गोधनी रोडवर भरधाव टिप्परच्या धडकेत महिलेचा मृत्यू, चिमुकला जखमी; २० दिवसांत दुसरा बळी

नागपुरातील गोधनी रोडवर मंगळवारी सायंकाळी भरधाव वेगाने आलेल्या टिप्परने एका दुचाकीला मागून जोरदार धडक दिली. या भीषण अपघातात ३० वर्षांच्या ज्योती पंकज फलके यांचा मृत्यू झाला, तर त्यांचे लहान मूलही जखमी झाले.

हा अपघात सुमारे ४.३० वाजता मानकापूर पोलीस स्टेशनच्या हद्दीत, गोधनी रोडवर गारवा बिर्याणी सेंटरसमोर झाला. ज्योती फलके आपले पती आणि मुलासह दुचाकीवरून जात होत्या. त्याचवेळी मागून आलेल्या भरधाव टिप्परने त्यांच्या गाडीला जोरदार धडक दिली. धडकेनंतर दुचाकीवरील तिघेही रस्त्यावर कोसळले. त्याच वेळी टिप्परचे चाक ज्योती यांच्या डोक्यावरून गेले आणि त्यांचा जागीच मृत्यू झाला. जखमी चिमुकल्याला तातडीने रुग्णालयात दाखल करण्यात आले.

या घटनेनंतर परिसरातील नागरिकांचा संताप अनावर झाला. ते रस्त्यावर उतरले आणि त्यांनी रास्ता रोको आंदोलन केले. त्यामुळे गोधनी रोडवरील वाहतूक तब्बल चार तास ठप्प झाली होती. गोधनी रोडवरील खड्डे, वारंवार होणारे खोदकाम आणि रस्त्यालगतचे अतिक्रमण यामुळे अपघातांना निमंत्रण मिळत आहे, असा आरोप नागरिकांनी केला. रस्त्याची तातडीने दुरुस्ती करावी, अतिक्रमण हटवावे आणि बेदरकारपणे गाडी चालवणाऱ्यांवर कठोर कारवाई करावी, अशी त्यांची मागणी होती.

विशेष म्हणजे, अवघ्या २० दिवसांपूर्वी याच मार्गावर झालेल्या अपघातात एका तरुणीचा मृत्यू झाला होता. त्यानंतरही प्रशासनाने कायमस्वरूपी उपाययोजना केली नाही, म्हणून नागरिकांनी तीव्र नाराजी व्यक्त केली.

परिस्थितीचे गांभीर्य लक्षात घेऊन वरिष्ठ पोलीस अधिकारी घटनास्थळी आले. अतिरिक्त पोलीस आयुक्त विनिता साहू, डीसीपी रमेश धुमाळ, वाहतूक पोलीस उपायुक्त आदित्य मिर्खेलकर आणि मानकापूर झोनच्या डीसीपी अन्नपूर्णा सिंह यांच्यासह मोठा पोलीस बंदोबस्त तैनात करण्यात आला. रात्री सुमारे ८ वाजता महापालिकेच्या मुख्य अभियंता लीना उपाध्याय यांनीही घटनास्थळी भेट दिली आणि परिसरातील अतिक्रमण रातोरात हटवण्याचे निर्देश दिले.

पोलीस आणि महापालिका अधिकाऱ्यांनी नागरिकांशी चर्चा केली आणि उपाययोजना करण्याचे आश्वासन दिले. त्यानंतर आंदोलन मागे घेण्यात आले आणि रस्ता वाहतुकीसाठी पुन्हा खुला करण्यात आला.

दरम्यान, अपघातानंतर पसार झालेल्या टिप्पर चालकाचा पोलिसांनी शोध घेऊन त्याला ताब्यात घेतले आहे. या प्रकरणाचा पुढील तपास मानकापूर पोलीस करत आहेत.

एकाच रस्त्यावर २० दिवसांत दोघांचा जीव गेल्यानंतरही प्रशासनाला जाग कधी येणार, आणखी किती निष्पापांचे जीव गेल्यानंतर गोधनी रोडवरील हा मृत्यूचा सापळा दूर होणार, असा संतप्त सवाल नागरिक विचारत आहेत.