तीस्ता नदीच्या तीव्र प्रवाहात वाहून गेले हत्तीचे पिल्लू; वन विभाग आणि मच्छीमारांनी घडवून आणली आईशी भेट
तीस्ता नदीच्या जोरदार प्रवाहात हत्तीचे एक नवजात पिल्लू आईपासून वेगळे होऊन सुमारे पाच किलोमीटर वाहत गेले. स्थानिक मच्छीमार आणि वन विभागाच्या पथकाने मिळून त्याची सुखरूप सुटका केली आणि त्याला पुन्हा आईजवळ नेले.
आई आणि तिच्या पिल्लामधलं नातं फक्त माणसांपुरतं मर्यादित नसतं, ते प्राण्यांमध्येही तितकंच घट्ट असतं. आपल्या पिल्लाला वाचवण्यासाठी आई कोणत्याही थराला जाते, पण कधी कधी परिस्थिती अशी उभी राहते की पिल्लू संकटात असूनही आईला काहीच करता येत नाही. तीस्ता नदीजवळ नुकतीच अशीच एक घटना घडली आणि तिचा व्हिडिओ सध्या सोशल मीडियावर मोठ्या प्रमाणात व्हायरल होत आहे.
मिळालेल्या माहितीनुसार, पाण्याच्या वेगवान प्रवाहामुळे हत्तीचे एक नवजात पिल्लू आपल्या आईपासून वेगळे झाले आणि तीस्ता नदीत वाहून गेले. नदीचा जोरदार प्रवाह इतका तीव्र होता की त्याने या इवल्याशा पिल्लाला प्रवाहाच्या दिशेने तब्बल सुमारे ५ किलोमीटरपर्यंत ओढत नेले. इतक्या मोठ्या अंतरापर्यंत वाहून गेल्यावर पिल्लू अक्षरशः बुडण्याच्या स्थितीत पोहोचले होते, आणि क्षणाक्षणाला त्याच्या जिवाला धोका वाढत होता.
ही परिस्थिती लक्षात येताच काही स्थानिक मच्छीमार आणि वन विभागाचे पथक पिल्लाला वाचवण्यासाठी तातडीने धावून गेले. नदीचा जोरदार प्रवाह आणि एकूणच कठीण परिस्थितीचा सामना करत या पथकाने बुडणाऱ्या हत्तीच्या पिल्लाला सुखरूप बाहेर काढले. एका बोटीच्या मदतीने सर्वांनी मिळून पिल्लाची सुटका केली आणि त्याला त्याच बोटीतून त्याच्या आईजवळ सुरक्षितपणे नेण्यात आले.
या संपूर्ण रेस्क्यू ऑपरेशनचा व्हिडिओ Mudit Kumar Verma IFS या एक्स अकाऊंटवरून शेअर करण्यात आला. या पोस्टमध्ये नमूद केल्याप्रमाणे, तीस्ता नदीच्या जोरदार प्रवाहात हत्तीचे नवजात पिल्लू जवळपास ५ किलोमीटर वाहत गेले होते. वन विभागाच्या टीमने स्थानिक मच्छीमारांच्या मदतीने बुडणाऱ्या पिल्लाला वाचवले आणि त्याला त्याच्या आईशी पुन्हा भेटवले. ही रेस्क्यू आणि पुनर्भेटीची एक सुंदर कहाणी असल्याचे या पोस्टमध्ये म्हटले आहे.
सुटकेनंतरच्या व्हिडिओत लहान हत्तीचे पिल्लू आपले इवलेसे पाऊल टाकत आई हत्तीणीच्या दिशेने जाताना दिसते. घडलेल्या प्रसंगाने ते इतके घाबरलेले असते की आईला पाहताच ते तिच्याकडे धाव घेते आणि तिला बिलगून घट्ट मिठी मारते. आई आणि पिल्लाच्या या पुनर्भेटीचा क्षण अनेकांच्या मनाला स्पर्श करून गेला.
हा व्हिडिओ सोशल मीडियावर मोठ्या प्रमाणात व्हायरल झाला असून अनेक युजर्सनी कमेंट सेक्शनमध्ये आपल्या प्रतिक्रिया नोंदवल्या आहेत. एका युजरने लिहिले की, त्याला व्हिडिओत फक्त स्थानिक लोक दिसले, वन विभाग दिसलेच नाही. दुसऱ्या एका युजरने लिहिले की, हत्तीच्या पिल्लाला आईने नक्कीच खूप ओरडा दिला असेल. आणखी एका युजरने हत्तीण आणि तिच्या पिल्लाची पुन्हा भेट घडवून आणणाऱ्या संपूर्ण टीमचे आभार मानत त्यांना शुभेच्छा दिल्या.
