राष्ट्रवादीची कोअर कमिटी बुधवारी सकाळी ९ वाजता पुन्हा बसणार, देवगिरीवर आमदारांची चार तास बैठक

राष्ट्रवादी काँग्रेसच्या वरिष्ठ नेत्यांच्या एका गटाने दिल्लीत जाऊन केंद्रीय गृहमंत्री अमित शाह यांची परस्पर भेट घेतली. त्यानंतर महाराष्ट्रात राजकीय घडामोडींना वेग आला आहे. पक्षात आता बैठकांमागून बैठका सुरू आहेत.

राष्ट्रवादीच्या कोअर कमिटीची बैठक बुधवारी सकाळी ९ वाजता पुन्हा एकदा बोलावण्यात आली आहे. वरिष्ठ नेते रविवारी रात्री दिल्लीत अमित शाह यांना भेटले होते. त्याच्या दुसऱ्या दिवशी कोअर कमिटीची बैठक झाली. वरिष्ठ नेत्यांनी सुनेत्रा पवार आणि पार्थ पवार यांना बाजूला ठेवून शाह यांची भेट घेतल्यानंतरची कोअर कमिटीची ही दुसरी बैठक आहे. त्यामुळे बैठकीत काय ठरणार, याची सगळ्यांना उत्सुकता आहे.

सुनेत्रा पवार आणि पार्थ पवार विरुद्ध अजितदादा गटातील वरिष्ठ नेते असा संघर्ष गेल्या अनेक महिन्यांपासून सुरू असल्याची चर्चा राजकीय वर्तुळात होत असते. वरिष्ठ नेत्यांच्या दिल्लीवारीनंतर या चर्चेला आणखी बळ मिळाले आहे. वरिष्ठ नेते आणि खासदार पार्थ पवार यांच्यातील वाढत्या संघर्षाच्या पार्श्वभूमीवर या बैठकीला विशेष महत्त्व आले आहे, असे सांगितले जात आहे.

मंगळवारी रात्री मुंबईतील देवगिरी बंगल्यावर राष्ट्रवादीच्या आमदारांची बैठक झाली. ही बैठक जवळपास चार तास चालली आणि रात्री उशिरा संपली. त्यानंतर काही तासांतच बुधवारी सकाळी कोअर कमिटीचे नेते पुन्हा एकत्र येणार आहेत.

या बैठकीला १७ आमदारांनी दांडी मारली. ५० पैकी ३३ आमदारच हजर होते, असे सांगितले जाते. राष्ट्रवादीचे विधानसभेत ४१ आमदार आहेत, पण मंगळवारच्या बैठकीला २९ आमदारच आले आणि विधानसभेचे १२ आमदार गैरहजर होते, असाही उल्लेख आहे.

बैठकीत आमदारांनी आपली नाराजी बोलून दाखवली. आपला पक्ष सत्तेत असूनही कामे होत नाहीत, अशी त्यांची तक्रार होती. काही आमदारांनी एकनाथ शिंदे यांच्याकडून कामे होत नसल्याची तक्रार केली. वरिष्ठ नेत्यांमध्ये जे वाद सुरू आहेत, त्याबद्दल खाली आमच्यापर्यंत काहीच कळत नाही, असेही आमदारांनी सांगितले. वरिष्ठ नेत्यांमधील संघर्षाच्या गोष्टी सतत बाहेर येत असल्याने पक्ष कमजोर होत आहे, अशी भावना आमदारांनी व्यक्त केली.

देवगिरीवरील बैठकीनंतर सुनील तटकरे यांनी प्रसारमाध्यमांशी संवाद साधला. पक्षांतर्गत वादाच्या वृत्ताचे त्यांनी खंडन केले. बैठकीत सर्व आमदारांना स्पष्ट आदेश देण्यात आले आहेत, असे तटकरे यांनी सांगितले. आमदारांनी शेतकऱ्यांच्या बांधावर जावे, त्यांच्या समस्या जाणून घ्याव्यात आणि शेतकऱ्यांचे जास्तीत जास्त प्रश्न सोडवण्याचा प्रयत्न करावा, असा तो आदेश असल्याचे त्यांनी सांगितले.