परदेशी MBBS पदवीधरांसाठी बनावट FMGE गुणपत्रिका बनवणारी टोळी उघड; तिघांना अटक

महाराष्ट्र सायबर विभागाने बनावट डॉक्टर तयार करणाऱ्या एका मोठ्या आंतरराज्य नेटवर्कचा भांडाफोड केला आहे. परदेशातून MBBS ची पदवी घेऊन भारतात परतलेल्या विद्यार्थ्यांसाठी ही टोळी फॉरेन मेडिकल ग्रॅज्युएट एक्झामिनेशन (FMGE) चे बनावट स्कोरकार्ड म्हणजेच गुणपत्रिका आणि प्रमाणपत्रे बनवते. त्यामुळे हे विद्यार्थी भारतात डॉक्टर म्हणून आपली नोंदणी पूर्ण करू शकतात, असे समोर आले आहे.

हे प्रकरण महाराष्ट्र मेडिकल काउंसिलने (MMC) नोंदणीसाठी आलेल्या अर्जांची छाननी केल्यानंतर उघडकीस आले. परदेशी मेडिकल ग्रॅज्युएट्ससाठी FMGE ची स्क्रीनिंग चाचणी बंधनकारक आहे. ती काहींनी उत्तीर्ण केलेली नसतानाही त्यांच्याकडे मेडिकल रजिस्ट्रेशन सर्टिफिकेट असल्याची शंका काउंसिलला आली. त्यानंतर MMC ने तातडीने मुंबईतील स्थानिक सायबर पोलीस स्टेशन आणि महाराष्ट्र सायबर यांच्याकडे तक्रार नोंदवली.

महाराष्ट्र सायबरने टेक्निकल अॅनालिसिस, डिजिटल रेकॉर्ड आणि सिस्टम लॉग्स यांचा सखोल तपास करून या फसवणुकीत सामील असलेल्यांची ओळख पटवली. आतापर्यंत या प्रकरणातील म्होरक्यासह तिघांना अटक करण्यात आली आहे.

अटक झालेल्या आरोपींमध्ये वरुण प्रतापराव आखाडे (28) आणि संकेत प्रभाकर उन्हाळे (26) यांचा समावेश आहे. हे दोघेही बुलढाण्याचे रहिवासी आहेत. तपासात समोर आले की, हे दोघे स्वतः FMGE परीक्षेत नापास झाले होते. तरीही बनावट प्रमाणपत्राच्या आधारे डॉक्टर म्हणून प्रॅक्टिस करण्याचा त्यांचा प्रयत्न होता.

तिसरा आणि सर्वात महत्त्वाचा आरोपी राहुल गोपाल पाटील (35) हा नाशिकचा रहिवासी आहे. तो या संपूर्ण आंतरराज्य टोळीचा मास्टरमाइंड आणि ऑपरेटर असल्याचे सांगण्यात येत आहे. त्याने पैसे घेऊन 15 ते 20 अर्जदारांना अशाच प्रकारे बनावट स्कोर कार्ड, सर्टिफिकेट आणि इतर कागदपत्रे तयार करून दिल्याचेही तपासात समोर आले आहे.

महाराष्ट्र सायबर विभागाने दिलेल्या माहितीनुसार, आरोपींची चौकशी सुरू आहे. बनावट कागदपत्रे तयार करणारे, ती पुढे देणारे आणि त्यांचा वापर करणारे अशा संपूर्ण नेटवर्कचा शोध घेतला जात आहे. पैशांची देवाणघेवाण, डिजिटल डिव्हाइस आणि कम्युनिकेशन रेकॉर्ड यांचाही जोमाने तपास सुरू आहे, जेणेकरून या रॅकेटमधील आणखी लोकांची ओळख पटू शकेल.

सायबर विभागाने सर्व परदेशी मेडिकल ग्रॅज्युएट्सना कठोर इशारा दिला आहे. त्यांनी कोणत्याही दलालाच्या चक्करमध्ये पडू नये आणि FMGE सारखी बंधनकारक परीक्षा टाळण्यासाठी अशा बनावट कागदपत्रांचा वापर करू नये, असे विभागाने म्हटले आहे. असे केल्यास त्यांना कठोर कायदेशीर कारवाईला सामोरे जावे लागू शकते आणि त्यांच्या करिअरलाही धोका निर्माण होऊ शकतो.