कॅप्सूलमध्ये ब्लेडचे तुकडे भरून पत्नीला दिल्याप्रकरणी पुण्यात पतीला 7 वर्षे सक्तमजुरी

पत्नीला जीवे मारण्याच्या उद्देशाने कॅप्सूलमध्ये ब्लेडचे तुकडे भरून खायला दिल्याच्या प्रकरणात पुण्याच्या न्यायालयाने पतीला शिक्षा सुनावली आहे. आरोपी पतीला 7 वर्षे सक्तमजुरी आणि 70,000 रुपयांचा दंड ठोठावण्यात आला. सुनावणीदरम्यान पत्नी आणि मुलाने आरोपीच्या बाजूने साक्ष दिली होती. तरीही वैद्यकीय पुरावे आणि डॉक्टरांची साक्ष यांच्या आधारे न्यायालयाने हा निकाल दिला.

शिक्षा झालेल्या आरोपीचे नाव सोमनाथ साधू सपकाळ (वय 45) असे आहे. तो उत्तमनगर परिसरातील शिवणे येथे राहत होता. पत्नीच्या चारित्र्यावर संशय घेऊन तो तिला मानसिक आणि शारीरिक त्रास देत असल्याचा आरोप त्याच्यावर होता.

ऑक्टोबर 2023 मध्ये या महिलेच्या पोटात अचानक तीव्र वेदना सुरू झाल्या. सुरुवातीला त्रासाचे नेमके कारण कळले नाही. काही दिवसांनी शौचावाटे ब्लेडचे तुकडे बाहेर पडले आणि तेव्हा हा सगळा प्रकार समोर आला. त्यामुळे परिसरात खळबळ उडाली होती.

वेदना वाढल्यामुळे महिलेला 11 नोव्हेंबर रोजी रुग्णालयात दाखल करण्यात आले. डॉक्टरांनी सोनोग्राफीसह आवश्यक त्या तपासण्या केल्या, तेव्हा तिच्या पोटात ब्लेडचा तुकडा अडकल्याचे दिसून आले. तिच्या प्रकृतीला गंभीर धोका निर्माण झाला होता, म्हणून डॉक्टरांनी तातडीने शस्त्रक्रिया करून तो तुकडा बाहेर काढला.

कॅल्शियमच्या गोळ्या असल्याचे सांगून कॅप्सूलमधून ब्लेडचे तुकडे खायला दिल्याचा आरोप पतीवर करण्यात आला. या प्रकरणी उत्तमनगर पोलिसांनी सोमनाथ सपकाळ याच्याविरोधात हत्येचा प्रयत्न केल्याचा गुन्हा दाखल केला होता.

खटल्याच्या सुनावणीत मात्र एक वेगळा टप्पा आला. पीडित महिलेने आणि तिच्या मुलाने न्यायालयात आपली साक्ष बदलली. पती-पत्नीमधील वाद मिटला आहे, असे सांगून त्यांनी आरोपीविरोधातील आरोप फेटाळल्याची माहिती आहे.

सरकारी पक्षाने मात्र वैद्यकीय पुरावे आणि डॉक्टरांच्या साक्षीवर भर दिला. सरकारी वकील ॲड. पाठक यांनी 7 साक्षीदार तपासले. ब्लेडचा तुकडा अन्ननलिकेला किंवा आतड्याला इजा करून अंतर्गत रक्तस्राव घडवू शकला असता आणि त्यामुळे महिलेच्या जीवाला धोका निर्माण झाला असता, अशी महत्त्वाची साक्ष डॉक्टरांनी दिली.

न्यायालयाने वैद्यकीय आणि वैज्ञानिक पुराव्यांचा विचार केला आणि पत्नीची बदललेली साक्ष निर्णायक मानली नाही. आरोपीविरोधातील आरोप सिद्ध करण्यासाठी उपलब्ध पुराव्यांना न्यायालयाने महत्त्व दिले.

शिक्षेवर युक्तिवाद करताना बचाव पक्षाने सांगितले की आरोपी हा कुटुंबातील एकमेव कमावता सदस्य आहे. पत्नी आणि मुलगा त्याच्यावर अवलंबून आहेत, हेही न्यायालयाच्या निदर्शनास आणून देण्यात आले.

पण प्रकरणाचे गांभीर्य, महिलेच्या जीवाला निर्माण झालेला धोका आणि वैद्यकीय पुरावे लक्षात घेऊन पुण्याच्या न्यायालयातील अतिरिक्त सत्र न्यायाधीशांनी आरोपीला 7 वर्षे सक्तमजुरीची शिक्षा सुनावली. त्यासोबत 70,000 रुपयांचा दंडही ठोठावला. गंभीर गुन्ह्यांत पीडित व्यक्ती किंवा साक्षीदारांनी साक्ष बदलली, तरी ठोस वैद्यकीय आणि वैज्ञानिक पुराव्यांच्या आधारे न्यायालय निर्णय देऊ शकते, हे या निकालाने पुन्हा अधोरेखित झाले आहे.