अजित पवारांच्या विमान अपघाताला ९ महिने; जय पवार पुण्यात सीआयडी कार्यालयात

राष्ट्रवादीचे नेते जय पवार थोड्याच वेळात पुणे सीआयडी कार्यालयात जाणार आहेत. राज्याचे माजी उपमुख्यमंत्री, दिवंगत अजित पवार यांच्या निधनाला ९ महिने उलटून गेले आहेत. त्यांच्या विमान अपघाताचा तपास गेल्या ९ महिन्यांत कुठपर्यंत आला, याची माहिती जय पवार घेणार आहेत. अजित पवार यांच्या विमान अपघाताला आज ९ महिने पूर्ण होत आहेत.

अजितदादांच्या निधनाला ९ महिने उलटून गेले, तरी या अपघाताचे गूढ अजूनही उकललेले नाही. त्यामुळे आश्चर्य व्यक्त केले जात आहे. या प्रकरणाचा तपास सीआयडी करत आहे, पण तपासातील कोणतीही नवी माहिती समोर येत नसल्याने अजितदादांच्या समर्थकांमध्ये संभ्रमाचे वातावरण आहे.

अशा परिस्थितीत सीआयडी जय पवार यांना काय माहिती देते, याकडे सगळ्यांचे लक्ष लागले आहे. सीआयडी अधिकाऱ्यांना भेटल्यानंतर जय पवार माध्यमांशी बोलण्याची शक्यता आहे.

अजितदादांच्या निधनानंतर आमदार रोहित पवार यांनी हा अपघात नसून घातपात असल्याचा संशय व्यक्त केला होता. त्यांनी वेळोवेळी पत्रकार परिषदा घेऊन त्याबाबतचे पुरावे सादर केले होते. तसेच या प्रकरणाची उच्च स्तरीय चौकशी करावी, अशी मागणीही त्यांनी केली होती. या प्रकरणी आधी गुन्हा दाखल झाला पाहिजे, अशी मागणीही रोहित पवार यांनी केली होती. गुन्हा दाखल करून घेण्याचा प्रयत्नही त्यांनी केला होता, पण त्यांचा गुन्हा दाखल करून घेतला गेला नव्हता.

याच दरम्यान उपमुख्यमंत्री सुनेत्रा पवार यांच्या नेतृत्वाखाली राष्ट्रवादीच्या नेत्यांनी मुख्यमंत्री देवेंद्र फडणवीस यांची भेट घेतली होती. या अपघाताची सीबीआय चौकशी व्हावी, अशी मागणी त्यांनी या भेटीत केली होती. मात्र आजपर्यंत हे प्रकरण सीबीआयकडे देण्यात आलेले नाही. ते सीआयडीकडेच सोपवण्यात आलेले आहे.

यावरून विरोधकांनी अजितदादा गटावर वारंवार हल्ला चढवला होता. सत्तेत असूनही अजितदादांच्या अपघात प्रकरणाच्या चौकशीबाबत अनास्था दिसत आहे आणि अजित पवार यांचे कुटुंबीय या अपघातावर काहीच बोलत नाहीत, अशी टीका केली जात होती. या पार्श्वभूमीवर आज जय पवार सीआयडी कार्यालयात जात असल्याने या भेटीला विशेष महत्त्व प्राप्त झाले आहे.