खराडीतील लॉजमध्ये 26 वर्षांच्या तरुणाची आत्महत्या; पोलीस स्टेशनमध्ये गुन्हा नोंद

पुण्यातील खराडी परिसरातल्या एका लॉजमध्ये 26 वर्षांच्या तरुणाने आत्महत्या केल्याची घटना समोर आली आहे. अक्षय कालिदास कांबळे असे या तरुणाचे नाव आहे. तो हवेली तालुक्यातील पेरणे फाटा येथे राहत होता. पोलिसांच्या माहितीनुसार, लग्न जमत नसल्याने आणि आर्थिक अडचणींमुळे तो नैराश्यात होता.

ही घटना 29 ऑक्टोबर रोजी दुपारी साधारण 2.10 च्या सुमारास उघडकीस आली. खराडीतील तुळजाभवानी नगर भागात असलेल्या हॉटेल गौरव रेसिडेन्सीच्या तिसऱ्या मजल्यावरील खोली क्रमांक 302 मध्ये हा प्रकार घडला. अक्षय हा भारतीय स्टेट बँकेच्या भीमा कोरेगाव परिसरातील कार्यालयात कंत्राटी पद्धतीने काम करत होता.

खराडी पोलीस स्टेशनचे वरिष्ठ पोलीस निरीक्षक संजय चव्हाण यांनी सांगितले की, अक्षयने 27 ते 29 ऑक्टोबर या तीन दिवसांसाठी ही खोली बुक केली होती. तो 27 ऑक्टोबरला दुपारी बारा वाजण्याच्या सुमारास लॉजमध्ये आला. चेक-आउटची वेळ झाल्यावर 29 तारखेला लॉजच्या कर्मचाऱ्यांनी त्याच्या खोलीचा दरवाजा वाजवला, पण आतून काहीच उत्तर आले नाही. त्यामुळे त्यांनी डुप्लिकेट चावीने दरवाजा उघडला. तेव्हा अक्षयच्या डोक्याला गोळी लागलेली दिसली आणि त्याच्याजवळ गावठी पिस्तूल पडलेले होते.

अक्षयने एक गोळी झाडून आत्महत्या केल्याची प्राथमिक माहिती आहे. लग्न जमत नव्हते आणि आर्थिक अडचणी होत्या, म्हणून तो नैराश्यात होता. मात्र त्याच्या कुटुंबात कोणतेही वाद नव्हते, असेही वरिष्ठ पोलीस निरीक्षक चव्हाण यांनी स्पष्ट केले.

या प्रकरणी खराडी पोलीस स्टेशनमध्ये गुन्हा क्रमांक 380/2026 नुसार गुन्हा नोंदवण्यात आला आहे. त्यात भारतीय शस्त्र अधिनियमाचे कलम 3(25) तसेच महाराष्ट्र पोलीस कायद्याचे कलम 37(1)(3) सह 135 लावण्यात आले आहे. सहाय्यक पोलीस निरीक्षक मीरा लक्ष्मण चव्हाण यांनी याबाबत खराडी पोलीस स्टेशनमध्ये फिर्याद दिली आहे.

पोलिसांनी दिलेल्या माहितीनुसार, अक्षय पेरणे फाटा येथील पूर्वरंग सोसायटीत राहत होता. त्याचे लग्न जमत नव्हते आणि तो ज्या तरुणीवर प्रेम करत होता, तिने दुसऱ्याबरोबर लग्न केले, असे सांगितले जाते. त्या निराशेतून त्याने हे टोकाचे पाऊल उचलले असावे, असे पोलिसांचे म्हणणे आहे.

आत्महत्येपूर्वी अक्षयने आपल्या मित्रांना शेवटचा मेसेज पाठवला होता. त्यात त्याने "आपली ही शेवटची भेट, त्यानंतर पुढच्या जन्मी भेटू", असे लिहिले होते. दुसऱ्या दिवशी खोली उघडली न गेल्याने हॉटेल व्यवस्थापकांनी खोलीत जाऊन पाहिले, तेव्हा अक्षय हातात पिस्तूल असलेल्या अवस्थेत खाली पडलेला आढळला.