निर्मल उज्ज्वल सोसायटीच्या संचालकांवर ठेवीदारांचा दबाव, पैसे सुरक्षित असल्याचा दावा

निर्मल उज्ज्वल सोसायटी प्रकरणामुळे नागपूरसह इतर भागांतील ठेवीदारांचे लक्ष आता संस्थेच्या सध्याच्या स्थितीकडे लागले आहे. ठेवींबाबत अधिकृतपणे कोणती माहिती उपलब्ध आहे, हे समजून घेणे महत्त्वाचे आहे. केंद्रीय सहकारी संस्था निबंधकाच्या संकेतस्थळावर संस्थेशी संबंधित नियामक नोंदी आणि कलम ८६ अंतर्गत नोटीस सूचीबद्ध आहे.

नागपूर येथील निर्मल उज्ज्वल क्रेडिट सोसायटीत सध्या काही तांत्रिक अडचणींमुळे ठेवीदारांचे पैसे अडकले आहेत. मात्र इतर संस्थांप्रमाणे या सोसायटीचे संचालक पळून गेलेले नाहीत आणि संस्थेच्या कार्यालयाला टाळेही लागलेले नाही. उलट संचालक मंडळ रोज कार्यालयात उपस्थित राहून परिस्थितीला तोंड देत आहे. प्रत्येक ठेवीदाराचा एक अन् एक पैसा सुरक्षित आहे आणि तो टप्प्याटप्प्याने परत केला जाईल, असा ठाम विश्वास त्यांनी व्यक्त केला आहे.

असे असतानाही काही स्वार्थी लोक या परिस्थितीचा चुकीचा फायदा घेण्याचा प्रयत्न करत असल्याचे समोर येत आहे. मिळालेल्या माहितीनुसार, चंद्रपूर येथील काही जण या संकटाच्या काळात स्वतःचा फायदा करून घेण्यात गुंतले आहेत. स्वतःला सर्वांचे तारणहार किंवा देव समजणारे हे लोक इतर सामान्य आणि भोळ्या ठेवीदारांना सोबत घेऊन गोंधळ घालत आहेत. संचालकांवर अनुचित दबाव आणून आणि धमक्या देऊन आधी फक्त स्वतःचेच पैसे वसूल करण्यासाठी ते सर्व शक्ती पणाला लावत आहेत.

या तथाकथित नेत्यांचे बोलणे आणि वक्तृत्व सर्वसामान्य ठेवीदारांच्या हितासाठी नसून, केवळ स्वतःची अडकलेली रक्कम परत मिळावी यासाठीच वापरले जात आहे. इतर ठेवीदारांच्या खांद्यावर बंदूक ठेवून स्वतःचा स्वार्थ साधण्याचा हा प्रकार अत्यंत दुर्दैवी आणि संतापजनक आहे, असे म्हटले जात आहे.

संस्थेच्या व्यवस्थापनाने स्पष्ट केले आहे की सर्व ठेवीदारांचे पैसे परत करण्याचा संचालकांचा प्रामाणिक मानस आहे. तांत्रिक समस्यांमुळे अडकलेली रक्कम टप्प्याटप्प्याने दिली जात आहे. काही मोजक्या लोकांनी दबावाची नीती वापरून आपले पैसे आधी काढून घेतले, तर त्याचा थेट फटका इतर हजारो प्रामाणिक आणि संयमी ठेवीदारांना बसू शकतो.

सध्याच्या काळात अफवांवर विश्वास न ठेवता आणि दबाव आणणाऱ्यांच्या चिथावणीला बळी न पडता सर्व ठेवीदारांनी संयम बाळगण्याची अत्यंत गरज आहे. संचालक मंडळ जबाबदारीने काम करत असून मार्ग काढण्याचा प्रयत्न करत आहे. अशा वेळी काही लोकांनी संधीचा फायदा घेण्याच्या हेतूने निर्माण केलेला अडथळा सर्वांच्याच हिताला बाधा पोहोचवू शकतो.

त्यामुळे सर्वसामान्य ठेवीदारांनी एकजुटीने अशा स्वार्थी वृत्तीचा निषेध केला पाहिजे आणि संस्थेला पूर्वपदावर आणण्यासाठी सहकार्य केले पाहिजे, अशी भावना सुजाण सभासदांमधून व्यक्त होत आहे.