हॉटेलमधले जुने टॉवेल फेकले जात नाहीत, वापरतात कुठे? जाणून घ्या

हॉटेलमध्ये गेल्यावर आपण आधी रूम कशी आहे, बाथरूम स्वच्छ आहे का हे बघतो. सोबतच बाथरूममध्ये असलेले जाड, मऊ, पांढरेशुभ्र टॉवेलही लक्ष वेधून घेतात. पण हेच टॉवेल काही दिवसांनी जुने झाले की त्यांचं नेमकं काय होतं, याचा विचार क्वचितच कोणी करतं. हे टॉवेल कचऱ्यात फेकले जातात असं वाटत असेल तर तसं अजिबात नाही. मोठी हॉटेल्स जुने टॉवेल कधीच कचऱ्यात टाकत नाहीत.

रोज शेकडो पाहुणे तेच टॉवेल वापरतात आणि रोज ते धुतलेही जातात. गरम पाण्यात आणि केमिकलमध्ये सतत धुतल्यामुळे काही महिन्यांतच टॉवेल पातळ व्हायला लागतो. त्याचा पांढरेपणा कमी होऊन तो थोडा पिवळसर दिसू लागतो. सगळ्यात महत्त्वाचं म्हणजे त्याची पाणी शोषून घेण्याची क्षमताही कमी होते. असा टॉवेल मग पाहुण्यांना देता येत नाही, कारण फाईव्ह स्टार हॉटेलमध्ये ग्राहकाला जुनं, पातळ टॉवेल देणं शक्यच नसतं. पण म्हणून तो टाकाऊ ठरत नाही.

क्लीन इंडिया जर्नलनुसार, हॉटेल इंडस्ट्रीत जुन्या चादरी आणि टॉवेलचा परत वापर करण्यासाठी वेगवेगळ्या आयडिया वापरल्या जातात. टॉवेल जुना झाला तरी कापड चांगलं असेल तर तो दुसऱ्या कामासाठी वापरला जातो. साफसफाईसाठी याचा सगळ्यात जास्त वापर होतो. हॉटेलमधले कामगार तोच टॉवेल फाडून त्याचं फडकं बनवतात आणि त्याने रूममधली धूळ पुसणे, काच पुसणे, फरशी पुसणे अशी कामं केली जातात. कधी पेंटिंगचं किंवा रिपेअरचं काम चालू असेल, तर फरशी खराब होऊ नये म्हणून खाली तेच टॉवेल अंथरले जातात.

प्रत्येक हॉटेलची पद्धत वेगळी असते. काही मोठी हॉटेल्स जुने पण चांगल्या स्थितीतले टॉवेल आणि चादरी गरजू लोकांना दान करतात. एका रिपोर्टमध्ये असं सांगण्यात आलं होतं की काही हॉटेल्स आपले जुने टॉवेल अनाथाश्रमांना किंवा धर्मादाय संस्थांना देतात. एका हॉटेल समूहाने तर जुने टॉवेल प्राण्यांच्या निवारा केंद्राला दान करण्याचा उपक्रमच सुरू केला होता, जिथे थंडीपासून बचावासाठी कुत्रे-मांजरांसाठी या टॉवेलचा वापर केला जातो.

टॉवेल अगदीच जीर्ण होऊन फाटतो आणि त्याचा कुठल्याच कामासाठी वापर होऊ शकत नाही, तेव्हा त्याचं रिसायकलिंग केलं जातं. त्याचे छोटे तुकडे करून त्याच्या धाग्यांपासून नवीन काहीतरी बनवलं जातं. भारतातही यासाठी एक खास उपक्रम सुरू आहे, ज्यात हॉटेल आणि हॉस्पिटलमधले जुने टॉवेल, चादरी गोळा करून त्यांच्यापासून पायपुसणी, गाडी पुसायचे फडके किंवा अगदी नवीन कापड तयार केलं जातं. त्यामुळे पुढच्या वेळी हॉटेलमध्ये गेल्यावर त्या पांढऱ्याशुभ्र टॉवेलकडे बघून त्याच्या या लांबलचक प्रवासाचा नक्की विचार करा.