वरोऱ्यात भरदुपारी सुपरवायझरला बेदम मारहाण, पाच अज्ञातांविरुद्ध गुन्हा

राज्यासह देशभरात गुन्हेगारी वाढली असून, त्यामुळे नागरिकांमध्ये दहशत निर्माण होत आहे. अशातच चंद्रपूर जिल्ह्यातील वरोरा तालुक्यातून एक मोठी बातमी समोर आली आहे. तालुक्यातील एकोना माईन्स परिसरात एका ट्रान्सपोर्ट कंपनीच्या सुपरवायझरला पाच अज्ञात व्यक्तींनी लोखंडी रॉड आणि दांड्यांनी बेदम मारहाण केल्याची घटना घडली आहे. ही घटना रविवारी दुपारी दोन वाजण्याच्या सुमारास घडली.

या हल्ल्यात मंगेश दिलीप चव्हाण हे गंभीर जखमी झाले आहेत. त्यांचे वय २७ वर्षे असून ते चंद्रपूरमधील अभ्यंकर वॉर्डातील स्नेहल नगर येथे राहतात. या प्रकरणी वरोरा पोलिसांनी पाच अज्ञात आरोपींविरुद्ध गुन्हा दाखल केला आहे.

मिळालेल्या माहितीनुसार, मंगेश चव्हाण रविवारी दुपारी माईन्स परिसरातील स्टॉकवर एका झाडाखाली झोपले होते. त्या वेळी तिथे एक कार आली. कारमधून उतरलेल्या पाच जणांनी आधी त्यांना शिवीगाळ केली आणि मग लोखंडी रॉड व दांड्यांनी त्यांच्या हातापायांवर, छातीवर आणि पाठीवर मारहाण केली. हल्लेखोरांपैकी दोघांनी तोंडाला कापड बांधले होते.

कोळसा वाहतुकीच्या कामावरून ट्रान्सपोर्ट कंपन्यांमध्ये सुरू असलेल्या वादातून हा हल्ला झाल्याची प्राथमिक माहिती आहे. जखमी चव्हाण यांना वरोरा उपजिल्हा रुग्णालयात दाखल करण्यात आले आहे. भारतीय न्याय संहितेच्या विविध कलमांखाली गुन्हा नोंदवण्यात आला असून, पुढील तपास पोलीस उपनिरीक्षक अजिंक्य पवार करत आहेत.

दरम्यान, संभाजीनगरमध्येही मारहाणीची एक घटना घडली आहे. १ नोव्हेंबर रोजी मध्यरात्री चिकलठाणा रोडवरील पुष्पा गार्डनसमोर एका गॅरेज चालकाला लोखंडी पाईपने बेदम मारहाण झाली. हातउसने दिलेले ९४ हजार रुपये परत देण्याच्या बहाण्याने त्यांना बोलावून घेण्यात आले आणि तिघांनी त्यांना मारहाण केली, असे सांगितले जात आहे. या घटनेमुळे परिसरात मोठी खळबळ उडाली आहे.

या प्रकरणी सोहेल सलमान खान (वय ३२, रा. कटकट गेट), साजिद शेख (वय ३०, रा. मोतीवाला कॉलनी, चिकलठाणा) आणि सुलतान शेख (वय ४०, रा. जिन्सी) यांच्याविरुद्ध एमआयडीसी सिडको पोलीस स्टेशनमध्ये गुन्हा दाखल करण्यात आला आहे. मारहाण केल्याचा आरोप या तिघांवर आहे. आरेफ खुर्सी मंसुरी (वय २८, रा. केंब्रीज चौक) यांनी या प्रकरणात फिर्याद दिली आहे.