मुख्यमंत्र्यांचा OSD असल्याचे भासवून कंत्राटदाराला ३.२५ कोटींचा गंडा, मरीन ड्राइव्ह पोलिसांकडून आरोपीला अटक

मुख्यमंत्री देवेंद्र फडणवीस यांचा विशेष कार्य अधिकारी (OSD) असल्याचे भासवून एका कंत्राटदाराची ३.२५ कोटी रुपयांची फसवणूक करण्यात आल्याचा प्रकार मुंबईत समोर आला आहे. या प्रकरणी मरीन ड्राइव्ह पोलिसांनी छत्रपती संभाजीनगर येथील आसिफ इस्माईल पठाण या ४० वर्षांच्या आरोपीला अटक केली आहे.

कंत्राटदाराची सार्वजनिक बांधकाम विभागाची (PWD) ५० कोटी रुपयांची बिले प्रलंबित होती, म्हणजेच त्यांना अजून मंजुरी मिळालेली नव्हती. ही बिले मंजूर करून देतो, असे आमिष आरोपीने दाखवले होते. बिले मंजूर करून देण्यासाठी कमिशनच्या नावाखाली ३.२५ कोटी रुपये उकळल्याचा त्याच्यावर आरोप आहे.

तक्रारदार रणजीतसिंग ओबेरॉय हे अकोल्यातील ओबेरॉय कन्स्ट्रक्शनचे कंत्राटदार आहेत. त्यांचे बिल थकलेले होते. आरोपीने आधी त्यांना विश्वासात घेतले आणि आपण मंत्रालयात बड्या हुद्द्यावर काम करतो, अशी थाप मारली. ओबेरॉय यांनी त्याच्यावर विश्वास ठेवला.

ठरल्याप्रमाणे ओबेरॉय १० सप्टेंबर रोजी मुंबईत आले. त्या दिवशी एका कथित साथीदाराच्या मदतीने पठाण याने त्यांच्याकडून १.२५ कोटी रुपये स्वीकारले होते. आपण मंत्रालयात वरिष्ठ अधिकारी आहोत, असेच त्याने त्यांना भासवले होते.

एवढी रक्कम घेतल्यानंतरही आरोपीकडून आणखी ७५ लाख रुपयांची मागणी करण्यात आली. त्यानंतर ३० सप्टेंबर रोजी ओबेरॉय स्वतः मंत्रालयात गेले आणि त्यांनी तिथे चौकशी केली. तेव्हा अशी कोणतीही व्यक्ती सरकारी अधिकारी नसल्याचे त्यांना समजले. आपली फसवणूक झाल्याचे लक्षात येताच त्यांनी पोलिसांत तक्रार दाखल केली.

अटकेनंतर आरोपीला न्यायालयात हजर करण्यात आले. त्या वेळी न्यायालयाने त्याला ६ नोव्हेंबरपर्यंत पोलीस कोठडी सुनावली.

पोलिसांचा तपास सध्या सुरू आहे. या गुन्ह्यातील इतर साथीदारांचा शोध घेतला जात आहे. उकळलेली रक्कम तसेच गुन्ह्यात वापरलेले वाहन जप्त करण्यासाठीही पोलीस तपास करत आहेत. याच पद्धतीने इतर कंत्राटदारांचीही फसवणूक झाली असावी, असा पोलिसांना संशय आहे.