DIY पेस्ट स्प्रे: ट्विंकल खन्नाचा देशी जुगाड, झुरळांना सळो की पळो सोडून देणारी नामी युक्ती

स्वयंपाकघरात झुरळं आणि लाल मुंग्या दिसायला लागल्या की संपूर्ण किचन साफ करण्याचं टेन्शन येतं. त्यातही झुरळांना घालवणं हे सगळ्यात कठीण काम असतं. बाजारात मिळणारे स्प्रे बऱ्यापैकी काम करतात, पण त्यात असणारी रसायनं आरोग्यासाठी सेफ नसतात. त्यामुळे एखादा चांगला घरगुती उपाय हवा असतो, जो सेफही असेल आणि काम पण करेल.

याच विषयावर अभिनेत्री आणि लेखिका ट्विंकल खन्नाने अलीकडे सोशल मीडियावर एक पोस्ट शेअर केली. 'ट्विक इंडिया' या इन्स्टाग्राम अकाउंटसाठी दिलेल्या एका पोस्टमध्ये तिने सांगितलं की, तमालपत्र, लवंग आणि व्हिनेगर एकत्र करून बनवलेलं मिश्रण किचनमधील ड्रॉवर आणि कॅबिनेटच्या कोपऱ्यांमध्ये फवारता येतं. तिच्या मते, हे मिश्रण किचनमधून झुरळं आणि लाल मुंग्यांना दूर ठेवायला मदत करतं.

हा घरगुती स्प्रे बनवायची पद्धतही तिने सांगितली आहे. सगळ्यात आधी ८ ते १० लवंगा आणि २ ते ३ तेजपत्ता घ्यायचे आणि ते हलकेच ठेचून किंवा कुटून घ्यायचे, म्हणजे त्यातले घटक पाण्यात नीट मिसळतील. त्यानंतर एक कप पाणी आणि एक कप व्हिनेगर एका भांड्यात टाकून त्यात ठेचलेली लवंग आणि तेजपत्ता घालायची. हे मिश्रण काही मिनिटं उकळायचं आणि नंतर गॅस बंद करून थंड होऊ द्यायचं. मिश्रण पूर्ण गाळून घ्यायचं, जेणेकरून त्यात लवंग किंवा तेजपत्ता शिल्लक राहणार नाही. गाळलेलं मिश्रण एका स्वच्छ स्प्रे बॉटलमध्ये भरून ठेवायचं.

हा स्प्रे तयार झाल्यावर तो किचनमधील ड्रॉवर, कॅबिनेटचे कोपरे आणि ज्या ठिकाणी झुरळं किंवा मुंग्या नेहमी दिसतात, त्या जागी हलकेच फवारता येतो. मिश्रण पूर्णपणे गाळून घेणं गरजेचं आहे, कारण त्यात लवंग किंवा तेजपत्ता शिल्लक राहिला तर स्प्रे बॉटल वारंवार अडकू शकते. त्यामुळे कापडाने किंवा गाळणीने मिश्रण नीट गाळून मगच बॉटलमध्ये भरावं, असं सांगण्यात आलं आहे.

ट्विंकल खन्नाने ही टिप तिच्या नेहमीच्या विनोदी स्टाईलमध्ये सांगितली. ती म्हणाली की, जर हा स्प्रे माणसांवरही वापरता आला असता, तर रात्री उशिरा येणाऱ्या दोन पायांच्या आणि सहा पायांच्या पाहुण्यांपासून तिची सुटका झाली असती. यातून तिने घरात रात्री उशिरा येणाऱ्या नको असलेल्या पाहुण्यांची आणि झुरळांची अशी दोन्ही प्रकारची तुलना गमतीने केली.

मात्र फक्त स्प्रेवर अवलंबून राहून झुरळांची समस्या पूर्णपणे टळत नाही, हेही या पोस्टमध्ये नमूद करण्यात आलं आहे. किचन स्वच्छ ठेवणं, अन्नाचे तुकडे उघड्यावर न ठेवणं, कचरा वेळेवर टाकणं आणि घरातली आर्द्रता नियंत्रणात ठेवणं, या गोष्टीही तितक्याच महत्त्वाच्या असल्याचं सांगण्यात आलं आहे. म्हणजेच केवळ स्प्रे फवारून थांबायचं नाही, तर किचनची रोजची स्वच्छता आणि काळजीही तितकीच आवश्यक असते.