राज्यात 15 आयपीएस, आरपीएस अधिकाऱ्यांच्या बदल्या; ठाण्यातील तिघांना एक वर्षाची मुदतवाढ

महाराष्ट्र पोलीस दलात मोठा फेरबदल झाला आहे. राज्यातील आयपीएस आणि आरपीएस अधिकाऱ्यांच्या बदल्या करण्यात आल्या असून, त्याचे आदेश गृह विभागाने काढले आहेत. याच आदेशात ठाणे पोलीस दलातील तीन वरिष्ठ अधिकाऱ्यांना एक वर्षाची मुदतवाढ दिली आहे. या मुदतवाढीकडे सगळ्यांचे विशेष लक्ष लागले आहे.

गृह विभागाने हा शासन आदेश 2 नोव्हेंबर 2026 रोजी जारी केला. पोलीस आस्थापना मंडळ क्रमांक एकच्या शिफारशीनुसार हा निर्णय घेण्यात आला आहे. ठाणे शहर पोलीस दलातील गुन्हे शाखेचे अमरसिंग जाधव, परिमंडळ क्रमांक 5 चे पोलीस उपायुक्त प्रशांत कदम आणि कोकण परिक्षेत्राच्या लाचलुचपत प्रतिबंधक विभागाचे शिवराज पाटील यांना एक वर्षाची मुदतवाढ मिळाली आहे. यामुळे या अधिकाऱ्यांना आपल्या जबाबदारीच्या पदावर आणखी एक वर्ष काम करता येणार आहे.

सूत्रांनी दिलेल्या माहितीनुसार, एसआयटी प्रमुख अमरसिंह जाधव आणि उपायुक्त प्रशांत कदम यांना प्रदीप पूर्णेकर हत्या प्रकरणामुळे ही एक वर्षाची मुदतवाढ देण्यात आली आहे.

बदल्यांच्या यादीतही काही महत्त्वाची नावे आहेत. अपर पोलीस अधीक्षक अनमोल मित्तल यांची ठाणे (ग्रामीण) वरून बीडमधील अंबाजोगाईला बदली झाली आहे. मीना मखवाना यांची ठाणे (ग्रामीण) च्या अपर पोलीस अधीक्षकपदावरून ठाणे शहरातील परिमंडळ 1 च्या पोलीस उप आयुक्तपदी नेमणूक झाली आहे. जयंत बजबळे यांची ठाणे शहरात पोलीस उपायुक्त म्हणून नियुक्ती करण्यात आली आहे. एकीकडे राज्यातील वरिष्ठ पोलीस अधिकाऱ्यांच्या बदल्यांचे सत्र सुरू आहे, तर दुसरीकडे ठाण्यातील अधिकाऱ्यांना मिळालेली एक वर्षाची मुदतवाढ चर्चेचा विषय ठरली आहे.

बाकीच्या अधिकाऱ्यांच्या बदल्या अशा आहेत. विकास संपत नाईक हे नागपूरमध्ये नागरी हक्क संरक्षण विभागात पोलीस उप अधीक्षक होते, त्यांना आता मुंबईत राज्य गुप्तवार्ता विभागात अपर उप आयुक्त म्हणून पाठवले आहे. संकेत सतीश गोसावी हे पुण्यात गुअवि मध्ये पोलीस उप अधीक्षक होते, ते आता रत्नागिरी उपविभागाचे उपविभागीय पोलीस अधिकारी असतील. कुमार भिकाजी चौधरी लातूरमधील औसा उपविभागात उपविभागीय पोलीस अधिकारी होते, त्यांची नाशिकमधील महाराष्ट्र पोलीस अकादमीत पोलीस उप अधीक्षकपदी बदली झाली आहे.

सुधीर पुंडलिक नांदणवार यांना भंडारा जिल्ह्यातील तुमसर उपविभागात प्रतीक्षाधीन उपविभागीय पोलीस अधिकारी म्हणून नेमले आहे. दहशतवाद विरोधी पथकात सहायक पोलीस आयुक्त असलेले संतोष वैरागडे आता नाशिकमधील मालेगाव कॅम्प उपविभागाचे उपविभागीय पोलीस अधिकारी असतील. बीडमध्ये आर्थिक गुन्हे शाखेत पोलीस उप अधीक्षक असलेले श्रीकांत चंद्रकांत कांकाळ यांची छ.सांभाजीनगर येथे अनुसूचित जमाती प्रमाणपत्र पडताळणी समितीत पोलीस उप अधीक्षकपदी बदली झाली आहे.

आकांक्षा यादव यांची रत्नागिरी उपविभागाच्या उपविभागीय पोलीस अधिकारीपदावरून लातूरमधील औसा येथे त्याच पदावर बदली झाली आहे. संदीप जाधव यांची प्रतीक्षाधीन उपविभागीय पोलीस अधिकारी म्हणून औसा, नांदेड येथे नेमणूक झाली आहे. वैशाली ईश्वर कडुकर या साताऱ्यात अपर पोलीस अधीक्षक होत्या, त्यांना पुण्यात गुन्हे अन्वेषण विभागात पोलीस अधीक्षक म्हणून पाठवले आहे. शिवराज पाटील हे नांदेडमध्ये अपर पोलीस अधीक्षक आहेत आणि त्यांना एक वर्षाची मुदतवाढ मिळाली आहे. अमरसिंग जाधव ठाणे शहरात गुन्हे शाखेत पोलीस उप आयुक्त म्हणून आणि प्रशांत कदम परिमंडळ 5 मध्ये पोलीस उप आयुक्त म्हणून एक वर्ष काम करतील.