निलंगा तालुक्यात २२ वर्षीय तरुणाचा धारदार शस्त्राने खून; महेबूब मुल्लाविरुद्ध तक्रार

लातूर जिल्ह्यातील निलंगा तालुक्यातील काटेजवळगा या गावात खुनाची धक्कादायक घटना घडली आहे. शनिवारी रात्री आठच्या सुमारास सोहेल गुलाब पठाण या २२ वर्षीय तरुणावर धारदार शस्त्राने वार करण्यात आले आणि त्यात त्याचा मृत्यू झाला. या प्रकरणी महेबूब गफार मुल्ला याच्याविरुद्ध तक्रार दाखल करण्यात आली आहे. या घटनेमुळे गावात तसेच आसपासच्या परिसरात खळबळ उडाली आहे.

पोलिसांकडून मिळालेल्या माहितीनुसार, सोहेल हा आई सायरा आणि वडील गुलाब पठाण यांच्यासोबत काटेजवळगा येथे राहत होता. त्यांच्या घराचे बांधकाम सुरू असल्यामुळे हे कुटुंब सध्या शेजारी राहणाऱ्या एका व्यक्तीच्या घरी तात्पुरते राहत होते. शनिवारी सोहेल शेतातले काम संपवून घरी आला होता. त्यानंतर रात्रीच्या सुमारास तो बांधकाम सुरू असलेल्या घराजवळ बसून मोबाईल बघत होता.

दरम्यान, रात्री आठच्या सुमारास शेजारी राहणाऱ्या एका महिलेने सोहेलच्या आईला बाहेर बोलावले आणि त्याला मारहाण झाल्याची माहिती दिली. ही माहिती मिळताच आईने लगेच घटनास्थळी धाव घेतली. तेव्हा सोहेल रक्ताच्या थारोळ्यात बेशुद्ध अवस्थेत पडलेला त्यांना दिसला. त्याच्या छातीच्या डाव्या बाजूला धारदार शस्त्राने वार केल्याच्या गंभीर जखमा होत्या.

कुटुंबीयांनी सोहेलला तातडीने खासगी वाहनातून निलंगा येथील शासकीय रुग्णालयात दाखल केले. मात्र, तिथे डॉक्टरांनी तपासणी केल्यानंतर त्याला मृत घोषित केले. या घटनेमुळे सोहेलच्या कुटुंबावर दुःखाचा डोंगर कोसळला आहे.

तक्रारीत सोहेलच्या आईने एका जुन्या वादाचा उल्लेख केला आहे. सुमारे दोन महिन्यांपूर्वी सोहेल हा महेबूब मुल्ला यांच्या पत्नीशी बोलत असल्याच्या संशयावरून सोहेल आणि महेबूब यांच्यात वाद झाला होता. त्या वेळी गावातील नागरिक आणि नातेवाइकांनी मध्यस्थी करून हा वाद मिटवला होता. तसेच, यापुढे संशयावरून भांडण करणार नाही, असे सांगत महेबूबने त्या वेळी माफी मागितली होती, असे सोहेलच्या आईने तक्रारीत नमूद केले आहे.

या जुन्या वादातूनच हत्या झाल्याचा संशय व्यक्त केला जात आहे. महेबूब मुल्ला याच्याविरुद्ध तक्रार दाखल झाली असून, या प्रकरणी पोलीस पुढील तपास करत आहेत.