब्येत बिघडली होती. त्यामुळे त्यांना तातडीने रुबी रुग्णालयात दाखल करावे लागले. त्यांना कफ झाला होता आणि थकवाही जाणवत होता. ते दुष्काळी दौऱ्यावर होते, त्या वेळी उन्हामुळे आणि अचानक आलेल्या पावसामुळे वातावरणात बदल झाला आणि त्यातून कफ झाला, असे सांगण्यात आले. त्यानंतर त्यांचा दुष्काळी पाहणीचा दौरा रद्द करण्यात आला, तसेच त्यांचे सर्व ठरलेले कार्यक्रमही रद्द झाले. रुग्णालयात लगेच उपचार सुरू करण्यात आले आणि विविध चाचण्या करण्यात आल्या. प्रकृती आता स्थिर झाल्यामुळे दोन दिवसांनी त्यांना घरी सोडण्यात आले. पुढचे काही दिवस ते सिल्व्हर ओकवर आराम करणार आहेत.

पवार यांना पंतप्रधान नरेंद्र मोदी यांचा फोन आल्याची माहिती पवार यांचे निकटवर्तीय विठ्ठल मणियार यांनी दिली. मणियार यांच्या म्हणण्यानुसार, तब्येतीची चौकशी करण्यासाठी अनेक फोन आले, पण आजचा महत्त्वाचा फोन मोदी यांचा होता. मोदी यांनी पवार यांच्या प्रकृतीची विचारपूस केली आणि काळजी घेण्याचे आवाहन केले. मणियार यांनी सांगितले की मोदी अत्यंत प्रेमाने म्हणाले, "शरदराव, तुम्ही स्वतःच्या आरोग्याकडे लक्ष द्या, देशाकडे लक्ष देण्यासाठी सुप्रिया सुळे आहेत, त्यांच्यासोबत आम्ही काम करू. तुम्ही विश्रांती घ्या आणि आम्हाला मार्गदर्शन करत राहा, मार्ग दाखवत राहा. तुम्ही काळजी घेणे आणि या गोष्टींपासून थोडे दूर राहणे गरजेचे आहे. तुमचे आरोग्य उत्तम राहावे हीच आमची इच्छा आहे, तुमचा सल्ला आम्हाला मिळत राहो आणि तुम्ही तंदुरुस्त राहा." अशा प्रकारे मोदी यांनी इच्छा व्यक्त केली आणि सदिच्छाही दिल्या, असे मणियार यांनी सांगितले.

डॉक्टरांनी काय सांगितले, याबद्दलही मणियार यांनी माहिती दिली. त्यांच्या म्हणण्यानुसार, डॉक्टरांनी पवार यांना दौरे आणि प्रवास कमी करायला सांगितले आहे, त्यात थोड्या मर्यादा आणायला हव्यात. तसेच आहारही नीट घ्यायला हवा. मणियार म्हणाले की, पवार खाण्याच्या बाबतीत फारशी दक्षता घेत नाहीत, त्यांना हे खा, ते खा असे सांगावे लागते. ऑपरेशननंतर साहेबांना लिक्विड डाएट घ्यावे लागते आणि सारखे तेच घेऊन माणूस कंटाळतो. आता थोडा बदल होत आहे, ते दुधासोबत भाकरी वगैरे खात आहेत, त्यामुळे हळूहळू त्यांचा अशक्तपणा कमी होईल, असे मणियार यांनी म्हटले. पवार यांनी दोन-चार दिवस आराम केला पाहिजे, असेही ते म्हणाले.

डिस्चार्ज मिळाल्यानंतर पवार यांना व्हीलचेअरवरून रुग्णालयाबाहेर आणण्यात आले. बाहेर जमलेल्या कार्यकर्त्यांना आणि पदाधिकाऱ्यांना पाहून त्यांनी हात उंचावले, त्याचा फोटो समोर आला आहे. त्यानंतर ते कारमध्ये बसून मुंबईच्या दिशेने रवाना झाले. प्रतिभा पवार आणि खासदार सुप्रिया सुळे त्यांच्यासोबत होत्या. रुग्णालयातून निघण्यापूर्वी सुप्रिया सुळे यांनी तिथले डॉक्टर आणि सर्व स्टाफचे हात जोडून आभार मानले.