निमरत कौरने सांगितली शहीद वडिलांची आठवण, अपहरणानंतर सातव्या दिवशी आली हत्येची बातमी

अभिनेत्री निमरत कौर हिने तिच्या शहीद वडिलांच्या आठवणींना पुन्हा उजाळा दिला आहे. तिचे वडील मेजर भूपेंद्र सिंह हे ३२ वर्षांपूर्वी काश्मीरमध्ये झालेल्या एका दहशतवादी हल्ल्यात शहीद झाले होते. नुकत्याच दिलेल्या एका मुलाखतीत निमरतने वडिलांच्या हत्येचा प्रसंग, त्यानंतर घरावर कोसळलेलं दुःख आणि आईने दोन्ही मुलींना कसं सांभाळलं, याबद्दल सांगितलं.

निमरतच्या सांगण्यानुसार, तिच्या वडिलांचं अपहरण एका अगदी नेहमीच्या कामाच्या दिवशी झालं. ते कर्तव्यासाठी कुठेतरी जात होते आणि परत येत असताना सैनिकांचा वेश घातलेल्या लोकांनी त्यांना सोबत नेलं. हे लोक दहशतवादी होते आणि त्यांनी लष्करी गणवेश चढवला होता. निमरत म्हणाली, "एका सामान्य कामाच्या दिवशी त्यांचं अपहरण झालं. ते त्यांच्या कर्तव्यासाठी कुठेतरी जात होते आणि परत येत असताना सैनिकांचा वेश धारण केलेल्या लोकांनी त्यांचं अपहरण केलं. त्यांनी लष्करी गणवेश घातला होता आणि ते त्यांना सोबत घेऊन गेले."

अपहरणानंतर आपले वडील सुखरूप परत येतील, अशी कुटुंबाला आशा होती. पण सात दिवसांच्या काळात दहशतवाद्यांनी एकापाठोपाठ एक अनेक मागण्या पुढे केल्या. त्यातल्या काही मागण्या तुरुंगात असलेल्या लोकांना सोडण्याशी संबंधित होत्या. शेवटी सातव्या दिवशी कुटुंबाला वडिलांची हत्या झाल्याची बातमी मिळाली, असं निमरतने सांगितलं.

त्या काळातला अनुभव सांगताना निमरतने मन हेलावून टाकणारी आठवण शेअर केली. ती म्हणाली, "त्या दिवशी सकाळी मी माझ्या वडिलांना कामावर जाताना पाहिलं. मला फक्त ते निघून गेल्याचं आठवतं आणि त्यानंतर जेव्हा मी त्यांना दुसऱ्यांदा पाहिलं, तेव्हा ते शवपेटीत होते." या घटनेतून आपण कधीच पूर्णपणे बाहेर पडू शकलो नाही, असंही तिने सांगितलं.

वडील गेले तेव्हा निमरतची आई खूप तरुण होती. तरीही त्यांनी निमरत आणि तिच्या बहिणीला एकट्याने वाढवलं. अवघड परिस्थितीत आईने ज्या पद्धतीने कुटुंबाला सावरलं, त्याबद्दल निमरतने तिचं कौतुक केलं. ती म्हणाली, "ज्या प्रकारे माझ्या आईने आमचं संगोपन केलं आणि नंतर तिचं व आमचं आयुष्य पुन्हा उभारलं, ते फार कमी स्त्रिया एकट्याने इतक्या सन्मानाने आणि सहजतेने करू शकल्या असत्या."

वडिलांच्या पुण्यतिथीनिमित्त निमरतने त्यांची आठवण काढणारी एक भावनिक पोस्टही शेअर केली होती. त्यात तिने लिहिलं, "बाबांनी देशाची सेवा करून ३२ वर्षे झाली आहेत. ते एक खरे सुपुत्र, एक खरे नायक, एक अद्भुत पती आणि वडील होते. सर्वात महत्त्वाचं म्हणजे, ते सिंहासारखे धाडसी सैनिक होते." अशा शब्दांत तिने वडिलांना आदरांजली वाहिली.